ბოლნისის მუნიციპალიტეტისა და მიმდებარე სოფლების 24 საათიანი წყალმომარაგებით უზრუნველსაყოფად გაერთიანებული წყალმომარაგების კომპანია 85 მლნ. ლარზე მეტი ღირებულების პროექტებს ახორციელებს. კომპანიის დირექტორმა, ალექსანდრე თევდორაძემ მოადგილეებთან, ქვემო ქართლის რწმუნებულ, გიორგი დოხტურიშვილთან და ბოლნისის მუნიციპალიტეტის მერთან, დავით შერაზადიშვილთან ერთად მიმდინარე სამუშაოები მოინახულა. ამ ეტაპზე, ქ. ბოლნისში აზიის ბანკის მხარდაჭერით აქტიურად გრძელდება წყალარინების სისტემის მშენებლობა. ასევე, ბოლნისის მუნიციპალიტეტში წყლის ინფრასტრუქტურის გაუმჯობესების მიზნით რამდენიმე პროექტი მიმდინარეობს. პროექტების ფარგლებში, ადგილობრივი მოსახლეობის 24 საათიანი წყალმომარაგებისთვის გათვალისწინებულია: ქ. ბოლნისისა და დაბა კაზრეთის წყალმომარაგების სისტემის ოპტიმიზაციისა და მრავალბინიანი საცხოვრებელი კორპუსების გამრიცხველიანება; სოფლების: ბალიჭის, ძველი ქვეშისა და ძეძვნარიანის წყალმომარაგების სისტემების რეაბილიტაცია-მშენებლობა. ქ. ბოლნისის „ყარაბულახის“ სათავე ნაგებობის რეაბილიტაცია, მაგისტრალური მილის, წყალსადენი ქსელის, სატუმბი სადგურის მოწყობა. ასევე, არსებული რეზერვუარების რეაბილიტაცია. მიმდინარე პროექტების პარალელურად, სოფელ ტალავერის წყალმომარაგების სისტემის მოწყობის პროექტირება-მშენებლობისთვის ტენდერი მიმდინარეობს.
სეზონური გრიპის საწინააღმდეგო ვაქცინაცია, ყველა მსურველისთვის უფასო 22 ნოემბრის ჩათვლით იქნება
ქვეყნის მასშტაბით, სეზონური გრიპის საწინააღმდეგო აცრა, 6 თვის ასაკიდან, უფასოა. ნებისმიერი მსურველი, მომსახურებას, ვაქცინაციის პროცესში ჩართულ, 400-მდე სამედიცინო დაწესებულებაში მიიღებს.
იმუნიზაციის სახელმწიფო პროგრამის ფარგლებში, საქართველომ, 200 000 დოზა, სანოფი პასტერის წარმოების, ოთხ-კომპონენტიანი ვაქცინა შეიძინა, რომელიც ერთ-ერთია ჯანმოს მიერ რეკომენდებულ ვაქცინებს შორის. დაავადებათა კონტროლისა და საზოგადოებრივი ჯანმრთელობის ცენტრმა, ვაქცინაცია სექტემბრის ბოლოს დაიწყო. პირველ ეტაპზე, მომსახურება, დაავადების გართულების მომატებული რისკი აქვთ მქონე პირებმა მიიღეს. 22 ნოემბრის ჩათვლით კი ვაქცინაცია ნებისმიერი მსურველისთვის უფასო იქნება.
