კარანტინის ზონაში   ოჯახ-ოჯახ, კარდაკარ  დადის და სოფლის მცხოვრებლების ჯანმრთელობის მდგომარეობას ამოწმებს. ეხმარება და ზრუნავს მათზე – ეს ოჯახის ექიმი ია გოგიძეა, რომელიც  ბოლნისის მუნიციპალიტეტში მუშაობს. კარანტინის გამოცხადებიდან კი რუსთაველ ექიმს, ცხოვრება ბოლნისში, ოჯახიდან მოშორებით  უწევს. სწორედ  ამ ქალბატონს გადაუხადა მადლობა ლუგარის კვლევითი ცენტრის ხელმძღვანელმა, ქვემო ბოლნისში დაინფიცირებულის აღმოჩენისა და მასთან კონტაქტში მყოფი პირების დროული დადგენისთვის.

ყოველდღიურად  მოსახლეობის ჯანმრთელობაზე აქტიურად  მუშაობს ბოლნისის საზოგადოებრივი ჯანდაცვის ცენტრი. ია გოგიძესთან ერთად  ოცამდე საექიმო ჯგუფი აქტიურად აწარმოებს მუნიციპალიტეტში თერმო სკრინინგს, სწორედ ამ რგოლს ევალება ეპიდემიოლოგიური კვლევების ჩატარება და ინფიცირების კონტაქტების გამოვლენა, 31 მარტს პაატა იმნაძემ, გაწეული მუშაობისთვის,  ოჯახის ექიმთან ერთად, მადლობა ჯანდაცვის ცენტრის ხელმძღვანელს მაკა მამარდაშვილს გადაუხადა. 

 ყოველ  საღამოს,  ჩვეული რეჟიმით,   ჯანდაცვის ცენტრში იკრიბებიან და დღის მონაცემებს ერთად  აჯამებენ, ექიმები, რომლებიც ამ ომში წინა ხაზზე, თავდაუზოგავად იბრძვიან თითოეული ადამიანის ჯანმრთელობისთვის. 

უკვე მეცხრე დღეა ბოლნისელები საკარანტინო რეჟიმში ცხოვრობენ.ადგილობრივი ხელისუფლების გადაწყვეტილებით, კარანტინის პირველივე დღიდან ბოლნისში შეიქმნა სამუშაო შტაბი, ამოქმედდა ცხელი ხაზი, დაიწყო მოქალაქეების თერმო სკრინინგი, დამუშავდა ქუჩები სპეციალური ხსნარით, მოსახლეობის მეტი ინფორმირებულობისთვის, დაიწყო საინფორმაციო კამპანიები აზერბაიჯანულ და სომხურ ენებზე.
საკარანტინო ზონად გამოცხადების შემდეგ, ბოლნისის მუნიციპალიტეტის მერია აგრძელებს ასევე აქტიურ კამპანიებს სოციალურად შეჭირვებული მოსახლეობისათვის. 

შეგახსენებთ რომ ბოლნისში 540 ოჯახზე უკვე დარიგდა კერძო ბიზნესმენების შემოწირულობებით შეძენილი  სასურსათო პროდუქტები. 

მერიისგან პირველადი მოხმარების სურსათი ამ ეტაპზე შშმ პირებს, მარტოხელა მოხუცებს და სოციალურად დაუცველ პენსიონერებს, ჯამში კი  940 ოჯახს გადაეცემა.

ბოლნისის მინიციპალიტეტში არსებულ ბანკებთან დღეიდან ცოცხალ რიგებს მოხალისე ჯგუფები გააკონტროლებენ და ბანკის თანამშრომლებს დაეხმარებიან მოსახლეობის დისტანციის რეგულირებაში, რათა თითოეული მოქალაქე იყოს დაცული. ბოლნისის მუნიციპალიტეტი ყველა მოქალაქეს მოუწოდებს გამოიჩინონ საზოგადოებრივი პასუხისმგებლობა და გაითვალისწინონ მსოფლიო ჯანდაცვის რეკომენდაციები.

