მრავალი წელი პედაგოგიურ მოღვაწეობაში, ბავშვების აღზრდა-განვითარებასა და მათდამი სიყვარულში გაატარა. ჰუმანური, სამართლიანი, საქმის პროფესიონალი. მოგითხრობთ პედაგოგზე, რომელიც პროფესიულ მოვალეობას ყოველთვის პირნათლად ასრულებდა. მედეა ცინცაძემ  უამრავი თაობა აღზარდა. დამსახურებულ მასწავლებელს საზოგადოება აფასებს. აქვს უამრავი ჯილდო თუ სიგელი. ბოლნისს ახსოვს და უყვარს, სწორედ ამის დასტურია საპატიო მოქალაქის წოდება, რომელიც  სახალხო დღესასწაულზე „ბოლნისქალაქობა 2022“ მიენიჭა.

„ბოლნისის საპატიო მოქალაქეობა დიდი პატივია, შრომის, ცხოვრების წესის, შენი ადამიანობის დაფასებაა, მადლობა ყველა იმ ადამიანს, ვინც ეს სიხარული მომანიჭა, როგორც მითხრეს, ბატონმა კობა ჟღენტმა წარმადგინა ამ ჯილდოზე, სიმართლე გითხრათ, მასთან პირადი შეხება არ მქონია, არც მისთვის და არც მისი შვილებისთვის არ მისწავლებია, მაგრამ ბოლნისი პატარაა, აქ ყველა ყველას იცნობს, ვფიქრობ, ამ წოდების მატარებელი უნდა იყოს კარგი ადამიანი, საქმის კეთილსინდისიერად შემსრულებელი, ერთგული, მოყვარული და პროფესიონალი.“

მედეა ცინცაძე 1935 წელს ჩოხატაურში დაიბადა, სადაც მშვიდ, მშრომელ ოჯახში, სიყვარულით იზრდებოდა. 1941 წელს, როდესაც ექვსი წლის იყო, ომი დაიწყო. მამა ომში წავიდა და უგზო-უკვლოდ დაიკარგა, როგორც ქალბატონი მედეა გვიამბობს, მამა საუკეთესო ლოტბარი იყო, გადმოცემით იცის, რომ ომში, მღეროდა ხოლმე, ამიტომ მას ბულბული შეარქვეს. დედა კი  მშრომელი ადამიანი იყო, რომელიც შვილების კეთილდღეობისთვის ყველაფერს აკეთებდა.

„სამივე დედმამიშვილმა სკოლა ოქროს მედალზე და უნივერსიტეტი წითელ დიპლომზე დავამთავრეთ, პროფესიით ფიზიკოსი ვარ. გონებრივი შესაძლებლობები ხელს მიწყობდა ფიზიკა საფუძვლიანად შემესწავლა. რაც შეეხება ოჯახს, მე და ჩემი მეუღლე, ჰამლეტ გურგენიძე კლასელები ვიყავით, უნივერსიტეტის დამთავრების შემდეგ დავქორწინდით, განაწილებით მოვხვდი ჯერ თეთრიწყაროში, შემდეგ ბოლნისში, მყავს ოთხი გოგო, რვა შვილიშვილი და შვიდი შვილთაშვილი.“

ოთხი შვილის დედა, მეუღლესთან ერთად, ერთმანეთს უთავსებდა შვილების აღზრდას და უდიდეს პასუხისმგებლობას – პედაგოგობას, ოჯახური ბედნიერება მას დაეხმარა გამხდარიყო საუკეთესო მასწავლებელი. ბოლნისში,  სულხან-საბა ორბელიანის სახელობის პირველ საშუალო სკოლაში, 55 წელი  იმუშავა, შემდეგ იყო №3 საშუალო სკოლა, სადაც დირექტორის მოადგილედ დასაქმდა, სასწავლო-საორგანიზაციო განხრით.

