დღეს საქართველოს წითელი ჯვრის საზოგადოების ბოლნისის ფილიალმა, მუნიციპალიტეტის მერიის სოციალური და ჯანდაცვის  სამსახურის წარმომადგენლებთან  ერთად,   ბოლნისში  უკრაინიდან შემოსული 15 ოჯახი მოინახულეს და ჰუმანიტარული დახმარება გადასცეს, რომლებიც სასურსათო პროდუქტებს, ბავშვებისთვის საჭირო საბაზისო მედიკამენტებსა და ჰიგიენურ ნივთებს მოიცავდა.
ეტაპობრივად ამანათები სამეგრელოს, იმერეთის, კახეთის, ქვემო ქართლსა და სხვა მუნიციპალიტეტებში დარიგდება.

 პროექტის მხარდამჭერია სუპერმარკეტების ქსელი ,,2 ნაბიჯი”, ,,საქართველოს ბანკი” და საპატრიარქოს ახალგაზრდული ფონდი.

ლელა კვირიკაშვილი, ბოლნისის მუნიციპალიტეტის მერიის სოციალური და ჯანდაცვის სამსახურის ბავშვის დაცვისა და მხარდაჭერის განყოფილების უფროსი:

    -დღეს წითელი ჯვრის საზოგადოების ბოლნისის რაიონულ ორგანიზაციასთან ერთად, ბოლნისის მუნიციპალიტეტში მცხოვრები უკრაინიდან დევნილი ოჯახები მოვინახულეთ და ჰუმანიტარული დახმარება გადავეცით.  სიტყვებით ძნელია გადმოსცე თუ რას გრძნობენ ეს ადამიანები. ჩვენ მაქსიმალურად ვცდილობთ ყველაფერი გავაკეთოთ მათთან მიმართებაში, იმედს ვიტოვებთ მალე დამთავრდება  ომი და ისინი შეძლებენ საკუთარ სახლებში დაბრუნებას.

ილიევსკა ნატალია:

-აპრილის თვიდან აქ ვართ, ძალიან მოგვწონს  ბოლნისი, მშვიდი, წყნარი ქალაქია, ყველა იღიმის, გვთავაზობენ დახმარებას.  დიდი მადლობა მუნიციპალიტეტს, წითელ ჯვარს  თანადგომისთვის. ჩვენი მიწიდან  გამოვექეცით ომს,  თავშესაფარი ვნახეთ საქართველოში, სადაც დიდი სითბოთი და სიყვარულით გვექცევიან.

ტკაჩ ილენა:

-მადლობა,  რომ გვიმასპინძლეთ. 24 ადამიანი გამოვექეცით საომარ ვითარებას,  დავუკავშირდით უკრაინიდან იძულებით გადაადგილებულთა ცენტრს და ხელი შეგვიწყვეს ყველანაირად. ბოლნისში ჩამოსვლის შემდეგ  დაგვეხმარნენ საყოფაცხოვრებო ნივთებით. ასევე უფასოდ გვემსახურებიან საავადმყოფოები. დიდი მადლობა ყველაფრისთვის ადგილობრივ ხელისუფლებას და წითელ ჯვარს.  

ნოტიჩევ ელიზავეტა:                                                   

ჩამოვედით მარტის თვეში, ხალხი ძალიან თბილად დაგვხვდა, გამოხატავენ სითბოს და სიკეთეს ჩვენს მიმართ. ამ ქალაქში ისე ვგრძნობთ თავს, როგორც საკუთარ სახლში.  დიდი მადლობა ქართველებს, ბოლნისს და წითელ ჯვარს  დახმარებისთვის.  

რენზეს სვეტლანა:

  -დაბრუნება გვინდა ჩვენს სახლში, მაგრამ არ შეგვიძლია, რომ წავიდეთ არ ვიცით შევაღწევთ თუ არა.  ვნერვიულობთ ჩვენს ოჯახებზე, ნათესავებზე, მეგობრებზე.  დიდი მადლობა გაფრინდაშვილების ოჯახს,რომლებმაც მიგვიღეს და დახმარება გაგვიწიეს, დიდი მადლობა მუნიციპალიტეტს და წითელ ჯვარს.

გიწვევთ მონაწილეობა მიიღოთ კინო მოზაიკის ვორქშოფზე ბოლნისში!

ვორქშოფის ორგანიზატორები არიან კოპენჰაგენის არქიტექტურის კინოფესტივალი, თბილისის არქიტექტურის ბიენალე და ნუში ფილმი.