გრიპზე აცრის სერვისის მიმწოდებელი დაწესებულებების ნუსხა შეგიძლიათ იხილოთ ბმულზე : https://ncdc.ge/…
ქვემო ქართლსა და სამცხე ჯავახეთში, არსებული სოციალური სერვისების საბაზისო კვლევის შედეგების საჯარო განხილვა გაიმართა
დღეს, ბოლნისის მუნიციპალიტეტის მერიის საკონფერენციო დარბაზში, სამცხე ჯავახეთსა და ქვემო ქართლში არსებული სოციალური სერვისების საბაზისო კვლევის შედეგების საჯარო განხილვა გაიმართა, რომელიც CENN – ის დაკვეთით ,,სოციალური კვლევისა და ანალიზის ინსტიტუტმა“ მოამზადა. შეხვედრას ბოლნისის მუნიციპალიტეტის მერის მოადგილე და სხვადასხვა სექტორის წარმომადგენლები დაესწრნენ. კვლევის წარდგენის შემდეგ, სოციალური სერვისებისა და პროგრამების ხელმისაწვდომობის შესახებ პრეზენტაცია, ბოლნისის მუნიციპალიტეტის სოციალური და ჯანდაცვის სამსახურის წარმომადგენელმა წარადგინა.
საზოგადოებისთვის მოხდა პროექტის ფარგლებში ჩამოყალიბებული ,, პარტნიორთა ჯგუფის“ გაცნობა, რომელიც 12 წევრისგან დაკომპლექტდა, მათგან 6 თვითმმართველობის, ხოლო დანარჩენი 6 სამოქალაქო სექტორის წარმომადგენელია. ჯგუფი ოთხი წლის განმავლობაში მუნიციპალიტეტში არსებული სოციალური სერვისების გაუმჯობესებაზე და საჭირო სერვისების დანერგვაზე იმუშავებს.
შეხვედრა ,, სამოქალაქო საზოგადოების განვითარების“ პროექტის ფარგლებში გაიმართა, რომელსაც ქვემო ქართლსა და სამცხე-ჯავახეთში CENN ახორციელებს ევროკავშირის ფინანსური მხარდაჭერით.
ბოლნისელი სპორტსმენი საერთაშორისო ტურნირის გამარჯვებულია
ესტონეთის დედაქალაქ-ტალინში ჩატარდა მსოფლიო ჩემპიონის,ბერლინის 1936 წლის ოლიმპიური თამაშების ჩემპიონის კრისტიან პალუსალოს ხსოვნისადმი მიძღვნილი საერთაშორისო ტურნირი თავისუფალ ჭიდაობაში.აღსანიშნავია,რომ საქართველოს ეროვნული ნაკრების გუნდში წარმატებით იასპარეზა ბოლნისის სპორტულ-გამაჯანსაღებელი კომპლექსის 17 წლის მოჭიდავე-გიგა შავაძემ, რომელმაც მეოთხედფინალურ შეხვედრაში დაამარცხა სლოვაკეთის წარმომადგენელი, ნახევარფინალში ესტონელი სპორტსმენი, ხოლო ფინალურ შეხვედრაში შვედეთის წარმომადგენელი და გახდა ამ საერთაშორისო ტურნირის გამარჯვებული.
გოგი მეშველიანის კითხვა საქართველოს ფინანსთა მინისტრის პირველ მოადგილეს, გიორგი კაკაურიძეს
დღეს საფინანსო -საბიუჯეტო კომიტეტის სხდომაზე, სადაც „საქართველოს 2023 წლის სახელმწიფო ბიუჯეტის შესახებ“ საქართველოს კანონის პროექტისა და „ქვეყნის ძირითადი მონაცემები და მიმართულებები 2023-2026 წლებისათვის“ დოკუმენტის გადამუშავებული ვარიანტები განიხილებოდა , საქართველოს პარლამენტში ბოლნისის, დმანისის, თეთრიწყაროსა და წალკის მაჟორიტარმა გოგი მეშველიანმა კითხვა დაუსვა საქართველოს ფინანსთა მინისტრის პირველ მოადგილეს, გიორგი კაკაურიძეს ზოგადსაგანმანათლებლო ინფრასტრუქტურის მშენებლობა-განვითარება-რეაბილიტაციის საკითხზე.