„მასწავლებელი უნდა იყოს პროფესიონალი, უყვარდეს შრომა,  რთულია პედაგოგობა,  ეს უნდა გქონდეს გათვითცნობიერებული, მუშაობდე საკუთარ თავზე, აუცილებლად უნდა იყო მომთხოვნი, სამართლიანი, დამოუკიდებელი, ნეიტრალური, მიუკერძოებელი, ჰუმანური,  ასწავლიდე ბავშვებს ურთიერთობას, ერთმანეთის გატანას, დაცვას. მთავარია კარგი ადამიანი აღზარდო, თორემ ფიზიკა რთულია და ბუნებრივია, ყველა ვერ ისწავლის, ჩემი ძირითადი მიმართულებაც ეს იყო.“

დღემდე ცდილობს მეტი ინფორმაცია მიიღოს, ეცნობა ლიტერატურას, პრესას, უყურებს ახალ ამბებს. ამბობს, რომ თაობა და ზოგადად, ცხოვრება ძალიან შეიცვალა. „ცხოვრება ხანმოკლეა, 40 წლის შემდეგ დრო სწრაფად გარბის, მთავარია ეს გზა მეტ-ნაკლებად მშვიდად, წყნარად, კონფლიქტების გარეშე განვლო,  ვფიქრობ ეს შევძელი, მიხარია ყოფილი მოსწავლეების შეხვედრა და მათდამი ჩემი სიყვარული, მეფერებიან, თბილად მხვდებიან, მეუბნებიან, რომ სამართლიანი მასწავლებელი ვიყავი, ვაფასებდი ცოდნას. დღევანდელ პედაგოგებს მინდა ვურჩიო, ბევრი იმუშაონ საკუთარ თავზე, უყვარდეთ ბავშვები, იყვნენ სამართლიანები. ბავშვებს კი ვეტყვი, ისწავლეთ, იკითხეთ ბევრი, გახდით პროფესიონალები, თქვენი ტვინი ღრუბელივითაა, ყველაფერს იწოვს და იმახსოვრებს, ქვეყანაში კი ვისურვებდი მშვიდობას, არ მომწონს ამდენი შუღლი, დაპირისპირება“.

მედეა მასწავლებელი  უკვე 87 წლისაა. ფიქრობს, რომ მისია შეასრულა, გზა, რომელიც გაიარა, დიდია, თუმცა ისე განვლო, უკან მოხედვის არ რცხვენია. გაზეთი „ბოლნისი“ მადლობას უხდის მას საინტერესო საუბრისთვის და დიდხანს, ჯანმრთელად ყოფნას უსურვებს.

მაგდა დევნოზაშვილი

საქართველოს პარლამენტში ბოლნისის,დმანისის, თეთრიწყაროსა და წალკის მაჟორიტარი გოგი მეშველიანი თეთრიწყაროს მუნიციპალიტეტის სოფელ ასურეთის მეღვინეებს ასურეთელ მეღვინეებს ადგილწარმოშობის დასახელების სტატუსის მინიჭებას ულოცავს. საქართველოში გეოგრაფიული აღნიშვნებისა და ადგილწარმოშობის დასახელებების რეგისტრაცია საქპატენტის უფლებამოსილებას წარმოადგენს. ეს სტატუსები ენიჭება განსაკუთრებულ ქართულ პროდუქტებს. გეოგრაფიული აღნიშვნისა და ადგილწარმოშობის დასახელება მომხმარებელს აწვდის ინფორმაციას, პროდუქტის წარმომავლობასა და იმ უნიკალურ მახასიათებლებზე, რაც დაკავშირებულია წარმოშობის ადგილთან, რომლის დამახასიათებელი გარემო პირობები და ადგილობრივ მოსახლეობაში არსებული წარმოების ტრადიციული ცოდნა, ხდის თითოეულ ასეთ პროდუქტს გამორჩეულს.