მონაწილეებმა უნდა აღმოაჩინონ ბოლნისში საზოგადოებრივ სივრცეში ინკლუზიურობის და დისკრიმინაციის საკითხების არქიტექტურული გადაწყვეტები და ამ თემების გარშემო შექმნან მოკლემეტრაჟიანი ფილმები (მაქს. 3 წთ).

მონაწილეები 5 დღის განმავლობაში დაესწრებიან არქიტექტურასთან, ურბანულ საკითხებთან და საზოგადოებრივ სივრცეებთან დაკავშირებულ ლექციებს. ამავდროულად, მათ საშუალება მიეცემათ შეისწავლონ ფილმის გადაღების პროცესის პრაქტიკული ნაწილი (Learning-by-doing) კინო სფეროში აქტიურად მომუშავე პროფესიონალების დახმარებით. ვორქშოფის შედეგად მონაწილეები მიიღებენ კონკრეტულ ცოდნას გადაღებების დაგეგმვიდან დაწყებული, ფილმის შექმნის პროცესის და მონტაჟის ჩათვლით.

ვის შეუძლია მონაწილეობის მიღება?
კურსი ღიაა ამ რეგიონში მცხოვრები ნებისმიერი მსურველისთვის, რომელიც დაინტერესებულია არქიტექტურის და კინოს გადაკვეთით, ასევე სტუდენტებისვის და ამ სფეროებში მომუშავე პროფესიონალებისთვის. ვორქშოფი წარმოადგენს უსაფრთხო გარემოს ყველასთვის განურჩევლად წარმომავლობის, სქესის და ორიენტაციისა. პროგრამა მხარს უჭერს მონაწილეებს შორის ურთიერთთანამშრომლობას და დიალოგს.

ვორქშოფის თარიღები: 2022 წლის 18-22 ივლისი
აპლიკაციის გამოგზავნის ბოლო ვადა: 2022 წლის 7 ივლისი

აპლიკაცია იხილეთ ბმულზე : https://forms.gle/xzmLVEwc8Wkvu1qK9

დაბა კაზრეთის ცენტრალურ პარკში, „ახალგაზრდების ხმა მშვიდობისთვის“ პროექტის ფარგლებში სათემო ღონისძიება „კაზრეთობა“ გაიმართა. ღონისძიებაში აქტიური მონაწილეობა  ადგილობრივმა ახალგაზრდებმა მიიღეს. მათ დამსწრე საზოგადოებას გააცნეს თუ რას მოიცავს პროექტი და რა სამუშაოები განახორციელეს, წარადგინეს სამოქმედო გეგმა,  რომელიც ოთხი ძირითადი მიმართულებისგან შედგება: ახალგაზრდების მონაწილეობა, მშვიდობა, უსაფრთხოება, რესურსები და გენდერული თანასწორობა. ისაუბრეს სამომავლო გეგმებზეც, რომლის განხორციელებასაც მომავალში საგრანტო კონკურსის ფარგლებში აპირებენ. ღონისძიებას ესწრებოდნენ პროექტის გუნდის წევრები, სხვადასხვა სამოქალაქო და არასამთავრობო ორგანიზაციები და ადგილობრივი მუნიციპალიტეტის წარმომადგენლები, რომლებმაც  რეგიონში მსგავსი პროექტების განხორციელების მნიშვნელობაზე და იმ შესაძლებლობებზე გაამახვილეს ყურადღება, რომელსაც მუნიციპალიტეტი ახალგაზრდებს სთავაზობს.

პროექტი, „ახალგაზრდების ხმა მშვიდობისთვის“ მხარდაჭერილია ავსტრიის განვითარების სააგენტოს მიერ, ავსტრიის განვითარების თანამშრომლობის დაფინანსებით და ახორციელებენ „ქეა კავკასია“ და იძულებით გადაადგილებულ ქალთა ასოციაცია „თანხმობა“  ქეა ავსტრიასთან მჭიდრო თანამშრომლობით, რომელიც მიზნად ისახავს ხელი შეუწყოს საქართველოში ერთიანი, მშვიდობიანი, ინკლუზიური და თანასწორი  საზოგადოების ჩამოყალიბებას.

პროექტის „ახალგაზრდების ხმა მშვიდობისთვის“ წარდგენისა და გაცნობის შემდეგ, ახალგაზრდების ჩართულობით, ღონისძიება  სხვადასხვა კულტურული, სპორტული და შემეცნებითი პროგრამით გაგრძელდა.

