Gürcüstan Müdafiə Nazirliyi Gənclər Agentliyi ilə əməkdaşlıq çərçivəsində 2023-cü ildən etibarən “Ordu Düşərgəsi” layihəsini həyata keçirir. Bu müddət ərzində layihədə 14–17 yaş arası 5000-dən çox gənc iştirak edib. Bu il isə Bolnisi Bələdiyyəsi Meriyasının Gənclərlə İş Şöbəsinin dəstəyi ilə Bolnisidən 40-dan çox gənc düşərgənin 7-ci rotasiyasında iştirak edir.
Elena Ananova, iştirakçı:
“Macəralarla dolu bu düşərgədə iştirak etmək imkanı qazandığım üçün çox xoşbəxtəm. Burada hər gün yeni çağırışlarla zəngindir. Fiziki fəaliyyətlərlə yanaşı, komanda işi, intizam və vətənpərvərlik ruhunu öyrənirik. Fürsətdən istifadə edərək mənə bu imkanı yaratdığı üçün Gənclərlə İş Şöbəsinin rəhbərinə təşəkkürümü bildirirəm.”
Nikolaz Çagelişvili, iştirakçı:
“Bir neçə gün sonra buranı tərk edəcəyimi düşündükcə hisslərimi gizlədə bilmirəm. Burada qazandığım bilik və təcrübə həyatımın hər mərhələsində mənə faydalı olacaq.”
Giorgi Satskovi, Bolnisi Bələdiyyəsi Meriyasının Gənclərlə İş Şöbəsinin müdiri:
“‘Ordu Düşərgəsi 2026’ layihəsinin iştirakçıları onlayn platforma vasitəsilə qeydiyyat əsasında seçilib. Düşərgənin tələblərinə cavab verən gənclər müvafiq keçid vasitəsilə qeydiyyatdan keçərək motivasiya məktublarını təqdim ediblər. Ümumilikdə 46 gənc seçilib və onlar 26 iyul–31 iyul 2026-cı il tarixlərində düşərgədə iştirak etmək imkanı əldə ediblər.
Hesab edirəm ki, düşərgə gənclərə çox müsbət təsir göstərəcək. Çünki burada həm fiziki, həm intellektual-idraki, həm də əyləncəli fəaliyyətlər yüksək səviyyədə təşkil olunub. Gənclər vaxtlarını səmərəli idarə etməyi, həyatda lazım olan bacarıq və vərdişləri formalaşdırmağı öyrənirlər. Düşərgənin sağlam həyat tərzi, vətənpərvərlik və qarşılıqlı dəstək prinsipləri üzərində qurulması isə xüsusi əhəmiyyət daşıyır.”
⸻
Kocoridə yerləşən Giorgi Antsuxelidze adına Serjantlar Akademiyasında fəaliyyət göstərən Ordu Düşərgəsində hər səhər dövlət himni, intizam və vətənpərvərlik ruhu ilə başlayır.
Ordu Düşərgəsi gənclər üçün unudulmaz macəra, yeni bilik və təcrübə məkanıdır. İştirakçılar taqımlara bölünür, serjantların təlimatı və təcrübəli zabitlərin rəhbərliyi altında ciddi, maraqlı və rəngarəng gündəlik proqram çərçivəsində müxtəlif fiziki və tədris fəaliyyətlərinə qoşulurlar.
Düşərgədə hər saat, hər dəqiqə və hər saniyə planlaşdırılıb. Səhər saat 07:00-dan başlayan gün gənclər üçün maraqlı və dinamik çağırışlarla davam edir. Onlar maneələrin dəf olunmasını, topoqrafiyanı, ilkin tibbi yardım göstərilməsini, dağ mühəndisliyini öyrənir, həmçinin hərbi sahənin müxtəlif istiqamətləri ilə yaxından tanış olurlar.
Burada hər tapşırıq komanda ruhunu, qarşılıqlı yardımı və dözümlülüyü nümayiş etdirmək üçün bir imkandır. İştirakçılar ciddi, eyni zamanda maraqlı fəaliyyətlər vasitəsilə onlara rəhbərlik edən serjantın, bayraqdarın və silah yoldaşlarının etimadını doğrultmağa çalışırlar.
Ordu Düşərgəsində təhlükəsiz mühitin təmin olunmasına xüsusi diqqət yetirilir. İştirakçıların sağlamlığına peşəkar tibb işçiləri və təcrübəli hərbçilər nəzarət edirlər.
Macəra düşərgəsində taqımlar dövrümüzün qəhrəmanlarının adını daşıyır, hər birinin öz himni, bayrağı və köynəyinin rəngi var. Gənclər altı gün ərzində bu dəyərləri inam və ləyaqətlə qoruyurlar.
Fiziki və maarifləndirici fəaliyyətlərlə zəngin günün sonunda gənclər ənənəvi tonqal ətrafında toplaşır, gün ərzində yaşadıqları təəssüratları bölüşür, yeni dostları ilə birlikdə unudulmaz xatirələr yaradırlar. Bu düşərgədə inam, vətənpərvərlik, komanda ruhu və həmrəylik ayrılmaz bir vəhdət təşkil edir.