“ვულოცავ თეთრიწყაროს მუნიციპალიტეტის სოფელ ასურეთის მეღვინეებს ადგილწარმოშობის დასახელების სტატუსის მინიჭებას.რაც ჩვენს მეღვინეებს მისცემს მეტ შესაძლებლობას ადგილობრივ და საერთაშორისო ბაზარზე.” – განაცხადა გოგი მეშველიანმა

ქართული ღვინისთვის „ასურეთული შალა“ ადგილწარმოშობის დასახელების სტატუსის მინიჭების მოთხოვნით საქპატენტს, 2022 წლის 4 აპრილს ა(ა)იპ ასურეთის განვითარების რეგიონულმა ცენტრმა მიმართა და განაცხადით წარმოდგენილი და საქპატენტის მიერ მოძიებული მასალებით გაირკვა, რომ „ასურეთული შალა“ ღია ან მუქი ლალისფერი შეფერილობის, წითელი, მშრალი ღვინოა; მისი მიკროზონა მდებარეობს თეთრიწყაროს მუნიციპალიტეტის სოფელ ასურეთში; ღვინო მიიღება მხოლოდ მიკროზონაში მოწეული ასურეთული შავის ჯიშის ყურძნიდან, თუმცა, დასაშვებია თავკვერისა და შავკაპიტოს გამოყენებაც 15%-ის ფარგლებში; ყურძნის გადამუშავება და ღვინის დამზადება უნდა განხორციელდეს მხოლოდ მიკროზონის საზღვრებში, ხოლო ჩამოსხმა დასაშვებია საქართველოს ტერიტორიაზე. სხვადასხვა წყაროებით დასტურდება, რომ ვაზის ძველი ენდემური ჯიში „ასურეთული შავი“, ძველი ასურეთის ნასახ¬ლარზე იპოვა და გაამრავლა გერმანელმა ოტო შალლმა, ვის პატივსაცემად ღვინოს ეწოდა „შალა“.

საქართველოს პარლამენტში ბოლნისის, დმანისის, თეთრიწყაროსა და წალკის მაჟორიტარი გოგი მეშელიანი მუნიციპალიტეტის მერთან დავით შერაზადიშვილთან ერთად  სოფელ ნახიდურის საჯარო სკოლას სტუმრობდა, სადაც მოსწავლეებთან, სასულიერო პირებთან და საგანმანათლებლო რესურსცენტრის ხელმძღვანელთან  ერთად მარადმწვანე  ხის ნერგები დარგო.

ხელისუფლების წარმომადგენლები სკოლაში მოსწავლეებს და მასწავლებლებს გავესაუბრნენ,  ინგლისურის კონკურსში გამარჯვებულ ბავშვებს   კი სერთიფიკატები გადასცეს.

„ნახიდურის საჯარო სკოლა, ერთ-ერთი გამორჩეულია მუნიციპალიტეტში  აქტიურობითა და მიღწევებით, რაც დიდწილად  სკოლის დირექტორის კახა ჩუბინიძის და პედაგოგების  დამსახურებაა, რომელთაც  განსაკუთრებული სწრაფვა აქვთ სიახლეების მიმართ’’. – განაცხადა გოგი მეშველიანმა

საქართველოს ხელისუფლება განსაკუთრებულ მნიშვნელობას ანიჭებს ქალთა მიმართ და ოჯახში ძალადობის წინააღმდეგ ბრძოლის მიზნით კოორდინირებული და კომპლექსური მიდგომით მუშაობას.

მთავრობის დადგენილებით, მიმდინარე წელს დამტკიცდა 2022-2030 წლების ადამიანის უფლებათა დაცვის ეროვნული სტრატეგია, რომელიც ქმნის ერთიან ჩარჩოს ქვეყანაში ადამიანის ძირითად უფლებათა და თავისუფლებათა ეროვნული სისტემისა და ინსტიტუციური დემოკრატიის გასაძლიერებლად.

ეროვნული სტრატეგია, სხვა მნიშვნელოვან პრიორიტეტულ მიმართულებებთან ერთად, მოიცავს გენდერული თანასწორობისა და ქალთა უფლებების განმტკიცების საკითხებს და ოჯახში ძალადობის წინააღმდეგ ბრძოლის პრინციპებს.

