ბოლნისის მუნიციპალიტეტის კულტურის ცენტრის ახალი  მენეჯერი, წარმატების მისაღწევად, გუნდური მუშაობის პრინციპით ხელმძღვანელობს. ის არასდროს იღებს გადაწყვეტილებას დამოუკიდებლად. სამსიტყვიანი,  შინაარსისა და გეგმების მატარებელი სლოგანი, „მიიღე, დაიცავი, განავითარე“ მუშაობის მთავარ მიზნად დაისახა და ამ შემართებით, უკვე რამდენიმე თვეა, აქტიურად მუშაობს ცვლილებებზე, ,,ჩვენი მთავარი პრინციპია მივიღოთ მაქსიმალური შედეგები და გადავიდეთ განვითარების ახალ საფეხურებზე,“- განაცხადა ,,bolnisi.ge“-სთან სოსო კოპალეიშვილმა.  

სოსო კოპალეიშვილი დაიბადა სამტრედიაში.  საჯარო სკოლა დაამთავრა სოფელ იანეთში. პარალელურად მიიღო მუსიკალური,  ქორეოგრაფიული და თეატრალური საბაზისო განათლება. ჩააბარა შოთა რუსთაველის სახელობის კინოსა და დრამის უნივერსიტეტში,  თბილისის სასულიერო სემინარიაში და შემდგომ თბილისის წმ. გიორგი მთაწმინდელის სახელობის საეკლესიო გალობის უმაღლეს სასწავლებელში. 2013 წლიდან  გაიარა სასწავლო კურსები მართვის აკადემიაში. პროფესიით გახლავთ ღვთისმეტყველების ბაკალავრი, თეოლოგი, საეკლესიო მუსიკის ბაკალავრი, ლოტბარ-რეგენტი. 

კულტურის ცენტრის ხელმძღვანელის ამპლუაში დაკისრებული  მოვალეობის შესრულებას 2019 წლის 15 აპრილიდან შეუდგა, თუმცა, მას საზოგადოება ბოლნისის კულტურის სახლის ტრადიციული მუსიკის მიმართულების პროექტით „სამი თაობა“ იცნობს. 

-მოგესალმებით ბატონო სოსო,  2019 წლის 15 აპრილიდან დაინიშნეთ აღნიშნული სამსახურის ხელმძღვანელად, თუმცა მანამდეც აქციურად იყავით ჩართული ბოლნისის კულტურულ ცხოვრებაში და შეიძლება ითქვას, უცხო გარემო არ დაგხვდათ, რა ღონისძიებები გაატარეთ დანიშვნიდან  დღემდე?

-მინდა პირველ რიგში ვისარგებლო შემთხვევით და თქვენი გაზეთის საშუალებით, თითოეულ ბოლნისელს და სრულიად საქართველოს მივულოცო შობა-ახალი წელი.  მშვიდობის, სიკეთის, სიყვარულისა და წარმატებების მომტანი ყოფილიყოს 2020 წელი.

ჩემი სამუშაო გამოცდილება 2003 წლიდან იწყება და არაერთ სფეროს მოიცავს,  განსაკუთრებულად ჩემი პროფესია იკვეთება ტრადიციული მუსიკალური განხრით.

ბოლნისთან 2007 წლიდან მაქვს შეხება. ახლად ხელდასხმული მეუფე ეფრემის მოწვევით   ეპარქიაში ჩამოვედი და მოღვაწეობა დავიწყე გალობის პედაგოგად. შემდეგ სათავეში ჩავუდექი ფოლკლორულ ანსამბლსა და საკათედრო ტაძრის მგალობელთა გუნდ „ორბელს“.  ბოლნისის საზოგადოებას თავი კულტურის სახლის ტრადიციული მუსიკის მიმართულების პროექტით „სამი თაობა“ დავამახსოვრე. 2019 წლის 15 აპრილიდან კი მუნიციპალიტეტის მერისა და ზოგადად მმართველი გუნდის წარდგენით, ა.ა.ი.პ. კულტურის, საკლუბო, საბიბლიოთეკო და სამუზეუმო გაერთიანების ხელმძღვანელი გახლავართ.

რაც შეეხება ღონისძიებების გატარებას, ცვლილებები მომენტალურად არასდროს ხორციელდება. პირველი დღიდანვე დავიწყე დაკვირვებითი მუშაობა. მქონდა გაცნობითი ხასიათის შეხვედრები. ვაკვირდებოდი სიტუაციას, თუ როგორ უნდა განვითარებულიყო მოვლენები. ჩემი მთავარი მიდგომა კრებსითობაშია, ამიტომაც დავამკვიდრე გუნდური მუშაობის პრინციპი და ამით გადავანაწილე პასუხისმგებლობები, რაც გამოიხატა იმაში, რომ  ეტაპობრივად ყველა დარგი, მენეჯმენტის სახელმძღვანელო პრინციპების მიხედვით, ჩაიშალა სტრუქტურულ ერთეულებად, რათა მუშა პროცესი უფრო მარტივი და მოქნილი გამხდარიყო. არასდროს ვიღებ გადაწყვეტილებას დამოუკიდებლად, ყოველთვის შესაბამის სპეციალისტებთან კონსულტაციის, ან უშუალოდ ჩართულობის შედეგად, ხდება ყოველი სიახლის დამკვიდრება. ეს ფაქტობრივად, ხელს უწყობს მეტი თავისუფალი გარემოს შექმნას შემოქმედებითი  თუ ტექნიკური საკითხების მოგვარებაში. ბუნებრივია, ყველაფერს დრო გვაჩვენებს, თუმცა დარწმუნებული ვარ, რომ თანამედროვე მენეჯმენტის პრინციპებიდან გამომდინარე, ყველაფერი სწორად დალაგდება.

-სამსახურს შეეცვალა სახელი, გაქვთ საკუთარი ლოგო. როგორც ვიცით, რამდენიმე მნიშვნელოვანი ცვლილება გატარდა, რა ცვლილებებია ეს?

– პირველი, რაშიც ყველა თანამშრომელი ერთხმად დამეთანხმა, ეს სახელის ცვლილებაა. დაერქვა მარტივი სახელი „კულტურის ცენტრი“. მანამდე იყო გაერთიანება, რაც უფრო კონკრეტული შინაარსის აღმნიშვნელია, ვიდრე მისი ფუნქციურის. აქ ერთიანდება რამდენიმე სფერო. ჩვენ გვაქვს კულტურის სახლები, საგამოფენო სივრცეები, კლუბები, სადაც ხელოვნების დარგების მიხედვით მიმდინარეობს შემოქმედებითი და არაფორმალური საგანმანათლებლო მუშაობა წრეების, სტუდიების, ანსამბლების, თეატრებისა და გამოყენებითი ხელოვნების ოსტატების სახით. ამ ყველაფერს კარგად მოქნილი მმართველობითი სისტემა სჭირდება. ამიტომ, თავდაპირველად ადმინისტრაციაში არსებული სპეციალისტების ბაზაზე ჩამოყალიბდა განყოფილებები დარგების მიხედვით. ადმინისტრაციული, საფინანსო, პიარის, კულტურის, საბიბლიოთეკო, სამუზეუმო, კულტურული მემკვიდრეობისა და ძეგლთა დაცვის განყოფილებები.  ამრიგად, ზემოთ ხსენებული სახელოვნებო თუ სხვა დარგები, მოქნილი მართვისათვის დაექვემდებარა შესაბამის განყოფილებას.

