კონკურსის შესახებ საქართველოს კულტურის, სპორტისა და ახალგაზრდობის მინისტრმა დღეს გამართულ ბრიფინგზე ისაუბრა. კულტურის სამინისტრომ ეს კონკურსი წელს პირველად გამოაცხადა. აქამდე, ობიექტური მიზეზების გამო, ათწლეულების მანძილზე, სახელმწიფოს საცირკო ხელოვნების ხელშეწყობისთვის არ გადაუდგამს ქმედითი ნაბიჯები. ამ ხარვეზზე არაერთხელ მიაქციეს სამინისტროს ყურადღება დაინტერესებულმა პირებმა და, ასევე, დეპუტატებმა “მინისტრის საათის” ფორმატში.კონკურსის, „ცირკის განვითარების ხელშეწყობა“, მიზანია საცირკო ხელოვნების განვითარება და პოპულარიზაცია საქართველოში მოქმედი ცირკის პროფესიული თუ სამოყვარულო დასების, ჯგუფების, დამოუკიდებელი არტისტების შემოქმედებითი საქმიანობის ხელშეწყობის გზით. კონკურსის ბიუჯეტია 80 000 ლარი.კონკურსის ფარგლებში მიიღება პროექტები, რომლებიც ითვალისწინებს პროფესიული თუ სამოყვარულო საცირკო დასების, მათ შორის – მობილური საცირკო დასები, ე.წ. შაპიტოს, ჯგუფებისა და დამოუკიდებელი არტისტების ხელშეწყობასა და სხვადასხვა საჭირო (შემოქმედებითი, სასწავლო და/ან მატერიალურ-ტექნიკური) ხარჯით უზრუნველყოფას.კონკურსში მონაწილეობის უფლება აქვთ საქართველოში რეგისტრირებულ იურიდიულ და ფიზიკურ პირებს, რომელთაც აქვთ საცირკო ხელოვნების ნებისმიერ ჟანრში საგანმანათლებლო თუ შემოქმედებითი საქმიანობის გამოცდილება. კონკურსში შეიძლება უპირატესობა მიენიჭოს კონკურსანტს, რომელიც წინასაახალწლოდ გამართავს საცირკო წარმოდგენებს საქართველოს რეგიონებში. კონკურსანტს მხოლოდ ერთი საპროექტო განაცხადის წარმოდგენა შეუძლია. საკონკურსო დოკუმენტები უნდა იყოს ქართულ ენაზე, ხოლო უცხოენოვანი დოკუმენტაციის არსებობის შემთხვევაში, აუცილებელია მათი ქართულენოვანი თარგმანი. ქართულ ენაზე თარგმნილი დოკუმენტები დამოწმებული უნდა იყოს სანოტარო წესით (გარდა ინგლისური, ფრანგული, გერმანული და რუსული ენებიდან თარგმანისა). საჭიროების შემთხვევაში, სამინისტროს შეუძლია კონკურსანტს მოსთხოვოს დამატებითი დოკუმენტაციის წარმოდგენა.საკონკურსო განაცხადები მიიღება 2022 წლის 1 ნოემბრიდან 2022 წლის 10 ნოემბრის 12:00 საათამდე ან ნაბეჭდი სახით სამინისტროში, მისამართზე: თბილისი სანაპიროს ქ. N4, ან ელექტრონული დოკუმენტის სახით სამინისტროს ოფიციალური ელექტრონულ ფოსტაზე info@culture.gov.ge. კონკურსის შესახებ კონსულტაციების მიღება შეიძლება ტელეფონით, ნომრებზე: 032 2 02 22 29 ან 551 58 94 97. საქართველოს კულტურის, სპორტისა და ახალგაზრდობის მინისტრის 2021 წლის 3 ივნისის N7864 ბრძანება „საქართველოს კულტურის, სპორტისა და ახალგაზრდობის სამინისტროს მიერ კულტურის სფეროში განსახორციელებელი ღონისძიებების/პროექტების ხელშეწყობის პირობების და დაფინანსების წესის შესახებ“ და ფორმულარები იხილეთ შემდეგ ბმულებზე:დაფინანსების წესი – https://cutt.ly/7PGB6Oh ფორმულარები – https://cutt.ly/ePGNsau