ბოლნისის მუნიციპალიტეტს, რამდენიმე დღეა, საკარანტინო რეჟიმში უწევს  ცხოვრება. საგანგებო მდგომარეობის მიუხედავად, მუნიციპალიტეტში მომუშავე აგრარული თუ სამთო მომპოვებელი საწარმოების ნაწილი, იმისთვის ,რომ ბაზარზე პროდუქტის დეფიციტი არ მოხდეს,   ჩვეულ რეჟიმში, მკაცრი ჰიგიენური წესების დაცვით, შეუფერხებლად აგრძელებს მუშაობას. ერთ-ერთი, სოფელ დისველში მდებარე, ქალთა კოოპერატივი ,,დისველია“. ყველის საწარმოში აქამდეც  მუდმივად ხდებოდა სანიტარული ნორმების დაცვა, თუმცა საგანგებო მდგომარეობიდან გამომდინარე, მეტად გამკაცრდა სოციალური დისტანცია და რეკომენდაციები. კოოპერატივის მუშაობა სოფლისთვის შემოსავლის ძირითადი წყაროა. საწარმო 2014 წელს აშენდა და ნატურალურ რძეს, თანასოფლელებისგან,  დმანისის და მარნეულის მუნიციპალიტეტებისგან იღებს. აქ დამზადებული სხვადასხვა სახეობის რძის პროდუქტით დედაქალაქის რამდენიმე ქსელური მაღაზია მარაგდება. კოპერატივი, შექმნილი მდგომარეობიდან გამომდინარე, სოციალურად შეჭირვებულ ოჯახებს რძის პროდუქტებს გადასცემს 

 შეცვლილი დღის წესრიგით  მუშაობას აგრძელებს სოფელ აკაურთაში მდებარე  შპს ,,ქართული სახლი’’, სადაც ხორც-პროდუქტების წარმოება, დახურულ გარემოში, სრული სანიტარული ნორმის დაცვით ხდება. ამ ეტაპზე,  საწარმო საგანგებო რეჟიმზე გადავიდა, შეიზღუდა თანამშრომელთა გადაადგილება, შენობაში მუდმივად ხდება დეზინფექცია. დასაქმებულები საწარმოში შესვლამდე    სპეციალურ შემოწმებას გადიან,პროდუქციის რეალიზებაც შეუფერხებლად ხდება.

 სოფელ სავანეთის ,,მეფრინველეობის  ფაბრიკა ‘’, მთავრობის მიერ გაცემული რეკომენდაცის დაცვით,  აგრძელებს მუშაობას. კვერცხის წარმოება და რეალიზება ჩვეულ რეჟიმში ხორციელდება.  ჰიგიენური ნორმების დაცვით მუშაობენ ასევე ბოლნისის პურ-ფუნთუშეულის მცირე საწარმოებიც. 

16 მარტიდან, საქართველოსა  და ამიერკავკასიაში ერთ-ერთი უმსხვილესი  სამთო მოპოვებითი საწარმო ,,არემჯიმ“, ვირუსისგან თავდაცვის მიზნით, თანამშრომლების ნაწილი დისტანციურ მუშაობაზე გადაიყვანა, კომპანიაში ჩატარდა კომპლექსური სადეზინფექციო სამუშაოები. დაავადებათა კონტროლის  ეროვნული ცენტრის მიერ, რეკომენდაციების გასაცნობად, პოსტერები გამოიკრა.

ბოლნისში, საკარანტინო რეჟიმის პერიოდში,   სხვადასხვა საინფორმაციო, თუ საქველმოქმედო კამპანია ტარდება. დღეს მორიგი აქცია განხორციელდა.  ამჯერად , კერძო პირებისგან მიღებული შემოწირულობებით ნაყიდი სურსათი მარტოხელა პენსიონერებს, თვით იზოლაციაში მყოფ პირებსა და შეჭირვებულ ოჯახებს გადაეცათ.  სასურსათო ნობათის დარიგებას ბოლნისის მაჟორიტარი დეპუტატი მერთან ერთად დაესწრო. აღნიშნული აქცია, საჭიროებიდან გამომდინარე, ეტაპობრივად განხორციელდება.

ამ დროისთვის  ბოლნისში, კორონავირუსით ინფიცირების მხოლოდ ერთი ფაქტია დადასტურებული, სხვა შესაძლო შემთხვევების გამოსავლენად,  გრძელდება კარდაკარ სიარული. გუშინდელი მონაცემებით, მუნიციპალიტეტის მასშტაბით, 3376 ადამიანია შემოწმებული და ვირუსის სიმპტომები არავის აღენიშნება.

დღეს კარანტინის მეხუთე დღეა, ქალაქის მოსახლეობის შემოწმება დაიწყო, სამედიცინო ჯგუფები ყველა ოჯახში შედიან  და მოქალაქეების ჯანმრთელობის მდგომარეობას ამოწმებენ.