გადავწყვიტეთ გარკვეული რეაორგანიზაცია, რასაც მოჰყვა ე.წ. ბრენდბუქის სახელმძღვანელოს (საფირმო ნიშანი) შექმნა. ეს თემა ფართო და მრავალფეროვანია, თუმცა კონკრეტულად,  ჩვენს საქმიანობას მიესადაგა 8 ძირითადი რამ, რაც ფაქტობრივად წარმოგვიჩენს კულტურის ცენტრის საფირმო ნიშანს. შევქმენით ჩვენი ლოგო, რომელიც უკავშირდება ბოლნისს თავისი მრავალფეროვნებით. მნიშვნელოვანია ბრენდბუქში კონკრეტული ფერი.  ამიტომ, ჩვენთვის გასაგებად, ბოლნისური ყვითელი ტუფის ფერი (საერთაშორისო სტანდარტების მიხედვით ე.წ. აქლემის ფერი) დავამტკიცეთ. ერთ-ერთი მთავარი რამ, რაც სრულიად სიახლეა, არის ჩვენი სლოგანი, რაც გარკვეულწილად უკავშირდება ცენტრის მთავარ მიზანს, ეს არის: „მიიღე, დაიცავი, განავითარე“, ეს სამი სიტყვა გამოხატავს ყველაფერს. მივიღეთ წინაპრებისგან მემკვიდრეობით  ჩვენი უნიკალური კულტურა და ხელოვნება, ვიცავთ ყველაფერს და შესაბამისად სპეციალისტებთან ერთად ვსახავთ განვითარების ეტაპებს. ფაქტობრივად ეს არის ჩვენი მთავარი ფუნქცია.

-თქვენი გამოწვევა, სამომავლო გეგმები   თქვენს დაქვემდებარებაში მყოფი თითოეული სამსახურის შესახებ.

– ერთ-ერთი გამოწვევა, შეიძლება ითქვას, დიდი პრობლემა ყველა დარგში,  არის ინფრასტრუქტურა და ტექნიკური აღჭურვილობა. გვაქვს გარკვეული შეთანხმება მუნიციპალიტეტის ხელმძღვანელობასთან, რომ ეტაპობრივად ყველა შენობა, რაც ჩვენს დაქვემდებარებაშია, რეაბილიტირდება და შესაბამისად ტექნიკურადაც აღიჭურვება. წინააღმდეგ შემთხვევაში, სამწუხაროდ, არ გვექნება შედეგები.

რაც შეეხება შემოქმედებით პროცესს, ეს მრავალფეროვანია. სახელოვნებო დარგებში და ზოგადად, კულტურის სფეროებში ბიბლიოთეკები არის ერთ-ერთი ქვაკუთხედი კულტურისა. მსოფლიოში აღიარებულია და ყველაზე მნიშვნელოვანი ადგილი უჭირავს ლიტერატურას იმიტომ, რომ იგი იძლევა მრავალგვარი წარმოსახვისა და ფანტაზიის უნარს. ბიბლიოთეკას მნიშვნელოვანი ადგილი უჭირავს ბოლნისის კულტურის ცენტრში,  როგორც საგანმანათლებლო თვალსაზრისით, ასევე შემეცნებითი და პუბლიცისტური მიმართულებით, რომელსაც ძალიან ბევრი მომხმარებელი ჰყავს. მათ შორის უმეტესობას ახალგაზრდობა წარმოადგენს. როგორც ღრუბელი იწოვს ბევრ წყალს, ასევეა ცოდნას მოწყურებული ახალგაზრდები. ამიტომაც ყოველწლიურად, შეძლებისდაგვარად, ხდება ბიბლიოთეკების ტექნიკური გადაიარაღება და ამავდროულად წიგნების განახლება.

სამომავლოდ გვაქვს სურვილი კონკრეტული ლიტერატურული ნაწარმოებების აუდიო ვერსიები შევქმნათ და გამოვცეთ ჩვენი მსახიობების გახმოვანებით. მაგალითად სულხან-საბას იგავ-არაკები. ეს კარგად აპრობირებული მეთოდია სხვა წარმატებულ ქვეყნებში და საკმაოდ მოთხოვნადი. ამიტომ ვფიქრობთ, თუნდაც მხოლოდ მგზავრობის დროს, შესანიშნავი საშუალება იქნება ნაცვლად წაკითხვისა, რომელიმე წიგნი მოისმინო.

რაც შეეხება კულტურის განყოფილებაში შემავალ შემოქმედებით დარგებს, გვაქვს სამი კულტურის სახლი და ორი კლუბი, თითოეულ ამ დაწესებულებაში ფუნქციონირებს სახელოვნებო დარგები  მუსიკის, ქორეოგრაფიის, თეატრის სახვითი და გამოყენებითი ხელოვნების სახით. მინდა ცოტა ვრცლად გესაუბროთ ამ საკითხებზე.

არსებული არაფორმალური საგანმანათლებლო სისტემა გარდავქმენით შემდეგნაირად:

ყველაფერი დავყავით სამ კატეგორიად.

1. წრე – სამოყვარულო დაწესებულება,
2. სტუდია – დაწყებითი სკოლის ტიპის სივრცე, რომელიც ორიენტირებულია საგანმანათლებლო საფეხურების (სემესტრები) მიხედვით განვითარების ეტაპებზე გადასვლით და შესაბამისი ოფიციალური მოწმობის გაცემით.
3. საბავშვო ანსამბლები/ჯგუფები,  რომლებიც შექმნიან მუდმივად განახლებად თავიანთ რეპერტუარს ასევე მუდმივ განახლებადი ახალი წევრების ფონზე.
4. მუნიციპალური ანსამბლები და თოჯინების თეატრი. ამ მდგომარეობით ყველამ კარგად ვიცით, რომ ბოლნისის კულტურის სახლში გვყავს არაჩვეულებრივი ფოლკლორული ანსამბლები „სიონი“, „ორბელი“ და „ბოლნელა“. ასევე შესანიშნავი სივრცე განსაკუთრებით პატარებისთვის, რომელსაც ქვია თოჯინების თეატრი.

მესამე და მეოთხე პუნქტში ჩამოთვლილი ჯგუფები პერმანენტულად იღებენ მონაწილეობას სხვადასხვა სახის ღონისძიებაში და ასევე თავად მართავენ საანგარიშო კონცერტებს. ხოლო რაც შეეხება წრესა და სტუდიას, ისინი ვალდებულნი იქნებიან ღია გაკვეთილების სახით წარმოგვიდგინონ ის კონკრეტული შედეგები, რაც მოჰყვა მათ საგანმანათლებლო პროცესს.

მინდა შევჩერდე და უფრო ვრცლად განვმარტო რეორგანიზაციის შედეგები განსაკუთრებით 1, 2 და 3 პუნქტებში.

მოგეხსენებათ,  არსებული სიტუაცია გარკვეულწილად გადახალისებასა და ჩამოყალიბებას საჭიროებდა. კულტურის სახლებში არსებული საგანმანათლებლო პროცესი ფაქტობრივად მიბმულია ეროვნულ სასწავლო გეგმასთან, რაც დამეთანხმებით, რომ სავსებით ბუნებრივია. სასწავლო გეგმის მიხედვით სკოლაში სასწავლო პროცესი 9 კალენდარული თვე გრძელდება, ხოლო ჩვენთან იყო 10 თვე, რაც რეალობას გვაშორებდა და შედეგებიც შესაბამისი დგებოდა. ჩვენ ამ ეტაპზე დავეყრდენით  სამართლიანობის პრინციპებს, გავიარეთ უამრავი კონსულტაცია როგორც ჩვენს პედაგოგებთან, ასევე საქმის შესაბამის სპეციალისტებთან, გვქონდა გარკვეული კონსულტაციები სამინისტროს დეპარტამენტებთან, შესაბამის სახელმწიფო ინსტიტუციებთან და აქედან გამომდინარე შევცვალეთ და შედეგებზე ორიენტირებით დავადგინეთ შემდეგი:

1. წელიწადში, ნაცვლად 10 თვისა, (სექტემბრიდან ივნისის ჩათვლით) სწავლა გახდა 8 თვიანი. ორი სემესტრი (1 ოქტომბრიდან 30 დეკემბრის ჩათვლით და 15 იანვრიდან 15 ივნისის ჩათვლით)
2. წრე გახდა ფასიანი (გამომდინარე იქედან, რომ მხოლოდ თექის წრე დაგვრჩა, სადაც ამ ეტაპზე მოთხოვნა დიდი არაა, დროებით გავხადეთ უფასო თექის წრე.).
3. ზოგიერთი წრე პედაგოგებთან შეთანხმებით გახდა სტუდია, გამომდინარე მათი საქმიანობისა, დაევალათ მეთოდოლოგიის წარმოდგენა 2019 წლის ბოლომდე, რომლის მიხედვითაც თითოეულ სტუდიაში წარიმართება სასწავლო პროცესი. ყოველი თვის ბოლოს ჩავატარებთ ე.წ. მონიტორინგს, ყოველი სემესტრის ბოლოს ღია გაკვეთილს და სტუდიის დამამთავრებელ გამოცდასთან ერთად ჩავატარებთ კონცერტებს, ან შესაბამისად, გამოფენებს. ყველაზე მნიშვნელოვანი სიახლე ამ კუთხით გახლავთ ის, რომ ჩვენ ჩავატარებთ გამოცდას სტუდიის დამთავრების ბოლოს, შესაბამისი ინსტიტუციიდან მოვიწვევთ გამოცდილ სპეციალისტებს (მაგ: ტრადიციული მუსიკის სტუდიის გამოცდაზე მოვიწვევთ ფოლკლორის სახელმწიფო ცენტრის სპეციალისტს) და ჩვენს პედაგოგებთან ერთად შევაფასებთ მათ ცოდნას და გავცემთ სტუდიის დამამთავრებელ მოწმობას, სადაც ხელმომწერნი იქნებიან სწორედ ზემოთ თქმული სპეციალისტები.
4. საბავშვო ანსამბლები/ჯგუფები გათავისუფლდნენ გადასახადებისაგან, იმიტომ,  რომ მათ შესანიშნავ რესურსს ვიყენებთ ჩვენივე ღონისძიებებში და შესაბამისად, ბოლნისის გარეთ ჩატარებული ფესტივალ-კონკურსების სახით, ისინი უზარმაზარ სახელს გვიხვეჭენ ქვეყნის მასშტაბით.

ამ გარემოებებიდან გამომდინარე, წრეებისა და სტუდიის გადასახადები დარეგულირდა როგორც გითხარით, სამართლიანობის პრინციპით. დაინტერესებულ პირებს შეუძლია მოგვმართონ და  დეტალურად განვუმარტავთ ყველაფერს.

-მიმდინარე წელს იგეგმება ბოლნისის  მუზეუმის გახსნა, რა ეტაპზეა სამუშაოები და რა დატვირთვა ექნება?

– ერთ-ერთი მნიშვნელოვანი სიახლე, რაც მოხდება უახლოეს მომავალში, იქნება თანამედროვე სტანდარტების ახალი მუზეუმის გახსნა, რომელიც ბოლნისის სინამდვილეში იარსებებს. ეს იქნება ეროვნული მუზეუმის ე.წ. ფილიალი ქვემო ქართლში. ძირითადი ექსპოზიციები განთავსდება ჩვენი მხარეთმცოდნეობის მუზეუმის ექსპონატებით, მაგრამ ის არ იქნება მხოლოდ ბოლნისის, არამედ მხარეში არსებული არტე-ფაქტებისაგან შემდგარი სხვადასხვა საისტორიო მნიშვნელობის ნივთებით დაკომპლექტებული, იმ ტრადიციებით, რაც ოქროს მოპოვებასთან არის დაკავშირებული,  გერმანული მემკვიდრეობის კუთხით. აღსანიშნავია ისიც, რომ იარსებებს ლაბორატორია და ეყოლებათ შესაბამისი ექსპერტები, რომლებიც იმუშავებენ და გაამდიდრებენ მუზეუმს ახალი აღმოჩენებით. ამჟამად, ჩვენი მუზეუმიდან ახალ შენობაში ნივთების გადატანის პროცესი მიმდინარეობს, რომელსაც აკვირდებიან ეროვნული მუზეუმის სპეციალისტები.

-როგორც ვიცით, თქვენი სამომავლო გეგმები სულხან-საბა ორბელიანს უკავშირდება,  აღნიშნულთან დაკავშირებით გაქვთ ამბიციური გეგმები.

-ბოლნისის მუნიციპალიტეტში გვაქვს ერთ-ერთი გამორჩეული ქართველის ლიტერატურული მუზეუმი, სულხან-საბას ნამოსახლარ ადგილზე, სადაც გადაშლილია მთელი ისტორია დაბადებიდან-გარდაცვალებამდე.  გვაქვს ამბიციური სურვილი საარქივო მასალების და ფოტო არქივების მიხედვით შეიქმნას მინიატურული სასახლე, რომელიც წარმოაჩენს ძველ სახეს. სულხან-საბა არის ხიდი ევროპასა და საქართველოს შორის, ის არის ხიდი ცივილიზაციასა და გარდამავალ გლობალურ ეპოქას შორის. მის სახელს უკავშირდება უამრავი რამ საქართველოში. უნივერსიტეტები,  სკოლები, სხვადასხვა საგანმანათლებლო დაწესებულებები და ასევე ყველასათვის ცნობილი ლიტერატურული პრემია „საბა“, რაც უზარმაზარ დახმარებას უწევს თანამედროვე მწერლებს. გვაქვს იდეა ამ დაწესებულებებთან ურთიერთობას გარკვეული ოფიციალური სახე მივცეთ და პერმანენტულად ხდებოდეს მათთან სხვადასხვა ღონისძიებების დაგეგმვა. გვაქვს დიდი სურვილი, რაც შეიძლება მეტმა ადამიანმა იცოდეს სულხან-საბას ღვაწლისა და დანატოვარის შესახებ. ექსკლუზიური ინფორმაცია უნდა გაგიმჟღავნოთ. გასულ წელს საუბარი მქონდა მუნიციპალიტეტის მერთან, მოვიძიე შესაბამისი ინფორმაციაც და არის ამბიცია შევქმნათ მხატვრული ფილმი სულხან-საბა ორბელიანზე, ისე როგორც ეს მოხდა წმ. ექვთიმე თაყაიშვილის არაჩვეულებრივი  ფილმის „ექვთიმეს“ შემთხვევაში. ასევე სურვილი გვაქვს ფილმის ძირითადი ნაწილი გადაღებული იქნას ბოლნისის ტერიტორიაზე და გარკვეულ როლებში დაკავდნენ ადგილობრივი მსახიობები. რა თქმა უნდა ამ ყველაფერს შესაბამისად არჩეული რეჟისორი და გადამღები ჯგუფი გადაწყვეტს, თუმცა, ჩვენგან შეთავაზება იქნება. ამით მინიმუმ მოხდება ის, რომ ბოლნისის მუნიციპალიტეტის ცნობადობა ამაღლდება. ეს არის ამბიციური სურვილი, რომელსაც ვფიქრობთ, რომ მსვლელობა მიეცემა.

-კულტურის ცენტრში ერთ-ერთი სფეროა კულტურული მემკვიდრეობა, როგორ აპირებთ მუშაობას ამ მიმართულებით?

-დიახ, ერთი ძირითადი სფერო კულტურული მემკვიდრეობაა,  რომელიც როგორც ვიცით ორ ნაწილად იყოფა, მატერიალურ და არამატერიალურ ძეგლებად. ყველაფერი ის, რაც  წინაპრებისგან ზეპირი თუ ხელნაწერი ტრადიციით გადმოგვეცა და მათ ჩვენს სახელოვნებო დარგებში ვაკეთებთ, ეს თავისთავად არამატერიალური კულტურული მემკვიდრეობაა. სიმღერა, ცეკვა, მატყლის, ქვისა თუ ხის დამუშავება და ა. შ. ამ მიმართულებით ჩვენი განყოფილება საკმაოდ აქტიურადაა ჩართული და ვცდილობთ გარკვეული სიახლეებიც დავნერგოთ სააგენტოსთან ერთად. აღმოვაჩინეთ ქალბატონი, რომელიც ძველებურ ხალიჩებს ქსოვს, ასევე თეთრიწყაროს მუნიციპალიტეტში ხის ძველებური დაზგა, რომელსაც არანაირი ლითონის დეტალი არ გააჩნია და დღემდე მუშაობს. ეს არის ორი საუკუნის ნივთი, რომლის ფოტოც გვაქვს და რომელიც ერთ-ერთი მატერიალური მემკვიდრეობის ძეგლი იქნება. ბოლნისში არსებობს უნიკალური ნუმიზმატიკის მუზეუმი.   მატერიალურ-კულტურულ მემკვიდრეობას, რაც შეეხება ესაა, რითაც ჩვენ ვამაყობთ, რელიგიური ნაგებობები, ეკლესია-მონასტრები,  ლუთერანული ტაძარი და მეჩეთები, ციხე-კოშკები, უნიკალური ხიდები, საყოფაცხოვრებო დანიშნულების გერმანული სახლები და სარკოფაგები, რომელიც გარკვეულწილად ხელოვნების ნიმუშს წარმოადგენს. კულტურული მემკვიდრეობისა და ძეგლთა დაცვის განყოფილება, ორიენტირებულია და უკვე დაწყებულია თვეში ორჯერ  მონიტორინგი მატერიალური ძეგლებისა. მართლმადიდებლური ძეგლების თვალსაზრისით, ძალიან დიდი შედეგებია. უკვე 13 წელია, მეუფე ეფრემის ძალისხმევით, სწრაფად და ხარისხიანად შენდება ეკლესია-მონასტრები, რითაც ის ძალიან ეხმარება როგორც მუნიციპალიტეტს, ასევე ეროვნულ სააგენტოს. გერმანულ უბნებს, რაც შეეხება, როგორც ვიცით, იგეგმება რამდენიმე სახლის საპილოტე, საცდელად გაკეთდება, ისე როგორც ასურეთში გაკეთდა თეთრიწყაროს მუნიციპალიტეტისა და სხვადასხვა ფონდების ჩართულობით. გერმანულ უბანშივე მიმდინარეობს და მალე დასრულდება ერთ-ერთი უძველესი სკოლის სარეაბილიტაციო სამუშაოები. ეს არ არის მარტივი პროცესი. იმედი გვაქვს, რომ სახელმწიფო და არასამთავრობო ფონდები ისევ გააგრძელებენ მუშაობას და ამ კუთხით, არაერთი ძეგლი გვექნება აღდგენილი.