45 წელი ხელოვნების სამსახურში,  უამრავი მოგონება და თავგადასავალი, რომელსაც კულტურის სახლის კედლები ინახავს– ეს ხმის ოპერატორის, სტანისლავ ჩულუხაძის ისტორიაა, იმ დიდი წარსულის მქონე თეატრის ნაწილია, რომელიც შემართებით და მონდომებით ქმნის დაუვიწყარ თეატრალურ სახეებს. სწორედ მსახიობების დამსახურებით და მაყურებლის სიყვარულით მოვიდა დღემდე 80 წლიანი ისტორიის მქონე ბოლნისის მუნიციპალური თეატრი. როგორც  ჩვენი რესპონდენტი  ამბობს, ერთი დასი სცენის მიღმაა, კულისებში, რომლებიც არ ჩანან, მაგრამ მსახიობების შემდეგ, სპექტაკლში მთავარ როლს თამაშობენ. სწორედ მათზეა დამოკიდებული ტექნიკური მხარე, რომელიც წარმოდგენას მეტ ელფერს, სიცოცხლეს და მეტყველებას სძენს. ნათქვამია, თეატრში იმალება განსაკუთრებული აზარტი, თუ მას ერთხელ ეზიარები, სამუდამოდ მისი ტყვე ხდებიო, სტანისლავის შემთხვევაშიც ასე მოხდა. მას შემდეგ ბევრმა წელმა გაიარა, იცვლებოდნენ რეჟისორები, მსახიობები, თაობები, რომლებიც თავისებურ კვალს ტოვებდნენ თეატრში, სტანისლავი კი, მრავალი წელია,  საყვარელ საქმეს უწყვეტად და ერთგულად აკეთებს. სრულიად ახალგაზრდა მივიდა და დღეს უკვე ასაკშია. ღვაწლი დაუფასდა, უყვართ და  აფასებენ. ერთგული მუშაობისთვის, მადლობის ნიშნად, საქართველოს თეატრალურმა საზოგადოებამ,  თეატრის ოთხმოცი წლის საიუბილეო ღონისძიებაზე, ამაგდარი ხელოვანის ტიტულით დააჯილდოვა.

„  სპექტაკლისთვის ვემზადებოდით, იქ არ ვიყავი, როცა ჩემი სახელი და გვარი გამოაცხადეს, რომ მითხრეს გაჯილდოებენო, დავიბენი, ვერ გავაცნობიერე, არ ველოდებოდი, თუმცა  ძალიან სასიამოვნოა, როცა შენს ამაგს აფასებენ, ესე იგი საქმე იცი, გამოგდის და მადლობას ამ სახით გამოხატავენ. თუმცა, მთავარი ჯილდო, სპექტაკლის შემდეგ მაყურებლის ტაშია, ემოციაა.  ამ ტიტულმა  კი განვლილი ცხოვრება გამახსენა, წლების მანძილზე  რა არ გამოვიარეთ, რამდენი კარგი ამბავი გადაგვხდა თავს“.

ამაგდარ ხელოვანს ამბის გახსენება შორეული წარსულიდან ვთხოვეთ, გვინდოდა გაგვეგო, თუ როგორ მოხვდა თეატრში და რა გზა გაიარა ,,მუსიკოსმა“, რომელიც დღეს თეატრში ხმის ოპერატორია.

