ბოლნისის მუნიციპალიტეტში ინფრასტრუქტურული სამუშაოები გრძელდება

ბოლნისის მუნიციპალიტეტში მიმდინარე სამუშაოები საქართველოს რეგიონული განვითარებისა და ინფრასტრუქტურის მინისტრის პირველმა მოადგილემ ილია ბეგიაშვილმა, ქვემო ქართლის გუბერნატორ გიორგი დოხტურიშვილთან, ბოლნისის მუნიციპალიტეტის მერთან დავით შერაზადიშვილთან და საკრებულოს თავმჯდომარე თამაზ ჟორჟოლიანთან ერთად მოინახულა. რეგიონალური პროექტების განვითარების ფონდისა და ადგილობრივი ბიუჯეტის თანადაფინანსებით ქალაქ ბოლნისში აქტიურად მიმდინარეობს მრავალბინიანი კორპუსების შიდა ეზოების მოწესრიგება.  ასფალტის დაგების სამუშაოები განხორციელდა  სატყეოს, საავადმყოფოს, ყოფილი „უსინათლოებისა“ და ბულვარის უკან მდებარე მრავალბინიანი კორპუსების მიმდებარე ტერიტორიაზე, გარკვეულ მონაკვეთებზე უკვე დაიგო პირველი ფენა. აღნიშნული სამუშაოები მომავალი წლის იანვრის ბოლოს დასრულდება ასევე აქტიურად  მიმდინარეობს   ქვაფენილის დაგების სამუშაოები სიონის ქუჩაზე,  პირველ ეტაპზე კეთდება მხოლოდ  ნაწილი თავისი სანიაღვრე არხით და ტროტუარებით. აღნიშნული ქუჩა სრულად მოიკირწყლება 2024 წლის ბოლომდე.