İrakli Qaribaşvili Gürcüstanın baş naziri vəzifəsindən istefa verib. Bu barədə Qaribaşvili bugünkü brifinqdə məlumat verib

“Komanda ilə müzakirə etdiyimiz qərar barədə ictimaiyyəti məlumatlandırmaq istəyirəm. Bu gün mən baş nazir postunu tərk edirəm. İcazə verin, bu qərarın səbəblərini açıq şəkildə izah edim. Bu yaxınlarda, keçən ilin sonunda mən üç illik fəaliyyətimlə bağlı geniş hesabatı ictimaiyyətə təqdim etdim. Bildiyiniz kimi, mən ən çətin dövrdə, daxili və beynəlxalq siyasi, iqtisadi və sosial böhranlar şəraitində ikinci müddətə hökumət başçısı vəzifəsində işləməyə başladım. Mən ölkəmizə açıq-aydın xidmət etdim, ölkəmizin və xalqımızın mənafeyini şərtsiz qorudum, komanda ilə birlikdə bu müddətdə əldə etdiyimiz nəticələrlə fəxr edirəm”, – Qaribaşvili bildirib. Qaribaşvilinin sözlərinə görə, o, siyasi şuradan partiya sədri vəzifəsini tutmaq təklifi alıb və bununla bağlı qurultay fevralın 1-də keçiriləcək. “Gürcü arzusu” administrasiyası dövründə iki dəfə bu ən yüksək vəzifədə işləməli oldum. Ümumilikdə, ən uzun müddət, beş il baş nazir olmuşam. Siyasi komandamızın gücünü göstərən əsas amillərdən biri daxili demokratiyadır ki, bunun ən bariz təzahürü rotasiya prinsipidir. Komandada çoxlu uğurlu liderlər var və başqalarına da imkan vermək lazımdır. Xüsusən də indidən qarşımızda yeni vəzifələr durur. Biz payızda yeni parlament seçəcəyik və “Gürcü arzusu” başqa, daha böyük məqsədlərə çatmaq üçün irəliləməyə davam etmək üçün seçkilərdə inamlı qələbə çalmağa hazırlaşmalıdır. Siyasi şuradan bu siyasi reallığı əsas götürərək partiya sədri vəzifəsini tutmaq təklifi aldım. Bununla bağlı fevralın 1-də konfrans keçiriləcək. Sizdən gizlətməyəcəyəm ki, mən siyasi şurada yayda seçki kampaniyası başlayana qədər vəzifədə qalmaq imkanını müzakirə etmişdim, amma indi bu qərara üstünlük verdim. Növbəti baş nazirin vaxtında öz komandasını təqdim etməsi və yeni hökuməti formalaşdırması vacibdir. Yeni baş nazirə uğurlar arzulayıram. Partiyada fəaliyyətimi davam etdirmək, seçki prosesində, ümumiyyətlə, ölkəmizin inkişafında fəal iştirak etmək mənim üçün böyük şərəf və məsuliyyətdir. Mən partiyamızın qurucusu və fəxri sədri cənab Bidzina İvanişviliyə, Baş nazir olaraq çalışarkən verdiyi böyük dəstəkyə görə partiyanın və parlamentin rəhbərliyinə və üzvlərinə, nazirliklərin rəhbərlərinə və hər bir işçiyə, hökumət administrasiyasının həmkarlarına, bütün dövlət qulluqçularına təşəkkür etmək istəyirəm. Həyat yoldaşıma, övladlarıma və valideynlərimə dəstəyə görə xüsusi təşəkkürümü bildirirəm. Ümid edirəm ki, indi ailəmlə daha çox vaxt keçirmək imkanım olacaq. Vətənimizə sülh, firavanlıq, birlik arzulayıram. Allah bizləri qorusun”, – deyə İrakli Qaribaşvili bildirib.