„კულტურის სახლი, შენობა და სცენა ჩემი სახლია, მეორე ოჯახი, რომლის გარეშეც არ შემიძლია, 45 წელი ამ კედლებში გავატარე, ჩემს თვალწინ ხდებოდა ყველაფერი, ეს იყო ადგილი, სადაც გვიხაროდა შეკრება, თუმცა სანამ აქ მოვიდოდი,  ცხოვრების სკოლა ქალაქ ფოთში გავიარე, მაშინ როცა სასწავლებლად წავედი. დედაჩემს უნდოდა ინჟინერ-მშენებელი გავმხდარიყავი, მე კი საზღვაო ავირჩიე, სადაც მხოლოდ რამდენიმე თვე ვისწავლე. იქ სტუდენტთა საერთო საცხოვრებელში ვცხოვრობდი, განსხვავებული გარეგნობა მქონდა, გრძელი თმები, მუსიკა მიყვარდა, განსაკუთრებით ჯაზი, როკი, ეს მაშინ მიუღებელი იყო. 70-იან წლებში იკრძალებოდა, მითუმეტეს ჩემი იმიჯი, ამიტომ სასწავლებლის შინაგანაწესის დარღვევის გამო, მომიწია წამოსვლა. ქუჩაში აღმოვჩნდი,  ქუჩის მუსიკოსებმა შემიფარეს. ეს ჩემთვის ერთგვარი ბედნიერებაც იყო, იქ ვისწავლე ინსტრუმენტებზე დაკვრა. ოცნება ავიხდინე, მათგან ბევრი რამ ისეთი შევისწავლე, რაც შედგომ ცხოვრებაში გამომადგა, შეიძლება დიდი მეზღვაური გავმხდარიყავი, მაგრამ არ ვნანობ არჩევანს, დღემდე იმ საქმეს ვაკეთებ, რაც ბედნიერს მხდის“.

1971 წელს ბოლნისში დაბრუნდა, აქ შემოიკრიბა თანამოაზრეები, მოყვარული მუსიკოსები, რომელთან ერთადაც უკრავდა და მღეროდა ვოკალურ-ინსტრუმენტულ ანსამბლში, როგორც თავად გვიყვება,  კონცერტებს ატარებდნენ, დადიოდნენ სოფლებში, მიუხედავად ცხოვრების რთული პერიოდისა, დრო მხიარულად გაჰყავდათ.  სამსახურებიდან დაბრუნებულები  კულტურის სახლში იკრიბებოდნენ, ეს იყო განტვირთვის ადგილი,  სადაც  თავს იქცევდნენ,  კონცერტებისთვის ემზადებოდნენ,  უკრავდნენ იმ მუსიკას, რაც ნებადართული იყო.

„ერთმანეთისგან ბევრ რამეს ვსწავლობდით, კულტურის სახლში საერთო საქმეს ერთად ვაკეთებდით, სპექტაკლების დროს ვაწყობდით სცენას, დეკორაციებს, ვაკრავდით აფიშებს და ვყიდდით ბილეთებს, თეატრშიც ასე მოვხვდი. მაშინდელმა დირექტორმა დახმარება მთხოვა, მუსიკასთან ახლოს ვიყავი, თუმცა ამ მიმართულებით არ მქონდა გამოცდილება, ნელ-ნელა მივეჩვიე, მაშინ მაგნიტოფონის ბაბინებზე ვმუშაობდით, მარტივი არ იყო ამ ტექნოლოგიით მუსიკის ხმის დაჯენა, თუმცა ვისწავლე და მას შემდეგ უამრავი სპექტაკლი გავაკეთეთ, გვქონდა ბევრი წარმატებული გასტროლი. თეატრი სახალხო იყო, ჩართული ვიყავით კულტურის სახლში მომუშავე ყველა თანამშრომელი, მორგებული გვქონდა ის როლები, რაც შეგვეძლო და გამოგვდიოდა. ვმუშაობდით ენთუზიაზმზე, თუმცა პასუხისმგებლობით ვუდგებოდით დაკისრებულ მოვალეობას“.

