ბოლნისის მუნიციპალიტეტში 2024 წლის მაისში, სტიქიის შედეგად დაზიანებული ინფრასტრუქტურის აღდგენითი სამუშაოები აქტიურად მიმდინარეობს, შენდება ხუთი ახალი ხიდი, ხოლო რეაბილიტაცია უტარდება ოთხს. მიმდინარე სამუშაოები საქართველოს რეგიონული განვითარების მინისტრის პირველმა მოადგილემ, ქვემო ქართლში სახელმწიფო რწმუნებულთან და ბოლნისის მუნიციპალიტეტის მერთან, ერთად დაათვალიერა. უკვე დასრულდა ბოლნისსა და ხატისოფელს შორის დამაკავშირებელი საავტომობილო ხიდის რეაბილიტაცია. სოფელ რაჭისუბანში კი აქტიურად მიმდინარეობს ორი ახალი ხიდის მშენებლობა. ხიდზე კოჭების მოწყობის სამუშაოების განხორციელების მიზნით, ეწყობა დროებითი გადასასვლელი. რაც შეეხება საფეხმავლო ხიდის მშენებლობას, აქ უკვე გაკეთდა სანაპირო ბურჯი და ხიმინჯები, მიმდინარეობს ბურჯის მონოლითური რკინაბეტონის საყრდენი ბალიშების მოწყობა. ობიექტების მშენებლობა დაფინანსებულია რეგიონებში განსახორციელებელი პროექტების ფონდიდან – სტიქიის სალიკვიდაციო ღონისძიებებისთვის, რომლის საერთო ღირებულება 5 855 099 ლარს შეადგენს. სარეაბილიტაციო სამუშაოები რეგიონული განვითარების მინისტრის მოადგილესთან ერთად ადგილობრივმა და ცენტრალური ხელისუფლების წარმომადგენლებმა დაათვალიერეს