   მინდა ბევრი კუთხით გავშალო  ცენტრის საქმიანობა. თანამედროვე სამყარო სცნობს პროაქტიულ მენეჯმენტს, რაც გულისხმობს ორმხრივ შეთანხმებულ მოქმედებას როგორც ზემდგომებიდან, ასევე ქვემდგომებიდან. ამიტომ, როგორც კულტურის ცენტრის თანამშრომლებს, ასევე მოსახლეობასაც მინდა მივმართო თხოვნით, რომ ჩაერთონ ჩვენი განვითარების საქმეში. ჩემი ფსონი უმეტესწილად ახალგაზრდებში დაიდება, თუმცა სხვა ასაკობრივ კატეგორიასაც დიდი სიამოვნებით მოვუსმენ. ვაპირებ შევხვდე და ვესაუბრო ახალგაზრდებს პერმანენტულად, მოვისმინო ვის რა უნდა და როგორ წარმოუდგენია კულტურის ცენტრის მუშაობა და ზოგადად, მინდა მოვუსმინო ხალხს. ასევე ვაგრძელებთ ბრენდინგს, ვიწყებთ პიარ სტრატეგიაზე მუშაობას. უახლოეს მომავალში გვექნება ვებ გვერდი, რომლის მეშვეობითაც პერმანენტულად გავრცელდება სიახლეებიც და აღსრულებული საქმეებიც. და ბოლოს, ჩვენი მთავარი პრინციპია მივიღოთ მაქსიმალური შედეგები და გადავიდეთ განვითარების ახალ საფეხურებზე.

-მადლობა საინტერესო საუბრისთვის, გისურვებთ წარმატებებს.

ნონა ხუზმიაშვილი

პირველი იანვრიდან გაზრდილ სოციალურ პაკეტს, 114 ათასამდე შშმ პირი მიიღებს.
დევნილთა, შრომის, ჯანმრთელობისა და სოციალური დაცვის სამინისტროს ცნობით, საქართველოს 2020 წლის სახელმწიფო ბიუჯეტის შესახებ“ საქართველოს კანონით გათვალისწინებულია შეზღუდული შესაძლებლობის მქონე პირთა სოციალური პაკეტის ოდენობის ზრდა 20 ლარით.
ცვლილება შეეხება, ყველა კატეგორიის, მკვეთრად და მნიშვნელოვნად გამოხატული შეზღუდული შესაძლებლობის მქონე პირებს და შეზღუდული შესაძლებლობის მქონე ბავშვებს (18 წლამდე).
2020 წლის 1 იანვრიდან 20 ლარით გაზრდილ პენსიას მიიღებენ საპენსიო ასაკის მქონე პირებიც.
70 წელს ზემოთ პენსიონერებს, 18 წლამდე და პირველი ჯგუფის შშმ პირების პაკეტებზე 30 ლარიანი მატება მოხდება.
ახალი წლიდან, მთაში მცხოვრები, საპენსიო ასაკის პირები 220 ლარის ნაცვლად 264 ლარს მიიღებენ. 1 ივლისიდან კი 300 ლარს მიიღებენ, მთაში მცხოვრები ის პენსიონერები, რომელთა ასაკი 70 წელს აღემატება.

ქართული კულტურისა და ხელოვნების ქომაგის,  ბოლნისის მუნიციპალიტეტის განათლების, კულტურის და სპორტის სამსახურის უფროსის, კობა ჟღენტის ინიციატივით,  სამუსიკო სკოლის გაერთიანებული გუნდი,   ნინო დვალიშვილის ხელმძღვანელობით, ბოლნელ მთავარეპისკოპოსს,  მეუფე ეფრემს,  რეზიდენციაში ესტუმრა, დამდეგი შობა-ახალი წელი  მიულოცეს და საშობაო საგალობლები შეასრულეს.

მეუფე სამუსიკო სკოლის აღსაზრდელებს ეზოში მიეგება. აღნიშნა,  რომ ეს ბავშვები არიან  პირველები, ვინც მას  დამდეგი შობა-ახალი წელი მიულოცა.  მოსწავლეებმა როიალთან საშობაო საგალობლები  შეასრულეს. მეუფემ სამუსიკო სკოლის აღსაზრდელები, მათი პედაგოგი  და თითოეული სტუმარი  დალოცა და  ხატები უსახსოვრა.  

კობა ჟღენტი, ბოლნისის მუნიციპალიტეტის განათლების, კულტურის და სპორტის სამსახურის უფროსი:

სამუსიკო სკოლაში ყოველი საანგარიშო ჩვენება, რომელიც წელიწადში ორჯერ იმართება,  ძალიან საინტერესოა. მოვისმინე ამ გუნდის ნამღერი,  კიდევ უფრო   გალამაზებული რეპერტუარით, გადავწყვიტეთ მეუფემდე მიგვეტანა ეს შემოქმედებითი დოვლათი. არაჩვეულებრივი შეხვედრა იყო,  თბილი და ამაღელვებელი განწყობით ვტოვებთ მეუფის სამყოფელს, რომელიც, როგორც   თვითონ ბრძანებს,  არის თითოეული ბოლნისელის სახლი.  

მეუფე ეფრემი, ბოლნელი მთავარეპისკოპოსი: 

ეს არის უდიდესი სიხარული და ბედნიერება.  თითოეული ბავშვი  მიწიერი ანგელოზია, რაშიც კიდევ ერთხელ დავრწმუნდი. მინდა დავლოცო სამუსიკო სკოლის აღსაზრდელები, ქალბატონი ნინო დვალიშვილის ხელმძღვანელობით, ეს არის მართლაც არაჩვეულებრივი სულიერი ოჯახი, რომლებმაც დაგვატკბეს თავიანთი საგალობლებით, ახალი სიმღერებით და ასე მოგვილოცეს შობა- ახალი წელი, რაც  ყველაზე დიდი საჩუქარია. ვლოცავ და დარწმუნებული ვარ, წარმატებები ექნებათ ყველა ასპარეზზე. ღმერთმა დაგლოცოთ და გაგახაროთ.

ნინო დვალიშვილი, ზაურ ხუჯასძის სახელობის სამუსიკო სკოლის გაერთიანებული გუნდის ხორ- მეისტერი:

უპირველეს ყოვლისა, სრულიად საქართველოს ვულოცავ შობა- ახალ წელს, ჯანმრთელობა, ბედნიერება და მშვიდობა ყოფილიყოს თითოეულის ოჯახში. დღეს განსაკუთრებული დღე  გვაქვს, მეუფის რეზიდენციაში სტუმრობა  ჩვენთვის დიდი პატივია,  შევასრულეთ ანა კალანდაძის ულამაზესი საშობაო- საახალწლო სიმღერები. მეუფემ დაგვლოცა და დაასაჩუქრა  თითოეული ბავშვი და მისი  მშობელი.