პირველი სპექტაკლი კარგად ახსოვს,  „მზე ნეკერჩხლის ტყეში“, რომელიც წარმატებული აღმოჩნდა, მას შემდეგ სპექტაკლების რაოდენობას ვეღარ ითვლის, ასე გახდა მუსიკაზე შეყვარებული ბიჭი თეატრის შეუცვლელი გუნდის წევრი, ზოგი სპექტაკლი ძალიან მოსწონს, ზოგი ნაკლებად, თუმცა საქმეს ერთნაირი პასუხისმგებლობით და მონდომებით აკეთებს, რადგან, როგორც თავად ამბობს,  მუსიკა ერთ-ერთი ძირითადი ნაწილია, რომელიც სპექტაკლს სუნთქვას და მეტყველებას სძენს.

„მუსიკის გარეშე სპექტაკლი, ვფიქრობ, არაფერია, სწორედ მუსიკა სძენს წარმოდგენას სხვა ელფერს, შეიძლება ბევრჯერ  არ ვყოფილვარ მუშაობის ხასიათზე, მაგრამ ვცდილობ, ეს არასდროს შემემჩნეს, რადგან ხმის ოპერატორზე ბევრი რამ არის დამოკიდებული, მთლიანად მობილიზებული უნდა იყო, სად, რა დროს, რა მუსიკა უნდა გაუშვა, შეიძლება შენი ერთი არასწორი მოქმედებით სპექტაკლი ჩააგდო. მე ეს ნამდვილად  არ დამმართნია, ამიტომ ვთვლი, რომ ჯერ შემიძლია,  საქმეს თავს კარგად ვართმევ, დასი ძლიერია და ერთობლივად კარგი სპექტაკლები გამოგვდის. ყოველთვის თან მდევს ამოუცნობი გრძნობა, არ ვიცი ეს შიში, თუ ზედმეტი პასუხისმგებლობაა.   სპექტაკლის გასვლამდე ასეთი ჩვევა მაქვს, ვიმალები, განვმარტოვდები, ამ დროს მეუღლეც კი ერიდება ჩემთან საუბარს, ეს შინაგანი ნერვიულობაა, რომელიც წლების მიუხედავად, თავს არ მანებებს“.

მიუხედავად იმისა, რომ ის წლების მანძილზე სხვადასხვა სამსახურში მუშაობდა, თეატრისთვის თავის დანებება არასდროს უფიქრია, უამრავი მეგობარი შეიძინა, რომლებთანაც ცხოვრების ბევრი წლები გაატარა, გული სწყდება, რომ უმრავლესობა ცოცხალი აღარაა.

„ჩემთვის მთავარი ადამიანობაა, მე ასე ვიცხოვრე, ხელოვნებამ უამრავი მეგობარი შემძინა, უმრავლესობა წავიდა – გარდაიცვალა, იქ ერთი დიდი თეატრი მელოდება, თავის რეჟისორ-გამნათებლით. სამწუხაროა, თუმცა ეს ჩვენი ცხოვრებაა. ჩემი ნატვრაა მომავალში ჩემი შემცვლელიც იგივე მონდომებით, პასუხისმგებლობით მიუდგეს ამ საქმეს, მარტივი არაა, დამღლელიც შეიძლება იყოს, თუმცა როცა გიყვარს, არაფრად  მიგაჩნია სირთულე, დღეს მუშაობა გამარტივებულია, მინი დისკით და კომპიუტერით. თეატრი ბოლნისის ტრადიციაა, რომელსაც წლებია ვინარჩუნებთ.

პ.ს. სტანისლავ ჩულუხაძემ ცხოვრების მკაცრი სკოლა გაიარა, იყო წარმატებაც და მარცხიც, თუმცა ხელოვნებისადმი სიყვარული დღემდე უცვლელია, მისი დილა ისევ მუსიკით იწყება- მძიმე როკით, გიტარით და სამსახურით, რომელთანაც 45 წლიანი ისტორია აკავშირებს.