„ბატონო გიორგი, ჩემი კითხვა უკავშირდება ზოგადსაგანმანათლებლო ინფრასტრუქტურის მშენებლობა, განვითარება-რეაბილიტაციას. თქვენს მიერ წარმოდგენილ ბიუჯეტში ეს ასიგნებები ორ სამინისტროზეა ჩაშლილი, მათ შორის რეგიონული განვითარებისა და ინფრასტრუქტურის სამინისტროს აქვს 137 მლნ. ლარი, ხოლო განათლებისა და მეცნიერების სამინისტროს 179 მლნ. ლარი ამ მიმართულებით, მთლიანობაში 316 მლნ. ლარია წარმოდგენილი ბიუჯეტით.
ბუნებრივია ჩვენ გვაინტერესებს, მე ამ შემთხვევაში, როგორც მაჟორიტარ დეპუტატს, კონკრეტულად ჩვენს ოლქებში, ბოლნისის, დმანისის, თეთრიწყაროსა და წალკის მუნიციპალიტეტებში არის თუ არა უკვე განსაზღვრული რომელი სკოლების რეაბილიტაცია მოხდება, სად აშენდება სკოლები და ბიუჯეტის საბოლოო ვერსიის წარმოდგენამდე გვექნება თუ არა წვდომა ამ კრიტერიუმებზე, როგორ შეირჩევა ეს სკოლები, რა კრიტერიუმებით ხდება ამ თანხების განაწილება ამა თუ იმ მუნიციპალიტეტის მიმართულებით.“
გოეთეს ინსტიტუტის ინიციატივით ბოლნისელი ახალგაზრდებისთვის საინტერესო შეხვედრები გაიმართება
ბოლნისის მუზეუმის გოეთეს მედიათეკის სივრცეში, გოეთეს ინსტიტუტის ინიციატივითა და ორგანიზებით, №1 საჯარო სკოლის უფროსკლასელთათვის საინფორმაციო შეხვედრა გაიმართა. ღონისძიების თემა იყო „საქართველოს დემოკრატიული რესპუბლიკა“, სადაც განიხილეს ჩვენი ქვეყნის 1028 დღიანი დემოკრატია და უახლესი ისტორია. შეხვედრის ფარგლებში, შეკრებილი მოსწავლეებისთვის, წარმომადგენლებმა ისაუბრეს ქვეყნის ევროპულ და ევროატლანტიკურ სტრუქტურებში ინტეგრაციასა და გამოწვევებზე.
შეხვედრები სხვადასხვა საჯარო და კერძო სკოლის მოსწავლეებისთვის კვლავ გაგრძელდება და იგი მნიშვნელოვან, მრავალფეროვან და საინტერესო საკითხებს მოიცავს.
გოგი მეშველიანმა დმანისის ბიუროში მოქალაქეთა მიღება გამართა
საქართველოს პარლამენტში ბოლნისის, დმანისის, თეთრიწყაროსა და წალკის მაჟორიტარმა გოგი მეშველიანმა დღეს დმანისის ბიუროში მოქალაქეთა მიღება გამართა. მუნიციპალიტეტში მცხოვრებლებმა მაჟორიტარს საკუთარ საჭიროებებზე ესაუბრნენ. „ადგილზევე განვიხილეთ მოგვარების გზები, ხოლო საკითხებზე რომელთა გადაჭრა დროს და სხვადასხვა უწყებებთან მჭიდრო თანამშრომლობას მოითხოვს განვაგრძობთ მუშაობას და უფლებამოსილების ფარგლებში ძალისხმევას არ დავიშურებთ მათ გადასაწყვეტად.“ -განაცხადა გოგი მეშველიანამა
„არემჯის“ განცხადება მუშევანის პროექტთან დაკავშირებით
მუშევანის პროექტის ირგვლივ, სამწუხაროდ საქმე გვაქვს მიზანმიმართულ დეზინფორმაციასთან, რომელიც არ ემსახურება სოფელ მუშევანის განვითარებას და მისი მოსახლეობის კეთილდღეობას. შესაბამისად კიდევ ერთხელ, ფაქტებზე დაყრდნობით ვაცხადებთ, რომ სოფლის მოსახლეობა სრულად იყო ინფორმირებული (მათ შორის აზერბაიჯანულ ენაზე) არსებული პროექტის შესახებ, რასაც სოფელში ჩატარებული ორი საჯარო განხილვა მოწმობს. აღნიშნული დასტურდება გზშ-ს საჯარო განხილვის უწყვეტი ვიდეო გადაღებითაც, რომელიც სრულად ასახავს საჯარო განხილვის მაღალ სტანდარტს და კანონიერებას. ვიდეო გადაღება ხორციელდებოდა არასამთავრობო ორგანიზაციებს მიერ. მოვუწოდებთ მათ გაასაჯაროონ აღნიშნული ვიდეო/ფოტო მასალები.