გარდა ამისა, მიმდინარე წელს აღმასრულებელი ხელისუფლების წარმომადგენელთა საქმიანობის და შედეგზე ორიენტირებული ღონისძიებების ეფექტიანად გატარების მიზნით, მთავრობის ადმინისტრაციის კოორდინაციით, შემუშავდა და მთავრობის მიერ დამტკიცდა ცალკე მდგომი „ქალებზე, მშვიდობასა და უსაფრთხოებაზე გაეროს უშიშროების საბჭოს რეზოლუციების განხორციელების“ და „ქალთა მიმართ ძალადობისა და ოჯახში ძალადობის წინააღმდეგ ბრძოლისა და მსხვერპლთა (დაზარალებულთა) დასაცავად გასატარებელ ღონისძიებათა“ 2022-2024 წლების ეროვნული სამოქმედო გეგმები.

ქალთა მიმართ და ოჯახში ძალადობის დაძლევის აუცილებელი წინაპირობაა საზოგადოების ცნობიერების, მგრძნობელობისა და თანამშრომლობის ჩარჩოების გაზრდა.

სწორედ ამიტომ, საქართველოს მთავრობა, პარტნიორებთან ერთად, ყოველწლიურად უერთდება ქალთა მიმართ ძალადობის წინააღმდეგ კამპანიას.

ქალთა მიმართ ძალადობის წინააღმდეგ 16-დღიანი კამპანია მსოფლიოში 1991 წლიდან იმართება, 25 ნოემბრიდან 10 დეკემბრის ჩათვლით. კამპანიას მსოფლიოს 187 ქვეყანა და 5000-ზე მეტი ორგანიზაცია აღნიშნავს. კამპანიის მიზანია ქალთა მიმართ ძალადობის საკითხებზე საზოგადოების ცნობიერების ამაღლების გზით ძალადობის პრევენციის ხელშეწყობა.

„ბუშონი“ ღვინისა და სხვა ალკოჰოლური სასმელების იმპორტ-ექსპორტითაა დაკავებული. შეხვედრაზე გოგი მეშველიანმა და დავით შერაზადიშვილმა კომპანიის დირექტორს დავით გოგოძესა და ფრანგული მხარის წარმომადგენელს, არჩილ კობაურს ბოლნისში მევენახეობა-მეღვინეობის სფეროში არსებული ვითარების შესახებ ინფორმაცია მიაწოდეს.

შეხვედრის ფარგლებში, გოგი მეშველიანმა, დავით შერაზადიშვილმა და კომპანია „ბუშონის“ წარმომადგენლებმა ბოლნისური მარნები და ვენახებიც მოინახულეს.

კომპანიის წარმომადგენლები ბოლნისური ღვინის გემოვნური თვისებებითა და წარმოების სპეციფიკით დაინტერესდნენ. აღსანიშნავია, რომ „ბუშონი“ მევენახეობა-მეღვინეობის სფეროში ისეთ ლიდერ კომპანიებთან თანამშრომლობს როგორებიცაა: Cordier wines (Groupe invivo) და Maison Advini Jeanjean.

დღეს ვეტერანების საქმეთა სახელმწიფო სამსახურში საქართველოს ტერიტორიული მთლიანობისათვის აფხაზეთის საომარ მოქმედებებში დაღუპულ და ომის შემდგომ გარდაცვლილ მებრძოლთა დაჯილდოების ცერემონიალი გაიმართა. სიკვდილის შემდეგ, ვახტანგ გორგასლის I და II ხარისხის ორდენები გადაეცათ თავდაცვის სამინისტროს II საარმიო კორპუსის 24-ე ბრიგადის 242-ე და 243-ე ბატალიონთა სამხედრო მოსამსახურეებს.

დაღუპულთა ოჯახის წევრებს, სახელმწიფო ჯილდოები ვეტერანების საქმეთა სახელმწიფო სამსახურის დირექტორმა, გენერალ-მაიორმა კობა კობალაძემ და საქართველოს პრეზიდენტის, სალომე ზურაბიშვილის მთავარმა მრჩეველმა სტრატეგიული დაგეგმვის საკითხებში, დავით თევზაძემ გადასცეს.