ავტორი: მაგდა დევნოზაშვილი

„მე მინდა შევეხო ეკონომიკურ ზრდას. მოგეხსენებათ, რომ მიმდინარე გეოპოლიტიკური გამოწვევებისა და დაძაბულობის ფონზე, ჩვენ ვინარჩუნებთ მაღალ ეკონომიკურ ზრდას ქვეყანაში. 9 თვის განმავლობაში საქართველოში არის 10,2% ეკონომიკური ზრდა. ეს არის უპრეცედენტო მთელ ევროპაში. ასევე მინდა ვთქვა, რომ გაზრდილია ექსპორტი 40%-ით და 9 თვეში ზრდამ 37,4% შეადგინა. ექსპორტიდან მიღებულმა შემოსავლებმა 4 მილიარდი აშშ დოლარი შეადგინა.ტურიზმის აღდგენა მიმდინარეობს სწრაფი ტემპით. თუ ჩვენ შევადარებთ 2019 წელს, წელს უკვე 97,5%-ით არის აღდგენილი ტურიზმი. აქედან მიღებულმა შემოსავლებმა შეადგინა 2,5 მილიარდი აშშ დოლარი.არ მინდა წინასწარ პროგნოზი გავაკეთო, მაგრამ წლის ბოლომდე ჩვენი მოლოდინი არის, რომ ჩვენ შევინარჩუნებთ ასეთ მაღალ ეკონომიკურ ზრდას და წლის ბოლოს ველოდებით ორნიშნა ეკონომიკურ ზრდას“, – განაცხადა პრემიერ-მინისტრმა.

ბოლნისის წყალარინების სისტემების მშენებლობის გაგრძელებაზე ხელშეკრულებები უკვე გაფორმდა. ბოლნისის მუნიციპალიტეტის მერმა დავით შერაზადიშვილმა ტენდერში გამარჯვებული კომპანიის „Polat Yol Yapı Sanayi ve Ticaret A.Ş. Gürcistan Şubesi“ წარმომადგენლებთან სამუშაო შეხვედრა გამართა.სამუშაო შეხვედრაზე პროექტის დეტალები განიხილეს. ბოლნისის მუნიციპალიტეტის მერიის მოთხოვნით, საკანალიზაციო ქსელის მოწყობა უახლოეს დღეებში სიონის, ჭავჭავაძისა და სოხუმის ქუჩებიდან დაიწყება. სამუშაოების დასრულების შემდგომ კი აღნიშნულ ქუჩებზე გზის საფარის რეაბილიტაცია განხორციელდება.კონტრაქტორი კომპანია ქალაქ ბოლნისში წყალარინების სისტემების მოწყობას 12 თვეში დაასრულებს. სამუშაოები როგორც ქალაქ ბოლნისის წყალარინების სისტემის ასევე ბოლნისი-მარნეულის დამაკავშირებელი კოლექტორის მოწყობასაც ითვალისწინებს.შეგახსენებთ, რომ მარნეულის წყლისა და წყალარინების, ბოლნისის წყალარინების სისტემების პროექტი აზიის განვითარების ბანკის დაფინანსებით ხორციელდება და ამ სამუშაოებს ჯამში 47,003,251 აშშ დოლარი მოხმარდება.„ბოლნისის წყალარინების სისტემების მოწყობასთან დაკავშირებით კონტრაქტორი კომპანიის წარმომადგენლებთან სამუშაო შეხვედრა გავმართეთ. კომპანიის წარმომადგენლებთან პროექტის ყველა დეტალი განვიხილეთ და მოხარული ვარ, რომ სამუშაოები უკვე დღეიდან აქტიურად დაიწყო. საკანალიზაციო ქსელის მოწყობას კომპანია ერთ წელში გეგმავს და ამ პროექტის განხორციელება ჩვენ საშუალებას მოგვცემს ქალაქ ბოლნისში გზების პრობლემა მთლიანად აღმოვფხვრათ“, – განაცხადა ბოლნისის მუნიციპალიტეტის მერმა დავით შერაზადიშვილმა.

ქვემო ქართლის  სათემო ორგანიზაციამ აქტიური მუშაობა დაიწყო, პირველ ეტაპზე, მხარდამჭერთა მობილიზების მიზნით ,,ნეკერის“  წევრებმა საინფორმაციო კამპანია გამართეს. ორგანიზაციის ერთ-ერთი თანადამფუძნებლის თქმით, შეხვედრების მიზანია ხმა მიაწვდინონ პოტენციურ მხარდამჭერებს.

