სვანეთის შემდეგ, ეთნოფესტივალს ბოლნისმა უმასპინძლა, რომელიც საპატრიარქოს ჩოხოსანთა საზოგადოების ინიციატივითა და ბოლნელი მთავარეპისკოპოსის მეუფე ეფრემის ლოცვა-კურთხევით გაიმართა. ფესტივალი ბოლნისში 2 დღის განმავლობაში მიმდინარეობდა და მასში ქვეყნის კულტურა, ისტორია, რელიგია და ტრადიციები იყო თავმოყრილი.
ფესტივალის ფარგლებში კულტურის სახლის ჰოლში წარმოდგენილი იყო სხვადასხვა კუთხის ოსტატების მიერ დამზადებული ხელნაკეთი ნივთები, რომლებიც ქართულ ხალხურ ხელოვნებასა და მრავალფეროვან მემკვიდრეობას ასახავდა.
დღის დასასრულს, სხვადასხვა ანსამბლებმა, ქართული მრავალხმიანი ფოლკლორი და ქორეოგრაფიული ნომრები წარმოადგინეს, რის შემდეგაც, ბოლნისიდან საპატიო ჩოხოსნები დაასახელეს, ღონისძიების ბოლოს ჩირაღდანი აინთო, რომელიც შემდეგი რეგიონის დასახელებამდე, ბოლნისის ეპარქიაში დაიდებს ბინას, ხოლო შემდგომ ჩირაღდანი მთელ საქართველოს მოივლის, როგორც ქვეყნის ერთობის და გაერთიანების სიმბოლო.