‘’ჩვენთვის უდიდესი პატივია თქვენთან შეხვედრა. ჩვენი ქვეყნის ბოლო ათწლეულების ისტორია დაიწერა იმ გმირების ბრძოლითა და თავგანწირვით, რომელთა ოჯახის წევრებიც თქვენ ბრძანდებით. ჩვენს ქვეყანას, თავისი არსებობის მანძილზე, გმირები არასოდეს დაჰკლებია და თქვენი ოჯახის წევრებსაც ერგოთ პატივი, ამ გმირთა სავანეში გადაენაცვლათ. ამ ორდენების უკან დგანან სამშობლოსათვის შეწირული ადამიანები, რომელთაც შეგნებულად მიიტანეს თავიანთი სიცოცხლე სამშობლოს სამსხვერპლოზე.მათი ღვაწლი უნდა დაფასდეს და მომავალმა თაობებმა იცოდნენ მათი თავგანწირვის შესახებ. მისასალმებელია, რომ დღეს, სახელმწიფოს აქვს გამოხატული ნება, უკვდავყოს ქვეყნისთვის თავდადებულთა სახელები,’’_აღნიშნა კობა კობალაძემ.

‘’ჩვენ, სამშობლოსათვის, ერთად ვიბრძოდით ბრძოლის ველზე, თუმცა, ღმერთმა ისინი გამოარჩია გმირებად. ამიტომაც მათი სახელები თაობებმა უნდა იცოდნენ. საზოგადოება უნდა იცნობდეს ქვეყნის იმ შვილებს, რომელთაც ქვეყნის წინაშე ვალი საკუთარი სიცოცხლით მოიხადეს. სამხედრო ჩინის მიუხედავად, მათ, ყველას ერთი სახელი_სამშობლოსათვის თავდადებული ჰქვიათ. გარწმუნებთ, ჩვენ,ვინც აქ ვსხედვართ,ვისურვებდით მათ ადგილზე ყოფნას, რადგან ყველა მეომრისთვის ბედნიერებაა ბრძოლის ველზე სიკვდილი,’’- განაცხადა დავით თევზაძემ.

საქართველოს პრეზიდენტის 2022 წლის 7 ოქტომბრის N 07/10/04 განკარგულების საფუძველზე ვახტანგ გორგასლის I ხარისხის ორდენით დაჯილდოვდნენ: გაბედავა თენგიზ ღუღუნის ძე; სილაგაძე რომეო ჯემალის-ძე; კუხალაშვილი გოჩა ნიკოლოზის ძე; თუთისანი ჟორა პავლეს ძე; ჩაკვეტაძე ვახტანგ ვალიკოს ძე; ხოლო ვახტანგ გორგასლის II ხარისხის ორდენი გადაეცათ ლეჟავა როინ დომეს ძეს, ბებია ალექსანდრე ილიას ძეს, ურიდია მედეა აკაკის ასეულს, ყურაშვილ ჯანსუღ ჯიბილოს ძეს, ცხვირავაშვილ არჩილ ოთარის ძეს, ბებია რეზო ტერენტის ძეს, ბენდელიან ვიტალი ოთარის ძეს და სვანიძე ბეჟან ბაგრატის ძეს.

სტუმრებმა, ვეტერანების საქმეთა სახელმწიფო სამსახურისა და სახელმწიფოს მესვეურთა მიმართ მათი ოჯახის წევრთა ღვაწლის დაფასებისთვის მადლიერება გამოხატეს და ხაზგასმით აღნიშნეს მათ მიმართ პირადად კობა კობალაძისა და სამსახურის მთელი კოლექტივის გულისხმიერი დამოკიდებულება და თანადგომა.