მარიამ ისიანი,  სამუსიკო სკოლის გაერთიანებული გუნდის წევრი:

ჩემთვის  მნიშვნელოვანი დღე იყო,  ძალიან დიდი შვება ვიგრძენი მეუფესთან სტუმრობით. ვიმღერეთ საგალობლები  და  მივულოცეთ შობის დღესასწაული.  ეს დღე  ერთ-ერთი ყველაზე მნიშვნელოვანი  და დაუვიწყარი იქნება ჩემთვის. 

მარიამ კორტავა, სამუსიკო სკოლის გაერთიანებული გუნდის წევრი:

ძალიან კარგი და დაუვიწყარი დღე იყო, ვეწვიეთ მეუფე ეფრემს, ვიმღერეთ  საშობაო საგალობლები. დაგვლოცა მეუფემ და დაგვასაჩუქრა ტკბილეულით და ხატებით. 

გილოცავთ დამდეგ შობა-ახალ წელს!
ფეხბედნიერი ყოფილიყოს თითოეული ჩვენგანისთვის და სრულიად საქართველოსთვის ახალი 2020 წელი!
გისურვებთ მეტ სიკეთეს, სიხარულს,ჯანმრთელობას, მშვიდობასა და კეთილდღეობას.
მჯერა, რომ ახალი წელი ახალ შესაძლებლობებს მოიტანს და შევძლებთ ჩვენი ქვეყნის კიდევ უფრო განვითარებას!
2019 წელი გამოირჩეოდა მაღალი პოლიტიკური ტემპერატურით, თუმცა უამრავი გამოწვევის მიუხედავად, ჩვენმა ხელისუფლებამ შეძლო სირთულეებთან ღირსეული გამკლავება და სტაბილურობის შენარჩუნება.
მოგეხსენებათ, პარლამენტი 2019 წელს ახალი რეგლამენტით შეხვდა , რამაც უზრუნველყო პარლამენტის შესაძლებლობების განვითარება ზედამხედველობის სფეროში.
ჩვენი და ჩვენი საზოგადოების არჩევანი, რომ ევროპასთან ინტეგრაციაა, ამის დასტურია ისიც, რომ 14 დეკემბერს , სრულიად საქართველო გაერთიანდა და ერთად აღვნიშნეთ საქართველოს ევროსაბჭოს თავმჯდომარე ქვეყნად არჩევა. პარლამენტი კი მუშაობს კანონმდებლობის დახვეწაზე, რათა ჩვენი კანონმდებლობა, ევროპული კანონმდებლობის შესაბამისი გახდეს, რათქმაუნდა, ჩვენი ქვეყნისა და საზოგადოების ინტერესებზე მორგებით.

ამ წლის ერთ-ერთ მიღწევად მიმაჩნია, რომ პარლამენტმა თითოეული ჩვენგანის ძალისხმევით შევძელით 2020 წლის ბიუჯეტში გაზრდილიყო რეგიონული პროექტების განვითარების ფონდის დაფინანსება, მოგეხსენებათ, აღნიშნული ძალზედ მნიშვნელოვანია მუნიციპალიტეტების განვითარებისთვის.2019 წელს ბოლნისის მუნიციპალიტეტში განხორციელდა 10 174 618 ლარის ღირებულების 108 ინფრასტრუქტურული პროექტი, მათ შორის: 5 767 300 ლარის ღირებულების 19 ინფრასტრუქტურული პროექტი – საქართველოს რეგიონული განვითარების პროექტების ფონდის დაფინანსებით. პროექტების ფარგლებში, ადგილზე საგზაო ინფრასტრუქტურის მოწესრიგება და ამბულატორიების მშენებლობა-რეაბილიტაცია, სკოლებში საპირფარეშოების მოწყობის და რეაბილიტაციის სამუშაოები, სოფლის მხარდაჭერის პროგრამის ფარგლებში განსახორციელებელი პროექტები და სტიქიის პრევენციის მიზნით დაგეგმილი სამუშაოები განხორციელდა.

მიმაჩნია, რომ ჩვენთვის ეს წელი იყო საინტერესო და ნაყოფიერი, კიდევ ერთხელ დავინახეთ,რომ საზოგადოება გვენდობა, ხედავს და აფასებს ჩვენს მიერ გაწეულ საქმიანობას. მიმდინარე წელს აქტიური კომუნიკაცია გვქონდა მოსახლეობასთან, მიუხედავად იმისა, რომ მოქალაქეებთან ურთიერთობა არასდროს შეგვიწყვეტია, წელს მაინც ინტენსიურ რეჟიმში გავედით ყველა დასახლებულ პუნქტში, რათა თანამოქალაქეებისგან კიდევ ერთხელ გაგვეგო, თუ რა პრობლემები აწუხებთ და სხვადასხვა მოქმედი პროგრამების შესახებ მიგვეწოდებია მათთვის ინფორმაცია. ღია დიალოგის ფორმატში 65 საჯარო შეხვედრა გავმართე და 3000 ზე მეტ ადამიანთან შევძელი გასაუბრება. აქტიურად ვხვდებით და ვიღებთ მოქალაქეებს ბიუროშიც, მოქალაქეთა მიღების 7 დღე გავმართე, სადაც ინდივიდუალურად მოვისმინე 300-ამდე ადამიანის საჭიროება და შესაძლებლობების ფარგლებში აღმოვუჩინეთ დახმარება.

მოქალაქეებისათვის საცხოვრებელი პირობების გაუმჯობესება ჩვენი ერთ-ერთი პრიორიტეტული მიმართულებაა და მიმდინარე წელს, ამ მიზნით, ბოლნისის მუნიციპალიტეტის მერიამ 412 ოჯახს აღმოუჩინა დახმარება, რისთვისაც ადგილობრივი ბიუჯეტიდან 516 465 ლარი გაიხარჯა.

აღდგა და სარეაბილიტაციო სამუშაოები ჩაუტარდა:

▪️სტიქიის შედეგად დაზიანებული 362 სახლი -282 968 ლარი
▪️გადაიხურა შეჭირვებული ოჯახების 26 სახლი – 357 462 ლარი
▪️აღდგა დანგრეული 8 სახლი- 42 740
▪️ხანძრის შემდეგ რეაბილიტაცია ჩაუტარდა 10 სახლს- 89 465 ლარი
▪️ხანძრის შედეგად 6 ოჯახს დამხმარე ნაგებობები დაეწვა, აღნიშნულ ოჯახებს ზარალი მუნიციპალიტეტმა აუნაზღაურა-3 830 ლარის ოდენობით.

ჩვენ მოქალაქეებზე ზრუნვას, მათი საჭიროებების კვლევასა და მოსახლეობის ინტერესების გათვალისწინებას, სამომავლო საქმიანობაში, კვლავ გავაგრძელებთ. ნდობა, რომელსაც ადამიანებისგან ვგრძნობთ, მნიშვნელოვანია და გვაძლევს სტიმულს ძალისხმევა არ დავიშუროთ არსებული გამოწვევების დასაძლევად, რათა შევძლოთ გამოცხადებული ნდობის გამართლება .

28 დეკემბერს, ქ. თბილისში გაიმართა საქართველოს ჩემპიონატი ძიუდოში, სადაც ბოლნისელმა ფრიდონ გიგანმა 73 კგ. წონით კატეგორიაში ხუთი შეხვედრა ტრიუმფით დაასრულა და საქართველოს ჩემპიონის წოდება მეხუთედ მოიპოვა.
,,სვანური ფინალი“ შედგა ჩემსა და თორნიკე გვიჭიანს შორის, იგი ძალიან პერსპექტიული ახალგაზრდა სპორტსმენი და ღირსეული მეტოქეა. გახარებული და ბედნიერი ვარ მორიგი წარმატებით, მომავალში შევეცდები უფრო მეტად ვასახელო ჩემი ქვეყანა. ვისარგებლებ შემთხვევით და დამდეგ შობა-ახალ წელს სრულიად საქართველოს მივულოცავ, ვისურვებ მშვიდობიან და გაერთიანებულ ქვეყანაში გვეცხოვროს.აღნიშნა ფრიდონ გიგანმა.

