„არემჯი”-ს თანამშრომლები პრეზიდენტთან და პრემიერთან შეხვედრას ითხოვენ

0

rmj-874x492 „არემჯი გოლდისა“ და „არემჯი კოპერის“  თანამშრომლებისთვის გაურკვეველია საქართველოს პრეზიდენტის გიორგი მარგველაშვილის განცხადება საყდრისი-ყაჩაღიანის უბანთან დაკავშირებით,  რითაც მან ფაქტიურად მწვანე შუქი აუნთო სამოქმედოდ სხვადასხვა არასამთავრობო ორგანიზაციებსა და იმ უპასუხისმგებლო პოლიტიკოსებს, რომლებიც ეგრეთწოდებული ძეგლის დაცვის მიზნით მიზანმიმართულად მოქმედებენ არა მხოლოდ ჩვენი რეგიონის წინააღმდეგ, არამედ საქართველოს მთავრობის წინააღმდეგ. ჩვენ გვაინტერესებს, ქვეყნის პრეზიდენტი ასე ურცხვად რატომ აკეთებს ისეთ განცხადებას, რაც შეიძლება საბედისწერო აღმოჩნდეს კომპანიაში დასაქმებული 3000 ოჯახისა და მთელი რეგიონისათვის. იგი ადასტურებს ძეგლის არსებობას მაშინ, როდესაც არც კი დაინტერესებულა და უნახავს ობიექტი. უფრო მეტიც, პრეზიდენტს სურვილიც კი არ გასჩენია შეხვედროდა ადგილობრივ მოსახლეობას და დაინტერესებულიყო მათი პოზიციით. იგი გამოდის ინიციატივით და ამბობს, რომ შეწყდეს კომპანიის მიერ დაწყებული სამუშაოები. ეს ხდება იმ ფონზე, როდესაც ქვეყნის პრემიერ-მინისტრი სრულიად იაზრებს თავის პასუხისმგებლობას რეგიონისა და ხალხის წინაშე და აცხადებს, რომ „არემჯი გოლდმა“ აუცილებლად უნდა გააგრძელოს სამუშაოები. მაშინ, როდესაც კანონის სრული დაცვით გაცემულია ნებართვები სამუშაოებზე, ქვეყნის პრეზიდენტს თუ სხვა არასამთავრობო ორგანიზაციებს და უპასუხისმგებლო პოლიტიკოსებს საერთოდ არ აღელვებთ ხალხის მდგომარეობა.

ჩვენ დღეიდან ვიწყებთ პერმანენტულ აქციებს იმ ძირგამომთხრელი ქმედებების წინააღმდეგ, რომლებიც მიზანმიმართულად ასე სავალალო მდგომარეობაში გვაგდებენ ჩვენ, როგორც „არემჯი გოლდის“, ასევე „არემჯი კოპერის“ თანამშრომლებს, რადგან ეს ორივე კომპანია ერთანეთის განუყოფელი ნაწილია.” – ნათქვამია განცხადებაში, რომელიც კომპანიის თანამშრომელბმა გაავრცელეს.

დღეს დილიდან კომპანიის თანამშრომლები პრეზიდენტის რეზიდენციასთან შეიკრიბნენ და კიდევ ერთხელ გააპროტესტეს პრეზიდენტის განცხადება და მასთან შეხვედრა მოითხოვეს. მას შემდეგ, რაც ადმინისტრაციიდან არავინ გამოეხმაურათ აქციის მონაწილეები  მთავრობის კანცელარიისკენ გაემართნენ.

„რატომ არ იცავთ ჩვენს ინტერესებს”, „ნუ დაგვტოვებთ მშივრებს”, „საია გრანტებს ჭამს, ჩვენ რა ვჭამოთ” – ასეთი შინაარსის შეძახილები ისმის „არემჯი”-ს თანამშრომელთა აქციაზე.

აქციის მონაწილეების მთავარი მოთხოვნა საწარმოს მუშაობის გაგრძელებაა.

კომპანია RMG-იმ საყდრის-ყაჩაღიანის N1 სალიცენზიო უბანზე სამთო-მოპოვებითი სამუშაოები 13 დეკემბერს განაახლა, რასაც პროტესტის ტალღა მოჰყვა. დღემდე მიმდინარეობს აქციები სამუშაოების შეწყვეტის მოთხოვნით. რამდენიმე არასამთავრობო ორგანიზაციამ და პოლიტიკურმა ძალამ საქმის სამართლებრივი შეფასება მოითხოვა.

 

Share.

Leave A Reply