ხელოვნება, განსაკუთრებულ ადამიანებს, განსაკუთრებულ ხელწერას, უნიკალურ მახასიათებლებს ანიჭებს, რომელთა მეშვეობითაც მარტივად ამოიცნობ ავტორსა და მის ნამუშევრებს. შავ–თეთრი ფერების სამყაროში გამორჩეული ხელწერით შექმნილი პორტრეტები – ეს დათო ანდიაშვილის შემოქმედებითი სამყაროა, სადაც ყოველი ნახატი მხატვრის ემოციებისა და განცდების უშუალო გამოხატულებაა.
დათო ბოლნისში დაიბადა და ამჟამად დაბა კაზრეთში ცხოვრობს. მისი სიყვარული, ხატვის მიმართ, ადრეული ბავშვობიდან იწყება – სულ რაღაც ორი წლის ასაკში, მამამ ფანქრის ხელში დაჭერა ასწავლა. “ბავშვობაში სულ ვთხოვდი მშობლებს – ეს დამიხატეთ, ის დამიხატეთ. ასე ნელ–ნელა, ზრდასთან ერთად, გამოცდილებაც შევიძინე, “ – იხსენებს დათო.
მიუხედავად იმისა, რომ ბავშვობიდან ჯანმრთელობის გარკვეული პრობლემები ჰქონდა, მისი შემოქმედებითი განვითარება არ შეფერხებულა.
–რა არის თქვენთვის ხატვა?
ხატვა ჩემთვის ისაა, რაც დარჩება ჩემგან მომავალში – ხელოვნების შემოქმედებითი სტილი. განსაკუთრებით მახარებს, როცა ჩემი ნახატები სხვებსაც სიხარულს ანიჭებს.
2020 წელს დათომ, თბილისის აპოლონ ქუთათელაძის სახელობის სამხატვრო აკადემია დაამთავრა, რესტავრაციისა და ხელოვნების ისტორიის მიმართულებით. დღეს ის, ძირითადად, პორტრეტებზე მუშაობს შეკვეთით, თუმცა მისი შემოქმედებითი ინტერესები გაცილებით ფართოა.
კითხვაზე, თუ რა არის მისი ინსპირაცია, დათო გვპასუხობს – ,,ნებისმიერი რამ შეიძლება გახდეს ინსპირაციის წყარო. ზოგჯერ უბრალოდ ვუყურებ რაღაცას და გონებაში ახალი იდეა იბადება. ვხატავ როგორც რეალური სამყაროდან, ისე საკუთარი ფანტაზიით. ხშირად ამ ორს ვაერთიანებ – შეიძლება რაღაც გადავხატო და მას, ჩემი წარმოსახვით შექმნილი ელემენტები შევმატო.”
რეალისტური ხელოვნების მოყვარული დათო განსაკუთრებით აფასებს ლეონარდო და ვინჩის და ირაკლი თოიძის შემოქმედებას. მისი აზრით, რეალისტური ნახატები განსაკუთრებულ დაფასებას იმსახურებს, მათი სირთულისა და შესრულებისთვის საჭირო დროისა და გამოცდილების გამო.
დამწყებ მხატვრებს დათო მნიშვნელოვან რჩევას აძლევს: “თავიდან შეიძლება რთული მოგეჩვენოთ ლამაზად დახატვა, მაგრამ ადრე თუ გვიან, აუცილებლად შეძლებთ. მთავარია, არ დანებდეთ, პირველივე წარუმატებლობის შემდეგ. ნუ ეცდებით სხვა მხატვრების ზუსტ კოპირებას – იპოვეთ საკუთარი სტილი და ხელწერა.”
სამომავლოდ, დათო საკუთარი გამოფენის მოწყობას გეგმავს. მისთვის ხელოვნება არა მხოლოდ ნიჭი, არამედ ცხოვრების განუყოფელი ნაწილია, რომლის განვითარებასაც აუცილებლად გააგრძელებს.
მარიამ ონიანი