ძვირფასო ბოლნისელებო, მალე 2020 წელი შემობრძანდება. მინდა ბოლნისსა და სრულიად საქართველოს ახალი წელი მივულოცო. თითოეული ოჯახისათვის ახალი წელი ბედნიერების, წარმატებისა და სტაბილურობის მომტანი ყოფილიყოს. რაც მთავარია, ჩვენს გულებში მშვიდობასა და სიკეთეს დაესადგურებინოს. სანამ ახალ  წელს ვიზეიმებთ, მუნიციპალიტეტში განხორციელებულ მნიშვნელოვან პროექტებსა და პროგრამებს მოკლედ შევაჯამებ. 

2019 წელი ყველა მიმართულებით განსაკუთრებით წარმატებული და ნაყოფიერი აღმოჩნდა ჩვენი მუნიციპალიტეტისათვის. 2019 წელმა თავი დაგვამახსოვრა  არაერთი მასშტაბური პროექტით, რომლებმაც ჩვენი მოქალაქეების საცხოვრებელი პირობები მნიშვნელოვნად გააუმჯობესა. აღსანიშნავია, რომ 2019 წელს ბოლნისის მუნიციპალიტეტმა შეძლო საკუთარი პოტენციალისა და გამოცდილების საერთაშორისო დონეზე გატანა და გაზიარება, რაც ბოლნისის მუნიციპალიტეტის განვითარებისათვის უდავოდ წინ გადადგმული ნაბიჯია. 

ბოლნისის მუნიციპალიტეტში 2019 წელს 10 575 440 ლარის ღირებულების 124 პროექტი განხორციელდა, რომელიც 100 %-ით არის შესრულებული. 

გთავაზობთ მოკლე ანგარიშს 2019 წელს ბოლნისის მუნიციპალიტეტში განხორციელებული მნიშვნელოვანი პროექტების შესახებ.

გზები, სანიაღვრე და საკანალიზაციო  სისტემები

2019 წელს ბოლნისის მუნიციპალიტეტში საგზაო ინფრასტრუქტურის მოწყობისათვის 4075 გრძივ მეტრზე 9 პროექტი 3 050 493 ლარის ღირებულებით განხორციელდა. ადგილობრივი ბაზალტით  ქ. ბოლნისის რამდენიმე ქუჩა მოიკირწყლა, სოფელ მუშევანში, ჭაპალაში, ცურტავში ბეტონის გზა, ხოლო ნახიდურსა და დარბაზში ასფალტო-ბეტონის გზა დაიგო. შარშან ბოლნისის მუნიციპალიტეტში სანიაღვრე ქსელის მოწყობისათვის 5 ლოკაციაზე  4628 გრძივი მეტრის მასშტაბური ინფრასტრუქტურული სამუშაოები განხორციელდა. მიმდინარე წელს ლადო ასათიანის და კონსტანტინე გამსახურდიას ქუჩებს შორის ჩამომავალი სანიაღვრე ხევის სრული რეაბილიტაცია განხორციელდა და წლების განმავლობაში არსებული პრობლემა მოგვარდა. ახლა უკვე უხვი ნალექის დროს მოსახლეობის კარ-მიდამოებს საფრთხე აღარ დაემუქრება.  სარეაბილიტაციო სამუშაოები განხორციელდა იაკობ ცურტაველისა და მერაბ კოსტავას ქუჩებს შორის ჩამომავალ სანიაღვრე ხევში. სანიაღვრე ქსელი მოეწყო დიმა ლაზარეშვილის ქუჩაზე და სოფელ ბალიჭში. აღსანიშნავია, რომ მიმდინარე წელს დაბა კაზრეთში საავტომობილო გზის მიმდებარედ სანიაღვრე კიუვეტები მოეწყო. ამ სამუშაოებისთვის 2019 წელს ჯამში 1864052 თანხა დაიხარჯა. შარშან დაბა კაზრეთსა და ქალაქ ბოლნისში 86957 ლარის ღირებულების საკანალიზაციო ქსელის მოწყობის სამუშაოებიც განვახორციელეთ. 

სასმელი წყლის რეაბილიტაცია

წელს ხატისოფელში წყლის ტუმბო გამოიცვალა. ახალი დანადგარის საშუალებით 80 ტონიანი რეზერვუარის შევსებაა შესაძლებელი. ახალი ტუმბო დამონტაჟდა ცურტავშიც, რის შედეგადაც წყლის მიწოდება სოფლის განაპირა ტერიტორიაზე მცხოვრები მოსახლეობისათვისაც ხელმისაწვდომი გახდა.

დაბა კაზრეთში ლიფტების მოწყობა

დაბა კაზრეთში ათეული წლის მანძილზე არსებული პრობლემა მოიხსნა. ცხრასართულიანი ბინების მცხოვრებლებს ლიფტების არარსებობა დიდ პრობლემას უქმნიდა, განსაკუთრებით შეზღუდული შესაძლებლობების მქონე პირებსა და ხანდაზმულებს. 2016 წელს დაიწყო და მიმდინარე წელს დასრულდა ლიფტების დამონტაჟების სამუშაოები, რის შედეგადაც 68 სადარბაზოში, ბელარუსში წარმოებული 25 წლიანი საქარხნო გარანტიის ლიფტი დამონტაჟდა. სამუშაოები 3 წლის მანძილზე, ეტაპობრივად მიმდინარეობდა და 68-დან 4 კომპანია RMG აღადგინა, დანარჩენი- რეგიონებში განსახორციელებელი პროექტების ფონდისა და ადგილობრივი თვითმმართველობის ფინანსური მხარდაჭერით გაკეთდა. ლიფტების შახტების კეთილმოწყობის სამუშაოებზე 3 მილიონნახევრამდე ლარი დაიხარჯა. 

ამბულატორიები

უმნიშვნელოვანესია ჩვენმა მოქალაქეებმა პირველადი სამედიცინო დახმარება დროულად მიიღონ. ამიტომ 2019 წელს ბოლნისის მუნიცპალიტეტმა ექვს სოფელში ამბულატორიების რეაბილიტაცია განახორციელა. ხატისოფელში კი სრულიად ახალი ამბულატორია აშენდა. ამ სამუშაოებისათვის ჯამში 172 753 ლარი დაიხარჯა. 

შეჭირვებული ოჯახების სახლების სახურავების გადახურვა

სოციალურად დაუცველი, შეჭირვებული ოჯახების ზრუნვა ჩვენი უპირველესი მოვალეობაა. ბოლნისის მუნიციპალიტეტში ამ კუთხით არაერთი სოციალური პროგრამა მოქმედებს. წელს 26 ოჯახს დაზიანებული სახლის სახურავი შევუცვალეთ. ამ სამუშაოებისათვის ჯამში 327 960 ლარი დაიხარჯა. ეს პროგრამა განსაკუთრებით მნიშვნელოვანია, რადგან ზოგიერთ ოჯახს წვიმიან ამინდში სახლში წყალი ჩასდიოდა და მცირეწლოვანი ბავშვების ჯანმრთელობას საფრთხე ექმნებოდა.

სოციალური პროექტები

ბოლნისის მუნიციპალიტეტს ნათლად აქვს გააზრებული მისი სოციალური პასუხისმგებლობა. სოციალური პროგრამებისთვის ჩვენი ბიუჯეტის მნიშვნელოვანი ნაწილი იხარჯება. ამ მიმართულებით 2019 წელს მოსახლეობას არაერთი პროგრამა შევთავაზეთ, მათ შორის: ავადმყოფთა მედიკამენტებით უზრუნველყოფა, სოციალურად დაუცველი არასრულწლოვანთა ლოგოპედის მომსახურებით უზრუნველყოფა, რეიტეგრირებული ბავშვების ყოველთვიური დახმარებები, სოციალურად დაუცველი ოჯახების გათბობის სეზონზე მატერიალური დახმარებით უზრუნველყოფა, ბინის ქირით უზრუნველყოფა, სოციალურ საცხოვრისებში მცხოვრები ოჯახებისთვის კომუნალური გადასახადებით უზრუნველყოფა, სტუდენტთა ყოველთვიური დახმარებები, სხვადასხვა დაავადებების მქონე მოქალაქის მკურნალობით უზრუნველყოფა, ომის ვეტერანთა და მათთან გათანაბრებულ პირთა დახმარება, ერთჯერადი დახმარებები(2 930 ბენეფიციარი), სარიტუალო მომსახურება, სტიქიის შედეგად მიყენებული ზიანის ანაზღაურება, მუნიციპალური ტრანსპორტით მგზავრობის შეღავათები. საერთო ჯამში მიმიდანარე წელს სოციალურ და ჯანდაცვის პროექტებში 4 329 734.70 ლარი დაიხარჯა. 

