24 მარტის მონაცემებით დადასტურებულია 599 ახალი შემთხვევა.ჰოსპიტალში Covid 19-ის მკურნალობას 739 პაციენტი განაგრძობს.შემცირებულია ჰოსპიტალიზებულ პირთა რაოდენობა, როგორც რეანიმაციულ, ისე თერაპიულ განყოფილებაში.უკანასკნელი 24 საათის განმავლობაში გარდაიცვალა 7 ადამიანი.

უკრაინაში დაღუპული მებრძოლები დავით რატიანი და გიორგი ბერიაშვილი გამთენიისას თბილისში ჩამოასვენეს. ომში გმირულად დაღუპულებს სახლში და შემდეგ ტაძრებში გადაასვენებენ. ცოცხალი ჯაჭვით, ოჯახის წევრებმა, მეგობრებმა და რიგითმა მოქალაქეებმა მეომრებს პატივი მიაგეს.

დავით რატიანი და გიორგი ბერიაშვილი უკრაინის ქალაქ ირპენში 18 მარტს გარდაიცვალნენ. ორი ყოფილი სპეცრაზმელი უკრაინაში საბრძოლველად მოხალისედ გაემგზავრა.

რუსეთ-უკრაინის ომში დაღუპული საქართველოს ორი მოქალაქის სამშობლოში გადმოსვენება სახელმწიფომ უზრუნველყო. მათ ოჯახებს საქართველოს პრეზოდენტმა სალომე ზურაბიშვილმა მიუსამძიმრა.

რთული მეტეოლროგიური პირობების გამო თეთრიწყაროს მუნიციპალიტეტში ათეულობით სოფელი მოწყვეტილია გარე სამყაროს. ამის შესახებ ინფორმაციას მაჟორიტარი დეპუტატი გოგი მეშველიანი ავრცელებს. მაჟორიტარის თქმით, ადგილობრივი თვითმმართველობა , სამაშველო სამსახურები საკუთარი შესაძლებლობის მაქსიმუმს აკეთებენ სტიქიასთან გასამკლავებლად. ინტენსიურ რეჟიმში მიმდინარეობს გაწმენდითი სამუშაოიები თუმცა , ძლიერი თოვის გამო ვერ ხერხდება გზების გასუფთავება. „ყველაფერს გავაკეთებთ იმისათვის, რომ შექმნილი რთული მეტეოროლოგიური პრობლემების გადასაწყვეტად, მუნიციპალიტეტს დამატებით მიეწოდოს სპეც. ტექნიკა და ვიმედოვნებთ, რომ შევძლებთ გამოწვევებთან გამკლავებას. აქვე მადლობა მინდა გადავუხადო, ადგილობრივი თვითმმართველობის წარმომადგენლებს და საგანგებო სიტუაციების მართვის სამაშველო სამსახურის თანამშრომლებს, რომლებმაც შეძლეს ფეხით გაევლოთ რამოდენიმე კილომეტრიანი გზა და ჰუმანიტარული პროდუქტით და მედიკამენტებით მოემარაგებინათ სოფლებში დიდთოვლობის გამო ჩარჩენილი მოსახლეობა.” აცხადებს საქართველოს პარლამენტში ბოლნისის, დმანისის, თეთრიწყაროსა და წალკის მაჟორიტარი გოგი მეშველიანი.

გოგი მეშველიანი ადგილზე გეგმავს ჩასვლას დაა პირადად გაეცნობა არსებულ მდგომარეობას. დამატებით გაცნობებთ, რომ მოსახლეობისთვის საჭირო ინფორმაციის მისაღებად მუნიციპალიტეტში 24 საათიან რეჟიმში მოქმედებს ცხელი ხაზი: 598 59 94 71, 591 30 40 22

ჩაკეტილი სოფლები: კლდეისი,პატარა ირაგა, ჯიგრაშენი, ივანოვკა, მენკალისი, ნავთიანი, შეხვეტილა, არხოტი, კოდისწყარო, ნაპილნარი, ჯვრისხევი, ქვემო ჭინჭრიანი, ზემო ჭინჭრიანი,პატარა ნამტვრიანი,დიდი ნამტვრიანი,უგუდეთი,დრე, ვანათი, ღვევი, შამთა, ღოლოვანი, ამლივი, პატარა თონეთი, დიდი თონეთი, მოხისი, ახალსოფელი, გოხნარი, ზირბითი, საფუძვრები, გოლთეთი, ჩხიკვთა, მაწევანი, ტბისი, ხოპისი, ქსოვრეთი, ვაკე, გუდარეხი, აბელიანი, შიხილი, ქვემო ახალშენი, ლიპი, არდისუბანი, აბრამეთი.

