დღეს ბოლნისელებმა, უკანასკნელ გზაზე, კიდევ ერთი ღირსეული ადამიანი გააცილეს.

მას მთელი ქალაქი იცნობდა და პატივს სცემდა.  თავისუფალი ჭიდაობა, სპორტის განვითარება და ახალგაზრდების აქტიური ცხოვრება, ბატონ აკაკი ქუქჩიშვილთან სამუდამოდ დაკავშირდა. მას უყვარდა თავისი საქმე და დიდი პასუხისმგებლობით ეკიდებოდა ახალგაზრდების აღზრდა განვითარებას.  მთელი ცხოვრება და მოღვაწეობა ბოლნისის სიყვარულთან იყო დაკავშირებული, სწორედ ამიტომ, განსაკუთრებით გაახარა ბოლნისის საპატიო მოქალაქის სტატუსმა, რომელიც 80 წლის ასაკში მიენიჭა.

აკაკი ქუქჩიშვილი დაიბადა 1935 წელს ახალქალაქში, 1944 წელს, ოჯახთან ერთად, ბოლნისში გადმოვიდა საცხოვრებლად, წარმატებული თავისუფალ მოჭიდავე, იყო საზოგადოება ,,სპარტაკის“ მწვრთნელი, 1964 წელს ბოლნისში დააარსა  პირველი სექცია თავისუფალ ჭიდაობაში და მას შემდეგ  აღზარდა მრავალი სპორტის ოსტატი, საქართველოს ჩემპიონი, საკავშირო ტურნირის გამარჯვებული, ევროპისა და მსოფლიოს პრიზიორი. მიღებული აქვს უამრავი ჯილდო, მედალი, სიგელი, იყო საბჭოთა კავშირის სპორტის ოსტატი, ღირსების ორდენის კავალერი, საქართველოს სპორტის დამსახურებული მუშაკი.

ბოლნისის კოლორიტი და სპორტის ბერმუხა, დღეს ბოლნისელებმა სამუდამო განსასვენებელში გააცილეს. გაზეთი ბოლნისი მწუხარებას გამოთქვამს აკაკი ქუქჩიშვილის გარდაცვალების გამო და იზიარებს ოჯახის ტკივილს.

ბოლნისის მუნიციპალიტეტის მერმა დავით შერაზადიშვილმა, საგანმანათლებლო და სამეცნიერო ინფრასტრუქტურის სააგენტოს წარმომადგენლებთან სამუშაო შეხვედრა გამართა.

ბოლნისის მუნიციპალიტეტში პროფესიული კოლეჯის დაფუძნება და შრომის ბაზარზე მოთხოვნადი პროფესიების განვითარება იგეგმება.

შეხვედრაზე საგანმანათლებლო და სამეცნიერო ინფრასტრუქტურის სააგენტოს წარმომადგენლებმა მერს კოლეჯის კონცეფცია გააცნეს, შემდგომ კი მხარეებმა ერთობლივად ის მიწის ნაკვეთები დაათვალიერეს, სადაც შესაძლებელი იქნება პროფესიული სასწავლებლის აშენება.

„ საგანმანათლებლო და სამეცნიერო ინფრასტრუქტურის სააგენტოს წარმომადგენლებთან საინტერესო შეხვედრა გვქონდა. ჩვენს მუნიციპალიტეტში პროფესიული კოლექჯის აშენება იგეგმება და ამ მნიშვნელოვანი პროექტის შესახებ დეტალურად ვისაუბრეთ. კოლეჯი ჩვენს მოქალაქეებს საშუალებას მისცემს სხვადასხვა პროფესიას დაეუფლონ და შრომის ბაზარზე კონკურენტურანიანი კადრები გახდნენ. პროფესიული განათლების განვითარება ჩვენი სახელმწიფოს ერთ-ერთი პრიორიტეტია და ამ პროცესში ბოლნისის მუნიციპალიტეტი თავის წვლილსაც აუცილებლად შეიტანს“, – განაცხადა ბოლნისის მუნიციპალიტეტის მერმა დავით შერაზადიშვილმა.

