„დღეს მთელი მსოფლიო ერთიანდება აივ ინფექციის წინააღმდეგ. ამ დღეს ჩვენ მხარდაჭერას გამოვხატავთ ამ ინფექციით დაავადებული ადამიანების მიმართ და მის შედეგად დაღუპულთა ხსოვნას პატივის მივაგებთ. შიდსთან ბრძოლის პროცესში განსაკუთრებით მნიშვნელოვანია დაავადებული ადამიანებისადმი არსებული სტიგმის შემცირება. ვფიქრობ, საზოგადოებაში ინფექციაზე არასწორი ფაქტების გავრცელების პრევენციის მიზნით, აუცილებელია ეფექტური საინფორმაციო კამპანიის წარმოება. ამ მიმართულებით, ბოლნისის მუნიციპალიტეტი, გასულ წლებში არაერთ საინფორმაციო აქტივობას ახორციელებდა. წელს, მსოფლიო პანდემიიდან გამომდინარე, მუნიციპალიტეტი ამ თარიღის აღნიშვნას მხოლოდ ონლაინ სივრცეში ეხმიანება, რომელიც გენდერული ძალადობის წინააღმდეგ 16 დღიანი კამპანიის ნაწილია“, – განაცხადა ბოლნისის მუნიციპალიტეტის მერმა დავით შერაზადიშვილმა.
მსოფლიო შიდსის დღე 1988 წლის 1 დეკემბერიდან აღინიშნება და აივ ინფექციის წინააღმდეგ ბრძოლაში მსოფლიოს გაერთიანებას, ასევე ინფექციით დაავადებული ადამიანების მხარდაჭერასა და მის შედეგად დაღუპული ადამიანების ხსოვნის პატივისცემას ისახავს მიზნად.
