მუსიკალურ-შემეცნებითი ტურნეს ფარგლებში დღეს ბოლნისს ესტონური ფოლკლორული გუნდი „ვანამოსა“ სტუმრობდა, რომლის ფარგლებში სხვადასხვა აქტივობა განხორციელდა. გუნდის წევრებმა დაათვალიერეს ძველი გერმანული უბნები, რის შემდეგაც კულტურის ცენტრში, ამავე ცენტრის დირექტორმა, სოსო კოპალეიშვილმა ქართული ფოლკლორის შესახებ მასტერკლასი შესთავაზა.
ფოლკლორული გუნდი „ვანამოსა“ 14 წლის წინ დაარსდა, რომლის რეპერტუარი მკაცრად გაწერილი არაა, ისინი მღერიან როგორც კლასიკურ, ასევე თანამედროვე და სხვა ხალხების სიმღერებს, მონაწილეობა აქვთ მიღებული არაერთ კონკურსსა და ფესტივალში. გუნდის მიზანია ქვეყნის სახელი ფარგლებს გარეთ გაიტანოს, რასაც სახელმწიფოს მხარდაჭერით წარმატებით ახორციელებს.
ესტონური ფოლკლორული გუნდის „ვანამოსა“ მუსიკალურ-შემეცნებითი ტურნე, ჩვენს მუნიციპალიტეტში კულტურული მემკვიდრეობის მონახულებას და დღის ბოლოს კონცერტს მოიცავდა. მუსიკალურ საღამოს, რომლის რეპერტუარიც სხვადასხვა ჟანრს ითვალისწინებდა, სიურპრიზის გარეშე არ ჩაუვლია, ქართველი მსმენელისთვის გუნდი ქართულად ამღერდა.