აჭარის  სპორტული ცეკვების ფედერაციის ორგანიზებით 2 და 3 ივლისს, სპორტული ცეკვების სარეიტინგო საერთაშორისო ჩემპიონატი „batumi open 2022“ გაიმართა, სადაც სხვადასხვა  ასაკობრივ კატეგორიაში ბოლნისის ლათინო-ამერიკული ცეკვების სტუდია „პრესტოს“ მოცეკვავე-სპორტსმენები იღებდნენ მონაწილეობას.

აღნიშნულ ტურნირში ანა გრძელიშვილმა 13 პლიუს ასაკში მიიღო პირველი ხარისხის დიპლომი, ხოლო მეორე ხარისხის დიპლომები გადაეცათ ნატალი სვანიძეს და მარიამ კორტავას. 10-12 წლამდე ასაკის კატეგორიაში, მეორე ხარისხის დიპლომები,  სოლო შესრულებაში ეკატერინე დემურაძემ და სანდრო ბერიძისა და ლიზი მაღალიანის წყვილმა მიიღო. ღია ჩემპიონატი ბათუმში ტრადიციულად ყოველ წელს იმართება. აღნიშნულ ტურნირში მონაწილეობას იღებდა WDSP მონაწილე სპორტსმენები, როლებსაც საერთაშორისო კლასის მსაჯები აკვირდებოდნენ.

ევროკავშირის მხარდაჭერით, ძლიერი სამოქალაქო საზოგადოების ჩამოყალიბებისა და ფორმირების მიზნით, CENN-მა, პარტნიორ ორგანიზაციებთან ერთად სამოქალაქო საზოგადოების გაძლიერების პროექტი დაიწყო.ევროკავშირის მხარდაჭერით, CENN-მა, პარტნიორ ორგანიზაციებთან ერთად – კონსულტაციის და ტრენინგის ცენტრი (CTC), ქვემო ქართლის მედია (KKM), First European (FE) – ოთხწლიანი ახალი პროექტის „სამოქალაქო საზოგადოების გაძლიერება ინკლუზიური და მწვანე ზრდისთვის“ ფარგლებში, დაინტერესებულ მხარეთა შეხვედრა ჩაატარა.პროექტის პრეზენტაციას ბოლნისის მუნიციპალიტეტის მერი დავით შერაზადიშვილი, ქვემო ქართლში სახელმწიფო რწმუნებულთან გიორგი დოხტურიშვილთან და გარდაბნის, დმანისის,თეთრიწყაროს,მარნეულისა და წალკის მუნიციპალიტეტების მერებთან ერთად დაესწრო.პროექტი 4 წლის განმავლობაში ქვემო ქართლის და სამცხე-ჯავახეთის რეგიონების რვა მუნიციპალიტეტში იმუშავებს და უზრუნველყოფს სამოქალაქო საზოგადოების ორგანიზაციებისა და ადგილობრივი თვითმმართველობის ორგანოების ჩართულობას სამოქალაქო საზოგადოების მონაწილეობის ხარისხის გასაუმჯობესებლად და მათი შესაძლებლობების განსავითარებლად.ღონისძიების ფარგლებში, სამიზნე მუნიციპალიტეტების მერებთან ურთიერთშეთანხმების მემორანდუმი გაფორმდა.,,მოხარული ვარ, რომ ბოლნისის მერიასა და კავკასიის გარემოსდაცვითი არასამთავრობო ორგანიზაციების ქსელთან ურთიერთშეთანხმების მემორანდუმი გავაფორმეთ. ძლიერი არასამთავრობო ორგანიზაციები და სამოქალაქო სექტორი ჩვენი ქვეყნის განვითარების ერთ-ერთი უმნიშვნელოვანესი გარანტია. ეს ჩვენს მუნიციპალიტეტს ნათლად აქვს გაცნობიერებული. ჩვენ ადგილობრივ და საერთაშორისო არასამთავრობო ორგანიზაციებთან თანამშრომლობის კარგი პრაქტიკა გვაქვს, მათ შორის CENN-თან ერთობლივი მუშაობის გამოცდილებაც სხვადასხვა პროექტების სახით. მისასალმებელია, რომ ,,სამოქალაქო საზოგადოების გაძლიერების პროექტი“ ჩვენს მუნიციპალიტეტში კიდევ უფრო მეტად გააძლიერებს სამოქალაქო საზოგადოებასა და ადგილობრივ თვითმმართველობას შორის მჭიდრო თანამშრომლობას. ბოლნისის მუნიციპალიტეტს ნათლად აქვს გააზრებული მისი სოციალური პასუხისმგებლობა. სოციალური პროგრამებისთვის ჩვენი ბიუჯეტის მნიშვნელოვანი ნაწილი იხარჯება, რომელიც საზოგადოების თითქმის ყველა ფენაზეა გათვლილი. მიუხედავად ამისა, სასიხარულოა ის ფაქტი, რომ მემორანდუმის ფარგლებში დაგეგმილია სოციალური სერვისების გაუმჯობესება, ასევე წყალმომარაგებასა და ჯანდაცვის სერვისებზე მოქალაქეთა წვდომის გაზრდა. ბოლნისის მუნიციპალიტეტის უმთავრესი პრიორიტეტი, მუნიციპალიტეტის მასშტაბით, თითოეული მოქალაქის უფლებების დაცვა და მათი შესაძლებლობების რეალიზებაა“,- განაცხადა ბოლნისის მუნიციპალიტეტის მერმა დავით შერაზადიშვილმა.

