Bolnisi bələdiyyəsində bərk məişət tullantılarının transfer stansiyası rəsmi olaraq istifadəyə verilib. Müasir standartlara uyğun şəkildə yaradılmış infrastruktur obyekti bələdiyyə ərazisində toplanan bərk məişət tullantılarının qəbulunu, müvəqqəti yerləşdirilməsini və ixtisaslaşdırılmış yük nəqliyyatı vasitəsilə regional poliqona daşınmasını təmin edəcək. Qeyd olunan infrastruktur obyekti tullantıların idarə olunmasına, ətraf mühitin mühafizəsi tələblərinə riayət edilməsinə və tullantıların ətraf mühitə mənfi təsirinin azaldılmasına kömək edəcək. Yeni tullantı transfer stansiyasının fəaliyyətə başlaması ilə yanaşı, Bolnisidə mövcud olan köhnə poliqonun bağlanması prosedurları da davam edir. Cari ilin sonuna qədər tullantıların yerləşdirilməsi üçün nəzərdə tutulmuş köhnə obyektin böyük hissəsi qanunvericiliklə müəyyən edilmiş tələblərə uyğun olaraq bağlanacaq. Yalnız heyvan mənşəli tullantıların yerləşdirilməsi üçün nəzərdə tutulmuş bölmə fəaliyyətini davam etdirəcək və onun bağlanması 2027-ci ilin sonuna planlaşdırılır. Yeni stansiya beynəlxalq standartlara tam uyğundur. Obyekt Bolnisi və Dmanisi bələdiyyələrinə xidmət göstərəcək. Bununla yanaşı, əlavə iş yerləri yaradılıb və burada yerli əhalinin məşğulluğu təmin ediləcək. Açılış tədbirində mərkəzi və yerli hakimiyyət orqanlarının nümayəndələri, eləcə də müvafiq qurumların rəhbər şəxsləri iştirak ediblər.