მორწმუნეები  გიორგობის დღესასწაულს ტაძრებში საზეიმო ლოცვით აღნიშნავენ.  საკვირველთმოქმედი და ძლევაშემოსილი გიორგი ქართველი ერის მფარველად მიიჩნევა. წმინდანი საქართველოში განსაკუთრებულად უყვართ. იგი მესამე საუკუნეში კაბადოკიაში, მდიდარ ქრისტიანულ ოჯახში დაიბადა. რომის იმპერატორ დიოკლიტიანეს მმართველობის დროს, მხედართმთავარი გახდა. ქრისტიანებზე დევნის დაწყების შემდეგ კი იმპერატორს განუდგა. წმინდანს 30 წლის ასაკში თავი მოკვეთეს. იგი ეკლესიის ისტორიაში შევიდა, როგორც ძლევაშემოსილი და უძლეველი ზეციური მხედარი. ეკლესია წმინდა გიორგის ხსენებას ორჯერ აღნიშნავს: 6 მაისს – წმიდანის აღსრულების დღეს და 23 ნოემბერს – მისი ბორბალზე წამების დღეს.

 საქართველოს პარლამენტში ბოლნისის, დმანისის, თეთრიწყაროსა და წალკის მაჟორიტარი გოგი მეშველიანი მოსახლეობას გიორგობას ულოცავს და ფეისბუქის პირად გვერდზე გამგებლობის პერიოდში ემოციით დატვირტლ დღეს და მეფე ლაშა-გიორგის მიერ აშენებული ეკლესიის აღდგენის ისტორიაზე წერს. სტატუსს უცვლელად გთავაზობთ „გილოცავთ გიორგობას! დღემდე ცხადად მახსოვს ის დღე და ყოველ გიორგობას კიდევ უფრო მეტი სიმძაფრით მახსენებს თავს. ალბათ იმიტომ, რომ ერთ-ერთი მრავალმხრივი ემოციით დატვირთული დღე იყო, რომელიც ჩემი ბოლნისის გამგებლად მუშაობის პერიოდს უკავშირდება. 2016 წლის მაისში მე და ჩემ მეგობარს, დავით შერაზადიშვილს ბოლნელი მთავარეპისკოპოსი, მეუფე ეფრემი დაგვიკავშირდა და სოფელ დარბაზში წასვლა შემოგვთავაზა. უნდა გამოვტყდე – ჩემთვის იმ დღემდე უცნობი, წმინდა გიორგის სახელობის მეცამეტე საუკუნის ეკლესიის კართან აღმოვჩნდით. საბედნიეროდ, ბოლნისის მუნიციპალიტეტი იმდენად მდიდარია ისტორიული ძეგლებით, ალბათ დასაძრახი არ არის, ყოველი მათგანის შესახებ არ ფლობდე ინფორმაციას, მაშინაც კი, თუ მისი ხემძღვანელი ხარ და ეს ადგილები და შემოგარენი ფეხით გაქვს არაერთხელ შემოვლილი ნადირობისას, თუ ლაშქრობებისას. ჩვენთვის დაუჯერებელი იყო იმ ფაქტის აღმოჩენა, რომ უკვე აღდგენილი ეკლესიიკენ (რომელიც ცენტრალური გზიდან რამდენიმე კილომეტრით არის დაშორებული) მიმავალ ბილიკზე, ეზოში ხელოსნები ქვაფენილს აგებდნენ…. და ამ უმნიშვნელოვანესი და ულამაზესი ეკლესიის რესტავრაცია ფონდმა “ქართუმ” ისე განახორციელა, რომ არც მე და არც თვითმმართველობის რომელიმე წარმომადგენელს ამ, საკმაოდ დიდი მოცულობის სამუშაოების შესახებ, არანაირი ინფორმაცია არ გვქონდა. ვფიქრობ, დღემდე არსად დაწერილა ამის შესახებ და ბევრმა არც იცის თუ ვის მიერ იქნა აღდგენილი მეფე ლაშა-გიორგის მიერ აშენებული ეკლესია… ასე, უხმაუროდ, ყოველგვარი აფიშირების გარეშე აღდგა და შეუნარჩუნდა ჩვენ ქვეყანას რამდენიმე ასეული კულტურული მემკვიდრეობის ძეგლი… შეგვეწიოს და გვფარავდეს დარბაზის წმინდა გიორგი!