საქართველოს პარლამენტში ბოლნისის, დმანისის, თეთრიწყაროსა და წალკის მაჟორიტარი გოგი მეშველიანი აბიტურიენტებს ეროვნული გამოცდების დაწყებას ულოცავს და წარმატებებს უსურვებს.

„დღეს დაიწყო ერთიანი ეროვნული გამოცდები და მსურს წარმატებები ვუსურვო თითოეულ აბიტურიენტს, განსაკუთრებით კი ბოლნისელ, დმანისელ, თეთრიწყაროელ და წალკელ ახალგაზრდებს! დარწმუნებული ვარ, რომ თქვენ, შეძლებთ საკუთარი შესაძლებლობების მაქსიმალურ წარმოჩენას და მიაღწევთ დასახულ მიზანს! გილოცავთ დღევანდელ დღეს, გისურვებთ ნაკლებ მღელვარებას და თავდაჯერებულობას, მჯერა ყველაფერი კარდგად ჩაივლის ! „- განაცხადა გოგი მეშველიანმა.

4 ივლისს ეროვნული გამოცდები 09:00 საათზე, ქართული ენისა და ლიტერატურის გამოცდით დაიწყება. პირველ სესიაზე რეგისტრაციას აბიტურიენტები 08:00 საათზე გაივლიან, მეორე სესიაზე კი – 14:00 საათზე. მეორე სესიის საგამოცდო დროდ 15:00 საათი განისაზღვრა.

მთელი საქართველოს მასშტაბით გახსნილია 22 საგამოცდო ცენტრი, რომლებიც ჯამში 90 000-მდე რეგისტრირებულ პირს მოემსახურება. ერთიანი ეროვნული გამოცდებისთვის წელს 41 000-ზე მეტი აბიტურიენტი დარეგისტრირდა; სტუდენტთა საგრანტო კონკურსზე დარეგისტრირებულია 2 500-ზე მეტი სტუდენტი; საერთო სამაგისტრო გამოცდისთვის 9 500-ზე მეტი აპლიკანტი, ხოლო მასწავლებლის საგნისა და პროფესიული უნარების გამოცდის ჩასაბარებლად სულ 35 500-ზე მეტი მსურველია დარეგისტრირებული.

ამასთან, იმ პირებისთვის, რომლებსაც ეროვნული გამოცდების პერიოდში კორონავირუსი დაუდასტურდებათ, დაინიშნება დამატებითი სეანსები. ისინი ვირუსის დადასტურებიდან მერვე დღეს შეძლებენ გამოცდაზე გასვლას.

აჭარის სპორტული ფედერაციის ორგანიზებით ქალაქ ბათუმში, სპორტული ცეკვების საერთაშორისო ტურნირი,,Batumi open 2022″ მიმდინარეობს, სადაც სხვადასხვა ასაკობრივ კატეგორიაში ბოლნისის კულტურის სახლთან არსებული სტუდია ,,პრესტოს” მოცეკვავეებიც არიან ჩართულები. უკვე ცნობილია 21 წლამდე ასაკობრივ კატეგორიაში გამარჯვებული მოცეკვავე წყვილების ვინაობა,”Batumi open 2022″-ის მესამე  საპრიზო ადგილი, დებიუტანტებმა, ხუთი ლათინის ცეკვაში, გუგა საყვარელიძემ და მარიამ  ნურალაშვილმა დაიკავეს.