უკრაინის ჰუმანიტარული დახმარების პუნქტში, დედაქალაქის მერმა კომპანიებს და შემომწირველებს გაღებული დახმარებისთვის მადლობა გადაუხადა. არემჯი ჯგუფმა, რომელმაც თანამშრომლების ჩართულობით ბოლნისსა და თბილისში პირველადი საჭიროების ნივთები შეაგროვა, დედაქალაქის მერს ის ინიციატივები გააცნეს რომელსაც კომპანია უკრაინის მხარდასაჭერად ახორციელებს. ჰუმანიტარული დახმარებასთან ერთად, არემჯი ჯგუფმა, უკრაინის მხარდასაჭერად გამართულ ტელემარათონშიც მიიღო მონაწილეობა, სადაც კომპანიამ 100 000 ლარი, ხოლო მისმა მენეჯერებმა 60 000 ლარი გადარიცხეს.

COVID-19-ის სამკურნალო პრეპარატი პაქსლოვიდის პირველი პარტია საქართველოში უკვე ჩამოვიდა – ინფორმაციას ჯანდაცვის სამინისტრო ავრცელებს.

უწყების ცნობით, საქართველო პირველი ქვეყანაა რეგიონში, სადაც COVID-19-ის სამკურნალო მედიკამენტი ხელმისაწვდომი ხდება და ის პაციენტებს უფასოდ გადაეცემათ.

“პაქსლოვიდი COVID-19-ის წინააღმდეგ შექმნილი პირველი ყველაზე ეფექტური წამალია. მედიკამენტი ვირუსის გამრავლების უნარის შეზღუდვას ახდენს. „პაქსლოვიდი“-ს ინფიცირების დადასტურებისთანავე გამოყენების შემთხვევაში, დაავადება ვეღარ პროგრესირებს, რაც ამცირებს ჰოსპიტალიზაციის რისკს. მედიკამენტი 90%-მდე იცავს დაავადების გართულებისგან”,- წერია განცხადებაში.

პაქსლოვიდით მკურნალობა ვირუსის დადასტურების ადრეულ ეტაპზე უნდა დაიწყოს. მკურნალობის კურსი 5 დღეს მოიცავს.

თურქეთიდან იმპორტირებული პრეპარატების სია გაფართოვდა. 45-მდე დასახელების მედიკამენტის შეძენა საქართველოს მოსახლეობას უკვე 3 დიდ სააფთიაქო ქსელში შეუძლია. იაფი მედიკამენტები „ფარმადეპო“-ს, „ავერსი“-ს და „PSP“-ს ქსელშია ხელმისაწვდომი. გარდა ამისა, ხვალიდან მედიკამენტ ქსარელტოს შეძენა შესაძლებელი იქნება „GPC”-ს მთელ ქსელში. იგივე მედიკამენტი ხელმისაწვდომია „ფარმსახლი“-ს სააფთიაქო ქსელშიც. საქართველოს მთავრობის გადაწყვეტილებით, თურქული ფარმაცევტული ბაზრის გახსნის შედეგად, პრეპარატების ფასი, საშუალოდ, 60-80%-ით შემცირდა.მოსახლეობისთვის მედიკამენტებზე ხელმისაწვდომობის გაზრდა სახელმწიფოს პრიორიტეტია. ჯანდაცვის სამინისტროში, ამ მიმართულებით, მუშაობა აქტიურად მიმდინარეობს. თურქეთიდან იმპორტირებული პრეპარატების ჩამონათვალი მოწოდებულია ფარმაცევტული სექტორის მიერ და განახლდება კომპანიებისგან მიღებული ინფორმაციის შესაბამისად. აფთიაქების მისამართებს, სადაც მათი შეძენა არის შესაძლებელი გაეცნობით ამ ბმულზე : https://www.moh.gov.ge/uploads/files/2022/21.03.22.pdf