გზშ-ს განხილვის შემდეგ, გარემოს ეროვნული სააგენტოს მიერ მუშევანის პროექტის ირგვლივ მოთხოვნილ დამატებით ინფორმაციას, კომპანიის მხრიდან ასევე გაეცა ამომწურავი პასუხები.
ჩვენ ასევე წლებია ვასრულებთ უპრეცედენტო გარემოსდაცვით ვალდებულებებს და ამ მხრივ ქვეყნის მასშტაბით ვნერგავთ მაღალ გარემოსდაცვით სტანდარტს, რაც უკვე არაერთხელ იქნა აღიარებული ამ დარგის სპეციალისტების მიერ. შესაბამისად „არემჯის“ მიმართ არ არსებობს არცერთი ობიექტური პასუხგაუცემელი კითხვა, რაც შეიძლება ნებართვის არ გაცემის საფუძველი გამხდარიყო.
გარდა ამისა, ადგილზე ადგილობრივ მოსახლეობასთან რამდენიმე თვეა ვაწარმოებთ აქტიურ კომუნიკაციას და უკვე გადავდგით არაერთი ქმედითი ნაბიჯი, რომლის პოზიტიურ შედეგებსაც უკვე გრძნობს და მომავალშიც აუცილებლად იგრძნობს მუშევანის მოსახლეობის აბსოლუტური უმრავლესობა.
კიდევ ერთხელ გამოვთქვამთ მზადყოფნას, დაინტერესების შემთხვავაში მედიას და არასამთავრობო სექტორს მივაწოდოთ სრული და ამომწურავი ინფორმაცია მუშევანის პროექტის სანებართვო პირობებთან დაკავშრებით. ასევე, იმ მიმდინარე სოციალურ პროექტებზე, რომელიც სოფელ მუშევანში მოსახლეობის მოთხოვნის საფუძველზე დაგეგმილი გრაფიკით მიმდინარეობს.
10 ნოემბერს მსოფლიოში მეცნიერების საერთაშორისო დღე აღინიშნება
10 ნოემბერს მსოფლიოში მეცნიერების საერთაშორისო დღე აღინიშნება. ამ თარიღის დაწესება მიზნად ისახავს საზოგადოებაში მეცნიერების როლის გაძლიერებას, ყოველდღიურ ცხოვრებაში მისი მნიშვნელობის ხაზგასმას და ინოვაციური სამეცნიერო მიღწევების შესახებ მოქალაქეების ინფორმირებას.