ბოლნისი-საუკეთესო პრაქტიკის მქონე მუნიციპალიტეტი

 ბოლნისი  საქართველოში საუკეთესო პრაქტიკის მქონე მუნიციპალიტეტი კიდევ ერთხელ გახდა.  საქართველოს ადგილობრივ თვითმმართველობათა ეროვნულმა ასოციაციამ ევროკავშირის პროექტის – N4ED ფარგლებში, 2019 წლის საუკეთესო პრაქტიკის კონკურსის გამარჯვებულებს შორის ბოლნისიც დაასახელა. მერიის პროექტი, რომელიც შშმ პირებს სხვადასხვა სერვისებს სთავაზობს, ნომინაციაში “მუნიციპალური სოციალური პროგრამები მოწყვლადი ჯგუფებისთვის” საქართველოს ადგილობრივ თვითმმართველობათა ეროვნულმა ასოციაციამ საუკეთესოდ აღიარა. ვფიქრობ, ამ ნომინაციაში გამარჯვება ჩვენთვის ერთგვარი დასტურია, რომ მუნიციპალიტეტი განვითარების სწორ გზას ადგას.

ადგილობრივ თვითმმართველობათა ეროვნულმა  ასოციაციამ ბოლნისი, როგორც საუკეთესო პრაქტიკის მქონე მუნიციპალიტეტი პირველად შარშან დააჯილდოვა, ბოლნისის მუნიციპალიტეტის ადგილობრივი ეკონომიკური განვითარების გეგმის შემუშვებისათვის.

ახალგაზრდების ხელშეწყობა

ქვეყნის სტაბილური განვითარებისთვის აუცილებელია ახალი თაობის ხელშეწყობა. ბოლნისი ერთადერთი თუ არა ერთ-ერთია იმ მუნიციპალიტეტებს შორის, რომელიც სტუდენტებს ყოველთვიურ სტიპენდიებს ურიცხავს. ბოლნისის მუნიციპალიტეტმა წელს 200-მდე სტუდენტის სტიპენდიით უზრუნველყოფა შეძლო, ახალგაზრდები ყოველთვიურად 50 ლარიდან 100 ლარის ოდენობით ფინანსდებიან. ამ პროექტისთვის 2019 წელს 77 500 ლარი დაიხარჯა. ყოველთვიურად ფინანსდებიან ასევე სპორტსმენები და წარმატებული ხელოვანები. ეს სტიპენდიები ვფიქრობ, ჩვენი ახალგაზრდების მოტივაციას აორმაგებს, რაც სამომავლოდ  წარმატებულ და განათლებული ახალგაზრდა თაობის გვაძლევს.

განათლება

მიმდინარე წელს ბოლნისის მუნიციპალიტეტის 10 სკოლაში მოეწყო სველი წერტილები, გამოიცვალა კარ-ფანჯარა. სოფელ რატევნის საჯარო სკოლაში ასევე დამონტაჟდა ცენტრალური გათბობა, შეიცვალა შენობის გადახურვა, გაკეთდა ადაპტირებული საპირფარეშო. სკოლების რეაბილიტაციისთვის 2019 წელს ჯამში 848 991 ლარი დაიხარჯა. განათლება ჩვენთვის ყოველთვის პრიორიტეტული მიმართულებაა, ამიტომ ამ მხრივ 2020 წელსაც არაერთ მნიშვნელოვან პროექტს განვახორციელებთ. აღსანიშნავია, რომ მომავალ წელს სოფელ ზვარეთში მოსწავლეები ახალ სკოლაში ისწავლიან. 60 ბავშვზე გათვლილი სკოლა თანამედოვე სტანდარტებთან იქნება შესაბამისი. სასწავლო დაწესებულების ეზოში ასევე მინი სტადიონის მშენებლობაც მიმდინარეობს. სამუშაოები მუნიციპალური განვითარების ფონდის დაფინანსებით ხორციელდება, რომლის ღირებულება მილიონ ლარზე მეტია. მოხარული ვარ, რომ ზვართში სკოლის მრავალწლიანი პრობლემა სწორედ ჩვენი ხელისუფლების დროს გვარდება.

საბავშვო ბაღები

წელს ბოლნისის მუნიციპალიტეტს კიდევ ერთი რეაბილიტირებული საბავშვო ბაღი შეემატა. N მე-4 საბავშვო ბაგა-ბაღი უკვე შეესაბამება თანამედროვე სტანდარტებს. ინფრასტრუქტურული სამუშაოების ფარგლებში მოეწყო სველი წერტილები, ეზო, გამოიცვალა სახურავი, განახლდა ბაღის ინვენტარი. სამუშაოები რეგიონში გასახორციელებელი ფონდისა და ადგილობრივი ბიუჯეტის დაფინანსებით განხორციელდა. პროექტის სრულმა ღირებულებამ 418470 ლარი შეადგინა. ახლადრეაბილიტირებული ბაგა-ბაღი 100 ბავშვზეა გათვლილი. 

ევროკავშირის გრანტი

გასულ წელს ბოლნისისი მუნიციპალიტეტმა ევროკავშირის გრანტი მოიპოვა. 2019 წელს კი გრანტის ფარგლებში უკვე აშენდა „აგროცენტრი“, რომელიც იანვარში დაიწყებს ფერმერთა მოსახურებას. „ბოლნისქალაქობაზე“ კი საზეიმოდ გავხსენით თამაზ სტეფანიას სახელობის ქუჩა, რომელზეც ქვაფენილი დაიგო, მოწესრიგდა საკანალიზაციო, სანიაღვრე ქსელი და მოეწყო ტროტუარები. პროექტის „ბოლნისში ბიზნეს საქმიანობის ეფექტური პლატფორმის ჩამოყალიბება“ საერთო ბიუჯეტი  380 000 ევროა, აქედან ბოლნისის მუნიციპალიტეტის კონტრიბუცია შეადგენს 60 000 ევროს. პროექტის მიზანია ბოლნისის მუნიციპალიტეტში ბიზნესის განვითარება და ბიზნესგარემოს გაუმჯობესების სტიმულირება, მყარ ინფრასტრუქტურასა და მეწარმეთა ბიზნეს ადმინისტრირების უნარ-ჩვევების გაუმჯობესებაში თანხების ინვესტირებით.

იუსტიციის სახლი

წელს ერთ-ერთი უმნიშვნელოვანესი ინფრასტუქტურული პროექტი ბოლნისში იუსტიციის სახლის აშენება იყო. ჩვენი მოქალაქეები 450-ზე მეტ სახელმწიფო სერვისს ერთ სივრცეში მიიღებენ.  იუსტიციის სახლის ბოლნისში გახსნა ნათლად ადასტურებს მუნიციპალიტეტსა და ცენტრალურ მთავრობას შორის მჭიდრო და ნაყოფიერ თანამშრომლობას.

ტურიზმი

ბოლნისის მუნიციპალიტეტს დიდი პოტენციალი აქვს ქვემო ქართლის ტურისტულ ცენტრად იქცეს. მიგვაჩნია, რომ ბოლნისში ტურიზმის განვითარება ხელს შეუწყობს ჩვენი ეკონომიკური შესაძლებლობების კიდევ უფრო მეტად გაზრდას. ამიტომ 2019 წელს ამ მიმართულებით ჩვენ არაერთი მნიშვნელოვანი ნაბიჯი გადავდგით. ჩვენს საერთაშორისო პარტნიორებთან  აქტიური თანამშრომლობის შედეგად და დარგის ექსპერტების ჩართულობით, ევროკავშირი დაგვეხმარა „კატარინენფელდის განვითარების მარკეტინგული სტარტეგია“ შეგვემუშავებინა, რომელიც ხელს შეუწყობს მუნიციპალიტეტის ტურიზმისა და ეკონიმიკის სწრაფ განვითარებას. 