15 ნოემბერს საქართველოს ეროვნული ინტელექტ-ჩემპიონატი „ეტალონის“ ბოლნისის დისტანციური კონკურსის ფარგლებში 2021 წლის „ბოლნისის ეტალონი მოსწავლე“ გამოვლინდა. ტიტული აკაურთის საჯარო სკოლის VIII კლასის მოსწავლე არზუ ხალილოვამ მოიპოვა.

შეგახსენებთ, რომ კონკურსის პირველი ეტაპი ტესტირების სპეციალური პორტალის საშუალებით გაიმართა, რომლის შედეგების მიხედვით შეირჩნენ ის მოსწავლეები, რომლებიც ერთმანეთს შემდგომში „ბოლნისის ეტალონი მოსწავლის“ ტიტულისთვის შეეჯიბრნენ.

ინტელექტ-ჩემპიონატში მონაწილე ყველა ბოლნისელი მოსწავლე „ეტალონისა“ და ბოლნისის მუნიციპალიტეტის მერიისაგან სპეციალური ონლაინ სიგელით, ხოლო მეორე ეტაპში – ონლაინ ოქროს სიგელით დაჯილდოვდა. ინტელექტუალური კონკურსი ბოლნისის მუნიციპალიტეტის მერიის მხარდაჭერით იმართება.

გთავაზობთ კონკურსის მეორე ეტაპის ყველაზე მაღალქულიან მონაწილეთა რეიტინგს:

კომპანია არემჯიმ, სამთო-გეოლოგიური ტექნოლოგიების ცენტრში, სტუ-ს სტუდენტებისთვის ინდივიდუალური განვითარების პროგრამის პრეზენტაცია გამართა.  პროექტის ფარგლებში, კონკურსისა და ორ ეტაპიანი გასაუბრების შედეგად შერჩეულ სტუდენტებს,  არემჯის ადამიანური რესურსების მართვის დეპარტამენტი,  მათ კომპეტენციებსა და ინტერესებზე მორგებულ დუალური სწავლების დროში გაწერილ გეგმას შესთავაზებს. 

ამის შესახებ, კომპანიის აღმასრულებელი დირექტორის მოადგილემ, ადამიანური რესურსების მართვის საკითხებში გიორგი ჩხეიძემ ისაუბრა და სტუდენტებს პროექტში ჩართვისაკენ მოუწოდა. 

„ვფიქრობ, რომ სტუდენტებისთვის ეს არის ძალიან კარგი შესაძლებლობა, გაეცნონ არა მხოლოდ მათ მიერ არჩეულ პროფესიებს, არამედ  ჩვენი კომპანიის მუშაობის სრულ ციკლს და ცალკეული სამსახურების მუშაობის სპეციფიკას. პირობითად, 1 წლის თავზე პროექტის მონაწილეს აქვს სრული წარმოდგენა თუ როგორ ხდება სასარგებლო წიაღისეულის მოპოვება, მისი გადამუშავება და რეალიზაცია. რა როლი აქვს ყოველდღიურ საქმიანობაში შრომის უსაფრთხოებას და გარემოს დაცვის ასპექტებს და სხვა.“- განმარტა ჩხეიძემ.

არემჯის ინდივიდუალური განვითარების პროექტში 2020 წელს 5 სტუდენტი ჩაერთო, რომლებმაც წარმატებით გაიარეს სპეციალურად მათთვის შედგენილი სასწავლო პროგრამა და დღეს კომპანიაში არიან დასაქმებული. პროექტის ფარგლებში მონაწილის ინდივიდუალურ განვითარებას საშუალოდ 1 წელი დაეთმობა და მისი მიმდინარეობისას სტუდენტები ანაზღაურებას მიიღებენ.