საქართველოს განათლებისა და მეცნიერების სამინისტროს ერთ-ერთ უმთავრეს პრიორიტეტს მეცნიერების განვითარების ხელშეწყობა და სამეცნიერო საზოგადოების მხარდაჭერა წარმოადგენს. ბოლო წლებში ამ მიმართულებით არაერთი მნიშვნელოვანი ნაბიჯი გადაიდგა და სხვადასხვა საერთაშორისო თუ ადგილობრივი პროექტი განხორციელდა. მათ შორის, განსაკუთრებით აღსანიშნავია ის ფაქტი, რომ საქართველო ევროკავშირის კვლევისა და ინოვაციის ახალი ჩარჩო პროგრამის Horizon Europe-ის წევრი გახდა. შედეგად, საქართველოს სამეცნიერო საზოგადოებას შესაძლებლობა აქვს, მონაწილეობა მიიღოს 95.5 მილიარდი ევროს ბიუჯეტის მქონე კვლევისა და ინოვაციის პროგრამის ფარგლებში გამოცხადებულ კონკურსებში იმავე პირობებითა და უფლებებით, რითაც ევროკავშირის ქვეყნების სამეცნიერო და ინოვაციების სფეროს წარმომადგენლები სარგებლობენ.
საქართველოს განათლებისა და მეცნიერების სამინისტრო ულოცავს მეცნიერებს პროფესიულ დღეს, წარმატებებსა და წინსვლას უსურვებს მათ სამეცნიერო საქმიანობაში.
10 ნოემბერი მეცნიერების საერთაშორისო დღედ 2001 წელს UNESCO-ს ეგიდით დაწესდა, მას შემდეგ საქართველო ყოველწლიურად უერთდება მსოფლიო ინიციატივას.
აღსანიშნავია, რომ 2022 წელს მეცნიერების საერთაშორისო დღე შემდეგი თემატიკით აღინიშნება: „ფუნდამენტური მეცნიერებები მდგრადი განვითარებისთვის“.
საყოველთაო ჯანდაცვის პროგრამით, ინსულტის, თავისა და ზურგის ტვინის ტრავმული დაზიანების შემდგომი რეაბილიტაცია დაფინანსდება
საყოველთაო ჯანდაცვის სახელმწიფო პროგრამით, ინსულტის, თავისა და ზურგის ტვინის ტრავმული დაზიანების შემდგომი მდგომარეობის რეაბილიტაცია დაფინანსდება. ამის შესახებ განცხადება ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა მთავრობის სხდომის დასრულების შემდეგ გააკეთა.
ზურაბ აზარაშვილის თქმით, საქართველოში, სამედიცინო დაწესებულებებს, ამ დიაგნოზით, წლის განმავლობაში, 6 000-მდე პაციენტი მიმართავს. პროგრამის წლიური ბიუჯეტი კი, დაახლოებით, 11 მილიონი ლარია.
ინსულტის, თავისა და ზურგის ტვინის ტრავმული დაზიანების შემდგომი მდგომარეობის რეაბილიტაცია პაციენტებს შესაძლებლობას მისცემს, დროულად დაიბრუნონ ფუნქციური უნარ-ჩვევები და თვიდან აიცილონ მძიმე შეზღუდვების ჩამოყალიბება. პროგრამა მოიცავს რეაბილიტაციის სრულ კურსს.
„ეს პროგრამა საკმაოდ მოცულობითი და შესაბამისად, ძალიან მნიშვნელოვანია. თუმცა, რეაბილიტაციის კომპონენტის გარდა, სამინისტრო, ინსულტის მძიმე შედეგების პრევენციის ახალი მოდელის დანერგვაზეც მუშაობს – ინსულტის შემთხვევაზე, გადაუდებელი სამედიცინო დახმარების ბრიგადა, მაქსიმალურად სწრაფად მოახდენს რეაგირებას და პაციენტს, ჩვენების მიხედვით, იმ კონკრეტულ კლინიკებში გადაიყვანს, სადაც მას ოპერატიულად დაეხმარებიან. აღნიშნული მოდელით, იმ შემდეგი გართულებების პრევენციას მოვახდენთ, რასაც შესაძლოა, რეაბილიტაცია დაჭირდეს ან საკმაოდ მძიმე შედეგებამდე მიიყვანოს პაციენტი“, – განაცხადა ზურაბ აზარაშვილმა.