ბოლნისის მუნიციპალიტეტი ტურიზმის განვითარების მიზნით არაერთ ღონისძიებას გეგმავს. ბოლო რამდენიმე წელია ჩვენს ქალაქში „ბოლნისქალაქობას“ აღვნიშნავთ. წელს „ბოლნისქალაქობა“ ტრადიციულად ბოლნისის ისტორიულ უბანში გრანდიოზულად ვიზეიმეთ. აღსანიშნავია, რომ ეს დღე ადგილობრივ ხელოვანებსა და მეწარმეებს საშუალებას აძლევთ თავიანთი ნამუშევრებსა და ნაწარმს პოპულარიზაცია გაუკეთონ. ეს კი მათი საქმიანობისთვის უდავოდ მნიშვნელოვანი ხელშეწყობაა. 

ჩვენს მუნიციპალიტეტში ასევე დიდი ყურადღება ექცევა აგროტურიზმს. 2019 წელი ამ მხრივ უდავოდ გამორჩეული გამოდგა. წელს ბოლნისმა მიკროზონის სტატუსი მიიღო და მეღვინეებს ადგილწარმოშობის დასახელების ღვინის “ღვინო ბოლნისის” წარმოება შეეძლებათ. ბოლნისურ  ღვინოებს საერთაშორისო და ადგილობრივ ფესტივალებზე ოქროს, ვერცხლისა და ბრინჯაოს არაერთი მედალი აქვს მიღებული და ჩვენი პროდუქცია განსაკუთრებული გემოვნური თვისებებით გამოირჩევა. ადგილობრივი მარნები და ღვინო საშუალებას გვაძლევს ჩვენი ქალაქი ტურისტებისთვის  კიდევ უფრო მიმზიდველი გავხადოთ. 

წელს დასრულდა ბოლნისის მხარეთმცოდნეობის მუზეობის მშენებლობა, სადაც ქვემო ქართლის მასშტაბით არსებული არტეფაქტები იქნება წარმოდგენილი. მუზეუმში ასევე საგამოფენო სივრცე და თანამედროვე სტანდარტების საკონფერენციო დარბაზია მოწყობილი, რაც საერთაშორისო მასშტაბის გამოფენებისა და სამეცნიერო ღონისძიებების გამართვის შესაძლებლობას გვაძლევს. ბოლნისის მუზეუმი თავისი კონცეფციით საქართველოში ერთ-ერთი საუკეთესოა და ვიმედოვნებთ, რომ ეს სივრცე ტურისტებსაც დააინტერესებთ. 

ბოლნისის პირველი საერთაშორისო ფორუმი

2019 წელს ვუმასპინძლეთ სოფლის მეურნეობის პირველ  საერთაშორისო ფორუმს ,,ადგილობრივი ხელისუფლებები ახალი ეკონომიკური შესაძლებლობებისთვის, სოფლის მეურნეობაში და სოფლად“, რომელიც გულისხმობს აღმოსავლეთ პარტნიორობის ქვეყნებში გამოცდილების გაზიარებას ადგილობრივ თვითმმართველობებს, ბიზნეს სექტორს, სამოქალაქო საზოგადოებას და ექსპერტებს შორის. ამ რამდენიმე დღემ ჩვენი ქალაქი აღმოსავლეთ პარტნიორობის ქვეყნების ეკონომიკურ ცენტრად აქცია. მსგავსი ტიპის ყოველწლიური ფორუმი გვეხმარება განვავითაროთ ჩვენი ეკონომიკური შესაძლებლობები და დარგის სპეციალისტებისგან რჩევები მივიღოთ. ეს ასევე საშუალებას გვაძლევს ბოლნისის მუნიციპალიტეტის ცნობადობა სხვადასხვა მიმართულებით საერთაშორისო დონეზე გავზარდოთ. 

სპორტის ხელშეწყობა

სპორტული ინფრასტრუქტურის მოწყობა ახალი თაობის ჯანსაღი განვითარების პროცესში უმნიშვნელოვანესია. ამიტომ ჩვენ ყოველთვის ვცდილობთ ამ მხრივ არაერთი პროექტი განვახორციელოთ. 2019 წელს ქალაქ ბოლნისში 2 სპორტული მოედანი გაკეთდა, რომელთა საერთო ღირებულებამაც 91 168 ლარი შეადგინა. მინი სტადიონი მოვაწყვეთ ასევე სოფელ დისველშიც. ადგილობრივი ბიუჯეტის დაფინასებით წელს რეაბილიტაცია დაბა კაზრეთში მდებარე საჭიდაო დარბაზს ჩაუტარდა.  ობიექტზე შეიცვალა იატაკი, გარემონტდა გასახდელები, მოეწყო საშხაპეები და დამონტაჟდა ცენტრალური გათბობის სისტემა.

კულტურის ხელშეწყობა

ბოლნისის მუნიციპალიტეტი ყოველთვის გამოირჩევა თავისი კულტურული ცხოვრებით. ჩვენი მუნიციპალიტეტი თავს  ყოველთვის იწონებს ფოლკლორული ანსამბლებით, თეატრით, როკ ბენდით, თოჯინების თაეტრით. დამეთანხმებით, რომ მუნიციპალიტეტების უმრავლესობა შემოქმედებითი წრეების ასეთი მრავალფეროვნებით არ გამოირჩევა. ჩვენი მუნიციპალიტეტისთვის უმნიშვნელოვანესი დღესასწაულია „საბაობა“.  სულხან-საბა ორბელიანის 361-ე იუბილე წელს განსხვავებული ფორმატით აღვნიშნეთ. 

2019 წელი ჩვენი მუნიციპალიტეტისთვის წარმატებული გამოდგა. ინფრასტრუქტურული პროექტები 100%-ით შესრულდა, რის დამსახურებითაც  ჩვენ რეგიონის ერთ-ერთი ლიდერი მუნიციპალიტეტი ვართ. პირადად მე და ჩვენი გუნდი მოწადინებულია მოქალაქეებს კომფორტული საცხოვრებელი პირობები შევუქმნათ. მჯერა, რომ დასახულ მიზნებს, ერთობლივი მუშაობით აუცილებლად მივაღწევთ. 2020 წელს ბოლნისის დასავლეთ ნაწილში 22 კილომეტრიანი საკანალიზაციო სისტემა მოეწყობა და ქალაქის მოსახლეობას კანალიზაციის პრობლემა სრულად მოუგვარდება.2020 წელს ასევე გაგრძელდება ქ. ბოლნისში არსებული გზების ქვაფენილით მოკირწყვლის სამუშაოები.  მომავალი წლის ბიუჯეტში მუნიციპალიტეტის გამოწვევები და მოქლაქეების საჭიროებები მაქსიმალურადაა ასახული, ამიტომ მჯერა, რომ 2020 წელი ბოლნისის მუნიციპალიტეტის განვითარების საქმეში კიდევ ერთი წინ გადადმული ნაბიჯი იქნება. 

პატარების წინა საახალწლო განწყობაზე წელს  განსაკუთრებით იზრუნა კულტურის სახლთან არსებულმა თოჯინების თეატრმა. თითქმის ერთი საათის განმავლობაში, პატარა მაყურებელს ჯადოსნურ სამყაროში მოუწია მოგზაურობა, სადაც საშობაო მასკარადზე ნამდვილი სასწაულები ხდება და არარეალური პერსონაჟები ნამდვილ გმირებად გადაიქცევიან. სპექტაკლის ჩვენების შემდეგ მაყურებლისთვის მომღერლებმა გიორგი აბდუშელიშვილმა და სალომე წიქორიძემ საშობაო სიმღერები შეასრულეს, პატარებისთვის ასევე მოეწყო  კარაოკე.

საშობაო ზღაპრის ჩვენება 24 დეკემბერს დაიწყო და 27 დეკემბერს დასრულდა. მაყურებელთა  დიდი მოთხოვნით კი ,,მელია დედობილის საშობაო ზღაპარის“ ჩვენება ახალი წლის შემდეგ გამეორდება.