მერი ლეკიშვილი – გეოლოგიის ფაკულტეტის სტუდენტი: „ვარ გეოლოგიის ფაკულტეტის მე-3 კურსის სტუდენტი. პროექტის შესახებ პროფესორ-მასწავლებლებისაგან შევიტყვე.  ვფიქრობ, ინდივიდუალური განვითარების პროგრამა ძალიან მაგარი შესაძლებლობაა, ჩვენი მომავალი  პროფესიული  განვითარებისთვის. როგორც პრეზენტაციაზე მოვისმინე, პროექტის ფარგლებში შერჩეული სტუდენტებისთვის შედგება ძალიან მრავალფეროვანი და საინტერესო განვითარების გეგმა. ძალიან დამაინტერესა შრომის უსაფრთხოების და ეკოლოგიის მიმართულებით ცოდნის მიღების შესაძლებლობამ. 

ლევან რატიანი – ქიმიური ტექნოლოგიების და მეტალურგიის ფაკულტეტის სტუდენტი: „ ვარ არემჯის 2021 წლის სტიპენდიანტი, პარალელურად გავდივარ პრაქტიკას კომპანიის გეოლოგიურ ლაბორატორიაში. იმ დღიდან, რაც კომპანიაში მოვხვდი ძალიან მაინტერესებს რა ხდება სხვა ლაბორატორიებში, სურვილი მქონდა მათი დათვალიერების და სრული ტექნოლოგიური ციკლის გაცნობის. ვფიქრობ ეს პროექტი ზუსტად ჩემნაირი ცნობისმოყვარე ადამიანებისთვის არის. აუცილებლად მივიღებ მონაწილეობას და დიდი იმედი მაქვს, რომ ინდივიდუალური განვითარების პროექტის ერთ-ერთი მონაწილეც გავხდები.“

 არემჯის ინდივიდუალური განვითარების პროგრამაში მონაწილეობა შეუძლიათ საქართველოს ტექნიკური უნივერსიტეტის ტექნიკური მიმართულების სტუდენტებს. მათ 2021 წლის 29 ნოემბრის ჩათვლით უნდა გამოაგზავნონ პირადი მონაცემები, აკადემიური მოსწრების ბარათი და სამოტივაციო წერილი ელექტრონულ მისამართზე scholarship@richmetalsgroup.com                                                

საქართველოს პარლამენტში ბოლნისის, დმანისის, თეთრიწყაროსა და წალკის მაჟორიტარი გოგი მეშველიანი ბოლნისის ადგილობრივ ხელმძღვანელობასთან ერთად საქართველოს პარლამენტის წევრს და რაგბის კავშირის გამგეობის თავმჯდომარე დავით კაჭარავას შეხვდა.

შეხვედრაზე განიხილეს ბოლნისის მუნიციპალიტეტში რაგბის განვითარებისა და ხელშეწყობის საკითხები.

მაჟორიტარის თქმით, წლებია მუშაობენ იმისათვის, რომ ბოლნისში შეიქმნას სარაგბო ბაზა და განხორციელდეს კომპლექსური სამშენებლო პროექტი.

გოგი მეშველიანმა, მუნიციპალიტეტის მერთან დავით შერაზადიშვილთან და საკრებულოს სივრცით ტერიტორიული დაგეგმარებისა და ინფრასტრუქტურის საკითხთა კომისის თავმჯდომარე დავით ჯაფარიძესთან ერთად დეტალური ინფორმაცია მივაწოდა არსებულ ვითარებასთან დაკავშირებით რაგბის კავშირის გამგეობის თავმჯდომარეს.

„ვიმედოვნებ, რომ ერთობლივი ძალისხმევით შევძლებთ სარაგბო ინფრასტრუქტურის მოწყობისთვის მნიშვნელოვანი პროექტის განხორციელებას.“- განაცხადა გოგი მეშველიანმა