,,ერთად შევქმნათ ახალგაზრდებისთვის ხელსაყრელი გარემო და მათზე მორგებული ყველა პროგრამა თუ პროექტი“-ამ დევიზით ბოლნისის მუნიციპალიტეტის მერიის განათლების, კულტურისა და სპორტის სამსახურის, განათლებისა და ახალგაზრდობის საქმეთა განყოფილების ინიციატივით, სკოლების ბაზაზე, ახალგაზრდული კლუბები შეიქმნა. ისინი უშუალო კოორდინაციაში იქნებიან ბოლნისის მუნიციპალიტეტის მერიის ახალგაზრდობის საკითხებზე მომუშავე ყველა რგოლთან. მათ ექნებათ შესაძლებლობა აქტიური მონაწილეობა მიიღონ ყველა იმ საქმეში, რომელიც ახალგაზრდობას ეხება.
ბოლნისის მუნიციპალიტეტის მერიის საკონფერენციო დარბაზში, სასკოლო ახალგაზრდული კლუბების წევრებთან გაცნობითი ხასიათის შეხვედრა გაიმართა. ახალგაზრდული კლუბის წევრებს ორგანიზატორებმა გააცნეს ის სამომავლო გეგმები და პროექტები, სადაც მათი უშუალო ჩართულობა და გააქტიურება აუცილებელია. შეხვედრას ასევე ახალგაზრდული საბჭოსა და სათემო ორგანიზაციების წარმომადგენლები ესწრებოდნენ.