,, კამპანიის ფარგლებში გვსურს ხმა მივაწვდინოთ „ნეკერის” პოტენციურ მხარდამჭერებს. იმ ადამიანების იდენტიფიცირებას ვცდილობთ, ვინც ჩვენს ორგანიზაციულ ხედვას და ღირებულებებს იზიარებენ, ამავე დროს მზად არიან „ნეკერთან“ ურთიერთობისთვის – ეს იქნება ორგანიზაციის საქმიანობისთვის თვალყურის დევნება, გულშემატკივრობა, თუ მის საქმიანობებში მოხალისეობრივად ჩართვა“-აღნიშნა აღნიშნა ,,ნეკერის“ თანადამფუძნებელმა როზი დევნოზაშვილმა.

პირველ ეტაპზე საინფორმაციო სახის შეხვერდები შედგა  გადაწყვეტილების მიმღებ პირებებთან:  – ბოლნისის მუნიციპალიტეტის მერთან, სკოლანდელი აღზრდისა და მეთოდური კოორდინაციის სამსახურის,  საგანმანათლებლო რესურსცენტრის, საზოგადოებრივი ჯანდაცვის ცენტრის ხელმძღვანელებთან და  მედიის წარმომადგენლებთან.

შემდეგი აქტივობა იყო საბავშვო ბაღების მენეჯერებთან საერთო შეხვედრა, სადაც მოხდა  ,,ნეკერის“ გაცნობა, იმსჯელეს მშობელთა ჩართულობის თვალსაზრისით ბაღებში არსებულ გამოწვევებზე.

ნოემბრის დასაწყისში მსგავსი ფორმატის და შინაარსის შეხვედრა გაიმართება სკოლების დირექტორებთან. პარალელურად დაიწყება პირისპირ შეხვედრები უშუალოდ მშობლებთან და მასწავლებლებთან/აღმზრდელებთან.

ამავე კამპანიის ნაწილია კვლევის კომპონენტიც, რომლის ფარგლებშიც მოხდება ელექტრონული კითხვარის საშუალებით  მიზნობრივი აუდიტორიის გაცნობა , ბაღებსა და სკოლებში მშობელთა ჩართულობასთან დაკავშირებით არსებული  ბარიერების შესწავლა.

,, ვართ ერთად ბავშვების მხარეს“ -კამპანია გაგრძელდება 2022 წლის ბოლომდე“.

 ახლად დაფუძნებული ორგანიზაცია ,,ნეკერი“-ს  მისიაა ქვემო ქართლის საბავშვო ბაღების/სკოლების მშობლებთან დაახლოება, მათი თანამშრომლობის წახალისება.  ორმხრივი კომუნიკაციის ჩამოყალიბება ბავშვების ინდივიდუალური საჭიროებების გამოვლენას შეუწყობს ხელს, რაც აღსაზრდელთა/მოსწავლეთა ჯანსაღი განვითარებისთვის ეფექტური საქმიანობის განსაზღვრის და განხორციელების წინაპირობა იქნება.

ქალთა ორგანიზაციის ინიციატივით, ქვეყნის მასშტაბით ძუძუს კიბოს პრევენციისა და მკურნალობის შესახებ სხვადასხვა სახის საინფორმაციო კამპანიები ტარდება.

,,ქართული ოცნების” ბოლნისის ქალთა ორგანიზაციის წევრებმა ქალაქის ცენტრში, კულტურის სახლის მიმდებარე ტერიტორიაზე, პერფორმანსი მოაწყვეს ხელისგულებზე საჯაროდ დაიხატეს ლოგო და საზოგადოებას უთხრეს, რომ კიბო განაჩენი არ არის!

#ძუძუსკიბოგანაჩენიარარის #შენისიცოცხლეშენსხელშია #ჩაიტარესკრინინგი