28 მარტიდან უქმდება ღია სივრცეში პირბადის ტარების ვალდებულება და სხვა მოქმედი რეგულაციები, – აღნიშნული გადაწყვეტილება უწყებათაშორისმა საკოორდინაციო საბჭომ დღევანდელ სხდომაზე მიიღო, რომელიც პრემიერ-მინისტრ ირაკლი ღარიბაშვილის ხელმძღვანელობით, მთავრობის ადმინისტრაციაში გაიმართა. საქართველოში არსებული ეპიდემიოლოგიური მდგომარეობის ანალიზის საფუძველზე, 28 მარტიდან, პირბადის ტარების ვალდებულება შენარჩუნდება მხოლოდ დახურულ სივრცეებსა და საზოგადოებრივ ტრანსპორტში. უქმდება სტუმრების რაოდენობაზე მოქმედი შეზღუდვა, როგორც საზოგადოებრივი კვების ობიექტებზე, ასევე სპორტულ, სახელოვნებო თუ სხვა სახის ღონისძიებებზე, მათ შორის სოციალურ ღონისძიებებზე. დისტანციურ სამუშაო რეჟიმში მყოფი საჯარო მოხელეები სამუშაო ადგილებს დაუბრუნდებიან. ამასთანავე, უქმდება თვითიზოლაციის ვალდებულება საქართველოს იმ მოქალაქეებისთვის, რომლებიც ქვეყანაში PCR-ტესტის გარეშე ბრუნდებიან. უწყებათაშორისი საკოორდინაციო საბჭოს გადაწყვეტილებით, აპრილის განმავლობაში გაგრძელდება ვაქცინაციის წახალისების პროგრამა, რომლის თანახმად, 50 წელს ზემოთ ასაკის მოქალაქეები ვაქცინის პირველი დოზით აცრის შემთხვევაში 200 ლარს მიიღებენ, ხოლო ე.წ. ბუსტერ დოზით აცრის შემთხვევაში, ამავე ასაკობრივი ჯგუფის პირებს 100 ლარი ჩაერიცხებათ. საბჭოს დღევანდელ სხდომაზე აღინიშნა, რომ საქართველო იქნება რეგიონში პირველი ქვეყანა, რომელიც „ფაიზერის“ მიერ შექმნილ კოვიდის სამკურნალო პრეპარატს მიიღებს. „პაქსლოვიდის“ პირველი დოზები ქვეყანაში დღეს შემოვა და ქრონიკული დაავადებების მქონე პირებსა და რისკჯგუფების წარმომადგენლებს, ინფიცირების შემთხვევაში, ჯანმრთელობის მდგომარეობის გართულების თავიდან ასაცილებლად, მკურნალობის კურსისთვის საჭირო მედიკამენტის დოზა უფასოდ გადაეცემათ. პრემიერ-მინისტრის ხელმძღვანელობით მოქმედი უწყებათაშორისი საკოორდინაციო საბჭოს მუშაობაში აქტიურად მონაწილეობს საქართველოს პარლამენტი და პრეზიდენტის ადმინისტრაცია.

უწყებათაშორის საკოორდინაციო საბჭოსთან არსებული ოპერაციული შტაბის უფროსის, გიორგი ღიბრაძის განცხადებით, უქმდება სტუმრების რაოდენობრივი შეზღუდვა საზოგადოებრივი კვების ობიექტებისთვის.

მისი თქმით რაოდენობრივი შეზღუდვა ასევე უქმდება სპორტულ, სახელოვნებო თუ სხვა სახის ღონისძიებებზე.

„უქმდება სტუმრების რაოდენობრივი შეზღუდვა, როგორც საზოგადოებრივი კვების ობიექტებზე ასევე სპორტულ, სახელოვნებო თუ სხვა სახის ღონისძიებებზე, მათ შორის სოციალურზე“, – განაცხადა გიორგი ღიბრაძემ საკოორდინაციო საბჭოს სხდომის შემდეგ გამართულ ბრიფინგზე